باۋىرجان بايبەك تۇركىستاندا سايلاۋالدى باعدارلامانىڭ ىسكە اسىرىلۋىمەن تانىستى

«بىرنەشە جىل بۇرىن ەلباسى، تۇڭعىش پرەزيدەنت نۇرسۇلتان نازارباەۆتىڭ تۇركىستاندى جاڭعىرتۋ تۋرالى قابىلداعان شەشىمى ەلىمىز ءۇشىن عانا ەمەس، بۇكىل تۇركى الەمى ءۇشىن تاريحي وقيعا بولدى. قىسقا مەرزىم ىشىندە رۋحانياتىمىزدىڭ دىڭگەگى بولعان كونە دە قاسيەتتى قالا قايتا تۇلەدى»، دەپ اتاپ ءوتتى باۋىرجان بايبەك.

ونىڭ ايتۋىنشا، مەملەكەت باسشىسى قاسىم-جومارت توقاەۆ جاريا ەتكەن «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاما اياسىندا 2025 جىلعا دەيىن وڭىردە كوپتەگەن الەۋمەتتىك جانە مادەني جوبالاردى جۇزەگە اسىرۋ جوسپارلانۋدا.
 
وبلىستا 5 جىلعا جوسپارلانعان 1956 ءىس-شارانىڭ 20%-تەن استامى ورىندالدى. 364 مىڭ شارشى مەتر تۇرعىن ءۇي، 15 جاڭا مەكتەپ، 8 مادەني نىسان سالىندى. جىل سوڭىنا دەيىن 717 ەلدى مەكەن ساپالى اۋىز سۋعا قول جەتكىزەدى، سونداي-اق ءوڭىردىڭ تاعى 65 مىڭ تۇرعىنى تابيعي گازبەن قامتاماسىز ەتىلەدى.

2025 جىلعا دەيىن وبلىستا 66 دەنساۋلىق ساقتاۋ نىسانىنىڭ قۇرىلىسى جوسپارلانىپ وتىر. بۇگىن باۋىرجان بايبەك پارتيانىڭ سايلاۋالدى باعدارلاماسى اياسىندا تۇركىستاندا سالىنعان قالالىق ورتالىق اۋرۋحانانى ارالادى.

«مەديتسينا قىزمەتكەرلەرىمەن بىرگە دەنساۋلىق ساقتاۋ سالاسىنداعى وزەكتى ماسەلەلەر، ونىڭ ىشىندە وڭىرلەردە بىلىكتى مامانداردىڭ جەتىسپەۋشىلىگى ماسەلەسىن تالقىلادىق. بۇل ماسەلەنى شەشۋ ءۇشىن پارتيا ناقتى ماقساتتار قويادى. اتاپ ايتقاندا، بالالار دارىگەرلەرىن قوسا العاندا، ارناۋلى سالاعا ماماندانعان مەديتسينا قىزمەتكەرلەرىن دايارلاۋعا ارنالعان گرانتتار سانى ارتادى. 2023 جىلعا قاراي دارىگەرلەردىڭ جالاقىسى 2،5 ەسەگە كوبەيىپ، كەمىندە 550 مىڭ تەڭگەنى، ورتا مەديتسينالىق قىزمەتكەرلەردىڭ جالاقىسى كەمىندە 190 مىڭ تەڭگەنى قۇرايدى. تىرەك جانە سەرىكتەس اۋىلداردا فەلدشەرلىك-اكۋشەرلىك پۋنكتتەر مەن دارىگەرلىك امبۋلاتوريالار اشىلىپ، جاڭعىرتىلادى. جالپى، بارلىق كوزدەردەن دەنساۋلىق ساقتاۋدى قارجىلاندىرۋ كولەمى ءجىو-ءنىڭ 5%-تىنە دەيىن جەتكىزىلەتىن بولادى»، دەپ جازدى ول Facebook-تەگى پاراقشاسىندا.

سول كۇنى باۋىرجان بايبەك گولليۆۋدتىق Disney كينوكومپانياسىنىڭ مەملەكەتتىك تىلگە دۋبلياجدالعان «جان» ءمۋلتفيلمىنىڭ كوپبالالى جانە از قامتىلعان وتباسى بالالارىنا ارنالعان قايىرىمدىلىق كورسەتىلىمىنە باردى. بۇل – «بولاشاق» باعدارلاماسى تۇلەكتەرىنىڭ جوعارى حالىقارالىق ستاندارتتار بويىنشا اعىلشىن تىلىنەن قازاق تىلىنە دۋبلياجداعان 37 شەتەلدىك كينوكارتيناسىنىڭ ءبىرى.

Nur Otan پارتياسى توراعاسىنىڭ ءبىرىنشى ورىنباسارى اتاپ وتكەندەي، «باقىتتى وتباسى» جوباسى اياسىندا پارتيا دارىندى بالالاردى انىقتاۋ جانە قولداۋ جۇمىستارىن كۇشەيتەدى، سپورتتىق سەكتسيالار مەن بالالار ۇيىرمەلەرى اشىلادى. ومىرلىك قيىن جاعدايعا تاپ بولعان وتباسىلارعا كومەك كورسەتۋ ءۇشىن بۇكىل ەل بويىنشا 234 ارنايى ورتالىق اشىلادى.

تۇركىستان وبلىسىنا ساپار بارىسىندا باۋىرجان بايبەك Jastar-Otanga! حالىقارالىق جاستار فورۋمىنىڭ قاتىسۋشىلارىمەن دە كەزدەستى.