جيىن بارىسىندا ن.نوعاەۆ قالا سالۋدا قاراپايىم تالاپتاردىڭ ساقتالماي وتىرعانىن سىنعا الىپ, اقتاۋ قالاسىنىڭ اكىمىنە, وبلىستىق قۇرىلىس باسقارماسى مەن قالا قۇرىلىسى جانە جەردى باقىلاۋ باسقارماسىنىڭ باسشىلارىنا تەكسەرۋ جۇرگىزىپ, قۇرىلىستاردىڭ باس جوسپارعا ساي ورىندالۋىن قامتاماسىز ەتۋدى تاپسىردى.
– حالىق جەكەلەگەن شاعىن اۋدانداردا قۇرىلىستاردىڭ وتە تىعىز سالىنىپ جاتقانىن ايتۋدا. تۇرعىنداردان جاڭا شاعىن اۋدانداردا مەكتەپ پەن بالاباقشالاردىڭ جوقتىعىنا قاتىستى شاعىم دا كوپتەپ تۇسۋدە. ولار بالالارىن قايدا اپارادى؟ تۇسىنەمءىن, سىزدەر پايدا تاپقىلارىڭىز كەلەدى, بىراق ولاي بولمايدى عوي. بۇل ۇيلەردى تۇرعىزعاندا نە ويلادىڭىزدار؟ قالا قۇرىلىسىنىڭ رەتسىز سالىنۋى – ءبىرىنشى كەزەكتە حالىقتى قۇرمەتتەمەۋ. سونىمەن قاتار وڭىردە كەيبىر نىسانداردىڭ جوبالىق-سمەتالىق قۇجاتىنسىز سالىنىپ جاتقانى تۋرالى اقپارات بار. قالاعان جەرگە ءزاۋلىم ساراي كوتەرە بەرسەك, باس جوسپاردىڭ قاجەتى نە؟ بارلىق قۇرىلىس زاڭ اياسىندا جۇرگىزىلۋى ءتيىس. بۇل جاۋاپتى ورگانداردىڭ ءوزارا زاڭسىز كەلىسىمىنىڭ ناتيجەسى. ماسەلەنى انىقتاپ, ءتيىستى شارا قابىلداۋدى تاپسىرامىن, – دەدى ءوڭىر باسشىسى.
جيىندا كوتەرىلگەن تاعى ءبىر وزەكتى جايت – ۇلەسكەرلەر ماسەلەسى.
– كەيبىر قۇرىلىس كومپانيالارىنىڭ جاۋاپسىزدىعىنان تۇرعىندار زارداپ شەگۋدە. الاياق كومپانيالاردىڭ ارباۋىنا تۇسكەن جۇزدەگەن ادام باسپاناسىز قالامىز با دەپ قاۋىپتەنەدى. ماعان, مەنىڭ ارىپتەستەرىمە قۇرىلىسشىلارعا ۇيلەردى اياقتاۋدى مىندەتتەۋدى سۇراپ كۇنىنە بىرنەشە ادام حابارلاسادى. قولمەن جاساعاندى مويىندارىڭىزبەن كوتەرىڭىزدەر. شامالارىڭىز كەلمەسە مىندەتتەمە الماڭىزدار. وسىنداي ماسەلەنىڭ الدىن الۋ ءۇشىن جەرگىلىكتى اتقارۋشى ورگاندار مەن قۇقىق قورعاۋ ورگاندارىنىڭ باسشىلارىندا بارلىق مۇمكىندىك بار. جۇمىس جۇرگىزىڭىزدەر, – دەدى ن.نوعاەۆ.
وبلىس اكىمى سونداي-اق پرەزيدەنت تاپسىرماسىنا ساي يگەرىلمەي جاتقان جەرلەردى مەملەكەتكە قايتارۋ قاجەتتىگىن ايتتى. وسى ورايدا ورىنباسارىنا وبلىس كولەمىندەگى بوس جەرلەرگە مونيتورينگ جۇرگىزىپ, كەرى قايتارۋدى تاپسىردى. زاڭ اياسىندا ارەكەت ەتىپ, بۇل ماسەلەدە بوساڭسۋعا بولمايتىنىن مالىمدەدى.
– تۇرعىندار تاراپىنان شەتپە ماڭىنداعى كارەرگە قاتىستى دا شاعىم ءتۇستى. قيىرشىق تاس وندىرەتىن كارەرلەردەن شاڭ كوتەرىلىپ, ادام دەنساۋلىعىنا زيان كەلتىرىپ جاتقانىن ايتۋدا. تەكسەرۋ جۇرگىزىڭىزدەر. مۇندا پروكۋراتۋرا وكىلدەرى وتىر, سولارمەن بىرلەسىپ, زاڭ اياسىندا ءتيىستى شارا قولدانىڭىزدار, – دەپ قورىتىندىلادى ن.نوعاەۆ.
جيىندا كوتەرىلگەن ماسەلەلەر تۇرعىندار جىلدار بويى شەشىمىن تاپپاي جۇرگەن تۇيتكىلدەر بولاتىن. بەرىلگەن تاپسىرمالار قوردالانعان ماسەلەلەرگە قوزعاۋ سالادى دەپ ويلايمىز.
