سپورت • 13 قازان، 2021

رەسەي كورتتارىندا كۇش سىناسادى

41 رەت كورسەتىلدى

قازان ايىنىڭ ەكىنشى جارتىسىندا رەسەيدە تەننيستەن ەكى بىردەي حالىقارالىق ءتۋرنيردىڭ شىمىلدىعى تۇرىلەدى. ءبىرى – ماسكەۋدە، ەكىنشىسى نەۆا جاعالاۋىندا وتەدى. قازىردىڭ وزىندە قازاقستاننىڭ بەلدى ويىنشىلارىنىڭ ءبىرازى بۇل باسەكەلەرگە شاقىرتۋ الىپ وتىر.

عالىم سۇلەيمەن

ماسكەۋدەگى وليمپيا ستاديونىندا وتەتىن كرەمل كۋبوگى جولىنداعى جارىستىڭ 31 جىلدىق تاريحى بار. وتكەن عاسىردىڭ توقسانىنشى جىلدارىنىڭ باسىندا تۇساۋى كەسىلگەن ءتۋرنيردىڭ العاشقى ەكەۋىندە كورت قوجايىنى اندرەي چەركاسوۆتىڭ اسىعى الشىسىنان ءتۇستى. ال ايتۋلى دودادا ەڭ كوپ ولجاعا كەنەلگەن رەسەيدىڭ جۇلدىزى ەۆگەني كافەلنيكوۆ ەكەنىن سپورتسۇيەر قاۋىم جاقسى بىلۋگە ءتيىس. 1997-2001 جىلدار ارالىعىندا ول بەس رەت باس جۇلدەنى ولجالادى. ءححى عاسىردىڭ باسىندا نيكولاي داۆىدەنكونىڭ ءداۋىرى ءجۇردى. ول ءۇش رەت تەڭدەسسىز دەپ تانىلدى. ايەلدەر سايىسىندا ەكى رەتتەن توپ جارعان ءۇش تەننيسشى بار. ولار – رەسەيلىك اناستاسيا مىسكينا (2003، 2004) مەن سۆەتلانا كۋزنەتسوۆا (2015، 2016) جانە فرانتسيالىق ماري پيرس (1998، 2005). قازاقستاندىقتار اراسىندا ەڭ ۇزدىك كورسەتكىشكە ميحايل كۋكۋشكين قول جەتكىزدى. 2013 جىلى جالاۋى جەلبىرەگەن جارىستا جەرلەسىمىز اقتىق سىنعا دەيىن القىنباي جەتىپ، شەشۋشى تۇستا فرانتسيانىڭ مىقتىسى ريشار گاسكەگە ەسە جىبەردى. سونداي-اق 2011 جىلى امەريكالىق ۆانيا كينگپەن جۇپ قۇراعان ياروسلاۆا شۆەدوۆا وسى ءتۋرنيردىڭ جەڭىمپازى اتاندى.

قازىرگى كەزدە كرەمل كۋبوگىنىڭ جۇلدە قورى 1 345 045 اقش دوللارىن قۇراپ وتىر.

16-24 قازان ارالىعىندا وتەتىن جارىستا ەلىمىزدىڭ ەرلەر مەن ايەلدەر اراسىنداعى ءبىرىنشى راكەتكالارى الەكساندر بۋليك پەن ەلەنا رىباكينا ونەر كورسەتەدى.

نەۆا جاعالاۋىندا St. Petersburg Open دوداسى وتەدى. اتالعان جارىس 1995 جىلدان بەرى ۇزدىكسىز ۇيىمداستىرىلىپ كەلەدى. تۇساۋكەسەر تۋرنيردە ەۆگەني كافەلنيكوۆ قارسىلاس شىداتپادى. ەڭ ناتيجەلى ونەر كورسەتكەن ويىنشىلار كوشىن رەسەيلىك مارات سافين (2000، 2001)، شۆەتسيالىق توماس يۋحانسسون (1997، 2005) جانە ۇلىبريتانيالىق ەندي ماررەي (2007، 2008) سىندى ساڭلاقتار باستاپ تۇر. ولار ەكى رەتتەن دارا شىقتى.

كەزىندە بۇل جارىستا قازاقستاندىق تەننيسشىلەردىڭ دە باق جۇلدىزى جانعانىن ايتا كەتسەك، ەش ايىبى جوق دەپ ويلايمىز. ماسەلەن، 2008 جىلى اندرەي گولۋبەۆ اقتىق سايىسقا جولداما الدى. الايدا شەشۋشى سىندا ول ەندي ماررەيگە ەسە جىبەردى. 2010 جىلى ميحايل كۋكۋشكيننىڭ قارقىنىنا ەشكىم شىدامادى. جەرلەسىمىز فينالدا كورت قوجايىنى ميحايل يۋجنىيدى سان سوقتىردى.

قازاقستاننىڭ ەكى-ءۇش تەننيسشىسى 24-31 قازان ارالىعىندا «سيبۋر ارەنادا» وتەتىن ءدۇبىرلى دودادا كۇش سىناسامىز دەپ قۇلشىنىپ وتىر. سەبەبى جۇلدە قورى 1 399 370 اقش دوللارىن قۇرايتىن St. Petersburg Open دوداسىندا تابىستى ونەر كورسەتۋ قاي تەننيسشىگە بولسا دا ۇلكەن مارتەبە.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز