ەكونوميكا • 22 قازان، 2021

تۇراقتى دامۋ ۆەكتورلارى بەلگىلەندى

27 رەت كورسەتىلدى

باس شاھاردا Astana Mining & Metallurgy 11-ءشى تاۋ-كەن مەتاللۋرگيالىق كونگرەسى ءوز جۇ­مىسىن باستادى. بيىلعى كونگرەسس پان­دە­­ميا جاعدايىنداعى الەمدىك تاۋ-كەن ونەر­كا­سىبىنە ارنالىپ، مەملەكەتتىك ورگاندار، حالىق­ارا­لىق ساراپشىلار، ءىرى كومپا­نيا­لاردىڭ باسشىلارى، قىزمەتتىك كاسىپورىن­دار­دىڭ توپ-مەنەدجەرلەرى سالاداعى وزەكتى ماسە­لەلەر مەن دامۋ پەرسپەكتيۆالارىن تالقىلادى.

يندۋستريا جانە ينفراقۇرىلىمدىق دامۋ ۆيتسە-ءمينيسترى ادىلبەك سارسەمباەۆ تاۋ-كەن سەك­تورىن يندۋستريا 4.0-گە اۋىستىرا وتىرا تەح­نولوگيالىق پروتسەستەردى جاڭعىرتۋ جونىندەگى جۇ­مىس­تى جالعاستىرۋ قاجەتتىگىن ايتتى. سونداي-اق تسيفرلى ترانسفورماتسيا، ەنەرگيانى ۇنەمدەۋ، كومىرتەگى بەيتاراپتىلىعىن قامتاماسىز ەتۋ، دامۋدىڭ شيكىزاتتىق مودەلىنەن وڭدەۋگە كوشۋ سەكىلدى دامۋدىڭ ماڭىزدى اسپەكتىلەرىن جەتكىزدى.

«مەملەكەت باسشىسى حالىققا ارناعان جول­داۋىندا ايتقانداي، ەلىمىزدىڭ رەسۋرستىق الەۋەتى تولىق اشىلماعان جانە گەولوگيالىق زەرتتەۋ دەڭگەيى تومەن دەڭگەيدە. بۇل باعىتتا ىزدەۋ تەحنولوگياسىن جاقسارتىپ، ينۆەستيتسيانى ۇلعايتۋ قاجەت. ينۆەستورلارعا كەشەندى قولداۋ كورسەتەتىن جانە گەولوگيالىق اقپاراتتىڭ اشىق تسيفرلى دەرەك­قورىن جاسايتىن ۇلتتىق گەولوگيالىق قىزمەتتى قۇرۋ ەلىمىزدەگى گەولوگيالىق بارلاۋدى دامىتۋدا نەگىزگى ءرول اتقارادى»، دەدى ءا.سارسەمباەۆ.

تاۋ-كەن ءوندىرۋ جانە تاۋ-كەن مەتاللۋرگيا كاسىپ­ورىندارى قاۋىمداستىعىنىڭ اتقارۋشى ديرەكتورى نيكولاي رادوستوۆەتستىڭ سوزىنە سۇيەنسەك، پاندەميا جاعدايىندا تاۋ-كەن كەشەنى ەكونوميكانىڭ باسقا سالالارى سەكىلدى ءوز پوزيتسياسىن جوعالتپاي، كەرىسىنشە نىعايتا ءتۇستى.

دەسە دە بۇل باعىتتا اتقارىلاتىن شارۋالار ءالى از ەمەس. ءبىرىنشى كەزەكتە بۇل ەكولوگيامەن بايلانىس­تى ماسەلەلەر. قاۋىمداستىق وكىلى كاسىپورىنداردى وزىق قولجەتىمدى تەحنولوگيالارعا كوشىرۋ ءۇشىن ارزان نەسيە بەرۋدى، يمپورتتىق جابدىقتى اكەلۋدە جەڭىلدىكتەر جاساۋدى، سول سەكىلدى جەدەلدەتىلگەن امورتيزاتسيانى ەنگىزىپ، ىنتالاندىرۋدى ۇسىندى.

ەكىنشى ماسەلە، كومىر ءوندىرىسىنىڭ بولاشاعىنا قاتىستى. قاۋىمداستىق باسشىسى مەملەكەت باس­شى­سىنىڭ كومىرتەگى بەيتاراپتىعىنا بايلانىس­تى ساياساتتى قولدايتىنىن ايتىپ، سالانى قايتا قۇرىلىمداۋدىڭ مۇمكىندىكتەرىنە نازار اۋدارتتى.

«قازاقستاندا كومىر قورى كوپ. بۇل – ءبىزدىڭ كەم­شىلىگىمىز ەمەس، كەرىسىنشە ارتىقشىلىعىمىز. بىزگە كومىر سالاسىنىڭ ەكونوميكالىق دامۋىنىڭ جاڭا مودەلىن قۇرىپ، ترانسفورماتسيالاۋىمىز كەرەك. قازىر كوكس حيمياسى، حيميا جانە فارماتسەۆتيكا ونەركاسىبى باعىتىنداعى ونىمدەردىڭ جاڭا تۇرلەرىن جاساۋعا بايلانىستى قىزىقتى جوبالار ىسكە اسىرىلۋدا. جالپى العاندا، كومىردەن 300-دەن استام ءونىم ءتۇرىن شىعارۋعا بولادى»، دەدى ن.رادوستوۆەتس.

وسى ماقساتتا سالالىق قاۋىمداستىق ۇكىمەتپەن بىرلەسىپ، كومىر يندۋسترياسىن دامىتۋعا ارنالعان ستراتەگيانى ازىرلەۋدى ۇسىندى.

سوڭعى جاڭالىقتار

ۇقساس جاڭالىقتار