جالعىز جۇلدە ءجاميلانىڭ ەنشىسىندە
ايەلدەر كۇرەسىنەن وتكەن التى سالماق دارەجەسى بويىنشا باسەكەلەردە كىمدەردىڭ جەڭىس تۇعىرىنا كوتەرىلگەنى جايىندا ءبىز بۇعان دەيىن ەگجەي-تەگجەيلى باياندادىق. سكانديناۆيا تۇبەگىنە ساپار شەككەن قازاقستان قۇراما كومانداسى مۇشەلەرى اراسىنان ءجاميلا باقبەرگەنوۆا عانا ەل سەنىمىن اقتادى. قالعاندارى جارتى جولعا دا جەتپەدى. «دجوردال امفي» كەشەنىندە توسەلگەن بوزكىلەمدە فرانتسيا مەن تۇركيا بالۋاندارىنان باسىم تۇسكەن باقبەرگەنوۆا فينالدا جاپونيالىق ماساكو فۋرۋيتيمەن ايقاستى. كۇنشىعىس ەلىنىڭ وكىلى – جاسوسپىرىمدەر مەن جاستار بۋىنى اراسىنداعى دۇنيەجۇزىلىك دودالاردا سان مارتە دارالانىپ, 23 جاسقا دەيىنگى بۇرىمدىلداردىڭ الەم بىرىنشىلىگىندە باس جۇلدەنى جانە ايەلدەر اراسىندا قولا مەدالدى ولجالاعان وتە مىقتى سپورتشى. ونىڭ ۇستىنە, قوس سپورتشىنىڭ جولى وسىعان دەيىن ەكى مارتە قيىسىپ, ەكى رەتىندە ماساكونىڭ مەرەيى ۇستەم بولعان ەكەن.
جاسىراتىنى جوق, سول كەشتە قازاق جانكۇيەرلەرى ءجاميلادان ەرەن ەرلىك كۇتتى. بارلىعىمىز دا تورتكۇل دۇنيەنىڭ تەڭدەسسىزدەرى جينالعان جارىستىڭ التىن تۇعىرىندا الاشتىڭ ارۋى مارقايىپ تۇرسا عوي دەپ ارماندادىق. الايدا ماساكونىڭ مىقتىلىعىن مويىنداماسقا ەش لاج جوق. ول جاقسى ءبىر ءادىس جاساي الماعانىمەن, كوزدەگەن ماقساتىنا قول جەتكىزدى. ناتيجەسىندە, ول جەڭىمپاز اتانسا, ءجاميلا كۇمىس مەدالدى قاناعات تۇتتى.
جالپى ايەلدەر كۇرەسىنەن وتكەن الەم چەمپيوناتتارىندا قازاقستان قۇراماسى 4 كۇمىس جانە 7 قولا مەدالدى يەلەندى. ازىرگە قورجىنىمىزدا بىردە-ءبىر باس جۇلدە جوق. جانە دە كۇمىس مەدالدى مويىندارىندا جارقىراتقان بالۋانداردىڭ بارلىعى دا سىرتتان كەلگەن لەگيونەرلەر ەكەنىن ايتا كەتۋگە ءتيىسپىز. ماسەلەن, 2007 جانە 2010 جىلدارى فينالدا بەلدەسكەن ەلەنا شالىگينا ءبىزدىڭ ەلگە رەسەيدىڭ كەمەروۆو وبلىسىنان قونىس اۋدارىپ كەلدى. 2008 جىلى سول مەجەدەن كورىنگەن جۇلدىز ەشىموۆا – قىرعىزستاننىڭ تالاس ءوڭىرىنىڭ تۋماسى. 2012 جىلى ەكىنشى ورىنعا تابان تىرەگەن گيۋزەل مانيۋروۆا موردوۆيادا دۇنيەگە كەلدى. ال نورۆەگيانىڭ استاناسىنداعى جاعداي مۇلدە وزگەشە. بۇل جەردە ءوزىمىزدىڭ ءتول تۇلەگىمىز, قاراپايىم عانا قازاقتىڭ قىزى فينالدىق سايىستا ونەر كورسەتۋ قۇرمەتىنە بولەندى. بۇيىرعانى – كۇمىس مەدال. ءيا, وسى جەتىستىكتىڭ ءوزى-اق جاميليا باقبەرگەنوۆانىڭ تاريحتا قالاتىنداي ءىس تىندىرۋ ءۇشىن جەتكىلىكتى بولدى.
قىرعىز قىزدارى – ءۇشىنشى ورىندا!
ايەلدەر كۇرەسىنىڭ جالپىكوماندالىق ەسەبىندە جاپونيا قۇراماسى جەكە-دارا كوش باستادى. كۇنشىعىس ەلىنىڭ سۇلۋلارى 4 التىن, 3 كۇمىس جانە 2 قولانى ولجالادى. ەكىنشى ورىندا – اقش. امەريكانىڭ ارۋلارى 2 التىن, 2 كۇمىس جانە 3 قولانى يەلەندى. كوش باسىنداعى قوس كوماندانىڭ وسىنداي تولاعاي تابىسىنا ەشكىم تاڭدانا قويعان جوق. سەبەبى ايتۋلى مەملەكەتتەردە بۇل سپورت ءتۇرىنىڭ دامۋىنا بارلىق جاعداي جاسالعان. سونىڭ ارقاسىندا جاپوندار مەن امەريكالىقتار ۇنەمى ۇزدىكتەر قاتارىنان كورىنۋدە. ال ءۇشىنشى ساتىعا جايعاسقان قىرعىزستان قۇراماسىنان ءدال وسىنداي قارقىن كۇتكەندەر كەمدە-كەم شىعار. وسىعان دەيىنگى الەم چەمپيوناتتارىندا نەبارى قوس جۇلدە العان كورشىلەرىمىز بۇل جولى ءۇش رەت جەڭىس تۇعىرىنا كوتەرىلدى. وسلو تورىندە قىرعىز ەلىنىڭ ءانۇرانى ەكى مارتە شىرقالعاندا «قازاق قىزدارى اراسىنان ايسۇلۋ مەن مەيىرىمدەي ءبىر مىقتىنىڭ شىقپاعانى-اي» دەپ ىشتەي كۇبىرلەگەنىمىزدى نەسىنە جاسىرايىق. وعان ايپەرىنىڭ قولا مەدالىن قوسىڭىز. راسىندا دا, ەسىمدەرى جوعارىدا اتالعان بۇرىمدىلداردىڭ اتتارىنا زاتتارى ساي ەكەن...
ءتورتىنشى ورىنعا مولدوۆا تابان تىرەدى. بۇل ناتيجەنى «سەنساتسيا!» دەپ باعالاساق, ەشكىم ايىپقا بۇيىرا قويماس. ويتكەنى بۇعان دەيىنگى دۇنيەجۇزىلىك دودالاردىڭ بارلىعىنان مولدوۆالىقتاردىڭ قورجىنى بوس بولعان. ال بۇل جولى قارت قۇرلىقتىڭ وڭتۇستىك-شىعىسىندا ورنالاسقان شاعىن عانا ەلدىڭ وكىلدەرى ءبىر التىن مەن ءبىر كۇمىس مەدالدى يەمدەندى. كەرەمەت قوي! ۇزدىك بەستىكتى بولگاريا قورىتىندىلادى. بالقان تۇبەگىنەن كەلگەن بالۋاندار ەلىنە باس جۇلدەنىڭ بىرەۋىن الىپ كەتتى.
ەگەر مەدالدار ساپاسى مەن سانىن ەسەپكە الساق, جالقى كۇمىستى قاناعات تۇتقان قازاقستان قۇراماسى ەستونيامەن بىرگە سەگىزىنشى جانە توعىزىنشى ورىنداردى ءوزارا ءبولىستى. جوعارىدا اتالعان كوماندالاردان بولەك, تەك گەرمانيا
(1 كۇمىس-1 قولا) مەن ءۇندىستان (1 كۇمىس+1 قولا) الدىمىزدى ورادى. ال موڭعوليا
(4 قولا), رەسەي (2 قولا), ۋكراينا, مىسىر, كانادا, پولشا, شۆەتسيا جانە تۇركيا (ارقايسىندا 1 قولادان) كەلەسى ورىندارعا جايعاستى. وسى جارىستا بارلىعى 17 مەملەكەتتىڭ وكىلدەرىنە جۇلدەلى ورىندار بۇيىردى.
«كلاسسيكتەر» دە سەنىم ۇدەسىنەن شىعا المادى
گرەك-ريم كۇرەسى شەبەرلەرى اراسىنداعى جارىستىڭ العاشقى كۇنى ءتورت سالماق دارەجەسى بويىنشا باسەكەلەر ءوتتى. بىراق بۇل جولى دا بالۋاندارىمىز سەنىم ۇدەسىنەن شىعا المادى. قاھارمان قيسمەتوۆ (72 كيلو), تەمىرلان شادۋكاەۆ (77 كيلو) جانە ماقسات ەرەجەپوۆ (82 كيلو) تۇساۋكەسەر كەزدەسۋلەرىندە جەڭىلىستىڭ كەرمەك ءدامىن تاتتى. قاھارمان ەۋروپا بىرىنشىلىگىنىڭ قولا جۇلدەگەرى, ليتۆالىق كريستۋپاس شلەيۆاعا (1:10), تەمىرلان وليمپيادا مەن الەمنىڭ ەكى دۇركىن چەمپيونى رەسەيلىك رومان ۆلاسوۆقا (0:11) جانە ماقسات الەم چەمپيوناتىنىڭ كۇمىس جۇلدەگەرى شۆەتسيالىق الەكس كەسسيديسكە (3:9) ەسە جىبەردى.
قورلان جاقانشا (55 كيلو) العاشقى اينالىمدا ءبىراز جىلدان بەرى برازيليانىڭ تۋى استىندا ونەر كورسەتىپ جۇرگەن قانداسىمىز مارات عاريپوۆپەن كۇش سىناستى. بۇل تارتىس 9:0 ەسەبىمەن قورلاننىڭ پايداسىنان شەشىلدى. بىراق كەلەسى كەزدەسۋدە ەۋروپا چەمپيونى, الەم كۋبوگىنىڭ يەگەرى رەسەيلىك ەمين سەفەرشاەۆ قازاق بالۋانىن (1:5) سان سوقتىرىپ كەتتى. ءسويتىپ, ءبىزدىڭ بالۋاندارعا وزدەرى ەسە جىبەرگەن قارسىلاستارىنىڭ تىلەۋىن تىلەۋدەن باسقا امالى قالمادى. ەگەر ولار اقتىق سىنعا دەيىن القىنباي جەتسە, جەرلەستەرىمىزگە جارىستى ودان ءارى جالعاستىرۋعا مۇمكىندىك تۋىندايدى. بىراق «وزگەگە قاراعان كۇنىڭ قۇرسىن» دەمەكشى, قيسمەتوۆ پەن ەرەجەپوۆتى تىزە بۇكتىرگەن جىگىتتەردىڭ وزدەرى دە ىلە-شالا جەڭىلىستىڭ كەرمەك ءدامىن تاتتى. ال جاقانشا مەن شادۋكاەۆقا جۇبانىش كەزدەسۋلەر وتكىزۋنە جول اشىلدى. الايدا ءبىزدىڭ جىگىتتەر ودان ەشتەڭە وندىرە المادى. ەكەۋى دە ءوز قارسىلاستارىنان ويسىراي ۇتىلدى.
كەلەسى كۇنى جاعدايىمىز ودان دا مۇشكىل بولدى. ايدوس سۇلتانعالي (60 كيلو) ازەربايجاندىق مۇراد مامەدوۆتەن, ەرۇلان ىسقاقوۆ (97 كيلو) گرۋزيالىق گەورگي مەليادان جانە ءالىمحان سىزدىقوۆ نورۆەگيالىق وسكار مارۆيكتەن (130 كيلو) جەڭىلدى. ءبارى دە تۇساۋكەسەر باسەكەدە ءسۇرىندى. ارالارىندا جانىن سالىپ ايقاسقان ەشكىمدى كورمەدىك. ءتىپتى قانداستارىمىزدىڭ بويىنان جەڭىسكە دەگەن قاراپايىم عانا قۇلشىنىستى كورە المادىق.
سوڭعى ءۇمىت سەنبى كۇنى بوز كىلەمگە شىققان ءۇش وعلاندا ەدى. ولاردىڭ بارلىعى دا ءدۇبىرلى دۇرمەكتەردە ابدەن ىسىلعان ساقا سپورتشىلار. ماسەلەن, المات كەبىسباەۆ (67 كيلو) ءتورت بىردەي الەم چەمپيوناتىندا جۇلدەلى ورىنداردى يەلەنىپ, ەكى بىردەي وليمپيا ويىندارىنا قاتىستى. سۇلتان اسەت ۇلى (63 كيلو) مەن نۇرسۇلتان تۇرسىنوۆتىڭ (87 كيلو) ازيا چەمپيونى دەگەن اتاقتارى بار. سونىمەن قاتار نۇرسۇلتان تاياۋدا عانا توكيو وليمپياداسىندا ونەر كورسەتتى.
وسى ۇشتىكتىڭ اراسىنان كەبىسباەۆ سۋىرىلىپ شىقتى. باستاپقى باسەكەدە بەلورۋسسيالىق ماكسيم نەگودانىڭ (9:0) تاس-تالقانىن شىعارسا, ىلە-شالا مارتين تورەسەننىڭ (9:6) ۋىسىنان جەڭىستى ج ۇلىپ اكەتتى. بۇل بالۋانداردىڭ ەكەۋى دە بىلتىر ەۋروپا چەمپيونى اتانعان. جارتىلاي فينالدا المات الەم كۋبوگىنىڭ يەگەرى, قۇرلىق بىرىنشىلىگىنىڭ قولا جۇلدەگەرى رەسەيلىك نازير ابدۋللاەۆپەن ايقاستى. بۇل تارتىس 5:10 ەسەبىمەن قارسىلاسىنىڭ پايداسىنا شەشىلدى. كەشە قازاق جىگىتى قولا مەدال ءۇشىن تالاستى. سونداي-اق سۇلتان جۇبانىش كەزدەسۋلەرىنە قاتىستى. العاشقى اينالىمدا ول گرۋزيالىق لەري ابۋلادزەدەن (4:5) ايلاسىن اسىرا المادى. ەسەسىنە قارسىلاسى فينالعا شىقتى. ال نۇرسۇلتان ۋكراينالىق يۋري شكريۋبانى (10:0) جەڭگەنىمەن, يشتۆان تاكاحستەن (1:3) تىزە بۇكتى. ءسويتىپ, ول كورەرمەندەر قاتارىنا قوسىلدى.
المات ءۇمىتتى اقتادى
بارشا قازاقستاندىق جانكۇيەر الەم چەمپيوناتىنىڭ سوڭعى كۇنىن تاعاتسىزدانا كۇتتى. بار ءۇمىت المات پەن سۇلتاندا ەدى. ەڭ بولماعانادا وسى ەكى بالۋانىمىزدىڭ ءبىرى جۇلدە السا دەپ تىلەدىك. الايدا سۇلتان اسەت ۇلى ءوز مۇمكىندىگىن ۇتىمدى پايدالانا المادى. ول جۇبانىش بەلدەسۋىندە جاپونيالىق كەنسۋكە شيميزۋگە جول بەرىپ, قالىڭ توپتىڭ اراسىندا قالىپ قويدى. ەسەسىنە المات كەبىسباەۆ قولا مەدال ءۇشىن تارتىستا ناعىز ەر جىگىتكە ءتان مىنەز كورسەتىپ, كۇللى الاش جۇرتىنىڭ العىسىنا بولەندى. بەلدەسۋ بارىسىندا تۇركيالىق مۋراد فيركاتتان 0:3 ەسەبىمەن ۇتىلىپ جاتقانىنا قاراماستان, شەشۋشى تۇستا بار كۇشىن سارپ ەتكەن قانداسىمىز ءوزىنىڭ سۇيىكتى «پيتون» ءادىسىن ءساتتى قولدانىپ, كوزدەگەن ماقساتىنا قول جەتكىزدى. ناتيجەسىندە, 7:4 ەسەبىمەن جەڭىسكە جەتكەن المات قولا مەدالدى موينىندا جارقىراتتى.
