قازاقستان قۇراما كومانداسى مۇشەلەرى اراسىنان ايشا ءۋاليشان (55 كيلو), اياۋلىم قاسىموۆا (62 كيلو) جانە ەلميرا سىزدىقوۆا (76 كيلو) ء«ا» دەگەننەن ءسۇرىندى. ايشا ۇندىستاندىق پينكي پينكيدەن جەڭىلدى – 1:4. اياۋلىم ۋكراينالىق يلونا پروكوپوۆيۋككە جول بەردى – 1:12. ەلميرا سىزدىقوۆانىڭ مىسىرلىق سامار امەر يبراگيم حامزاعا ءالى جەتپەدى – 2:3. ودان كەيىن اسىلزات ساعىمباي (53 كيلو) مولدوۆالىق يۋليا لەوردان تازا ۇتىلدى. اينا تەمىرتاسوۆا (65 كيلو) رۋمىنيالىق كريستينا تۋندە ينگزەدەن باسىم تۇسكەنىمەن, شيرەك فينالدا جاپونيالىق ميرا موريكاۆانىڭ وسال تۇسىن تابا المادى – 2:6. دەسەك تە اسىلزات پەن اينانىڭ قارسىلاستارى اقتىق سىنعا دەيىن القىنباي جەتىپ, ءبىزدىڭ قىزدار جۇبانىش بەلدەسۋلەرىندە باق سىناۋ مۇمكىندىگىن ساقتاپ قالدى. بىراق ودان ارىگە ولاردىڭ ءالى جەتپەدى.
ەسەسىنە ءبىزدى ءجاميلا باقبەرگەنوۆا قۋانتتى. 72 كيلو سالماقتا كۇرەسكەن قىزىمىز شيرەك فينالدا فرانتسيالىق ۆانەسسا ۆەساننان 2:10 ەسەبىمەن جەڭىلىپ جاتسا دا, جىگەرى جاسىعان جوق. شەشۋشى تۇستا شيرەك قيمىلداعان ول تارازى باسىن تەڭەستىرىپ قانا قويماي, قارسىلاسىنىڭ ۋىسىنان جەڭىستى ج ۇلىپ اكەتتى. جارتىلاي فينالدا ءجاميلا تۇركيالىق بۋسا كاۆۋسوگلۋدىڭ تاس-تالقانىن شىعاردى – 13:2. وسىلايشا, باس جۇلدە ءۇشىن تالاسۋ مۇمكىندىگىنە يە بولعان قازاق قىزى جاپونيالىق ماساكو فۋرۋچيمەن كۇش سىناستى. سونداي-اق كەشە نالۋفار رايموۆا (57 كيلو) مەن ديانا كايۋموۆا (59 كيلو) جۇبانىش باسەكەلەرىندە باق سىنادى.
وسى كۇنگە دەيىن التى سالماق دارەجەسى بويىنشا جەڭىس تۇعىرىنا كوتەرىلگەن بالۋانداردىڭ ەسىمدەرى بەلگىلى. ازىرگە جاپونيا قۇراماسىنىڭ قارقىنى وتە كۇشتى. كۇنشىعىس ەلىنىڭ وكىلدەرى ءۇش سالماقتا توپ جارىپ, ودان بولەك, ءبىر كۇمىس پەن ءبىر قولا مەدالدى ولجالادى. ەكىنشى ورىندا – اقش. الىستاعى امەريكادان كەلگەن قىزداردىڭ بىرەۋى الدىنا جان سالماسا, ەكەۋى فينالدا ۇتىلدى. تاعى ەكەۋى ءۇشىنشى ساتىعا تابان تىرەدى. ءۇشىنشى ورىندى مولدوۆا ەنشىلەۋدە. ولار ءبىر التىن مەن ءبىر كۇمىستى يەمدەندى. قورجىنىندا ءبىر التىن مەن ءبىر قولاسى بار قىرعىزستان ءتورتىنشى ساتىعا تۇراقتاۋدا. بەسىنشى جانە التىنشى ورىنداردى گەرمانيا مەن ەستونيا ەنشىلەۋدە. بۇل ەلدىڭ وكىلدەرى فينالدا عانا ءسۇرىندى.
جوعارىدا اتالعان كوماندالار اراسىندا قىرعىزستان قۇراماسىنىڭ تابىسىنا تاڭدانباۋ ءارى تامسانباۋ مۇمكىن ەمەس. كەشە عانا وسى ەلدىڭ ەركىن كۇرەس شەبەرلەرى قوس جۇلدەنى يەلەنىپ, جالپى ەسەپتە ۇزدىك التىلىقتىڭ قاتارىنان كورىنسە, ەندى بۇگىن قىزدارى تورتكۇل دۇنيە جانكۇيەرلەرىنە تاڭداي قاققىزىپ وتىر. ەگەر الەم چەمپيوناتىنىڭ تاريحىنا ۇڭىلسەك, ايەلدەر كۇرەسىنەن ولار كۇنى بۇگىنگە دەيىن ءبىر التىن مەن ءبىر قولاعا عانا قول جەتكىزگەن ەكەن. ەكەۋى دە – ايسۇلۋ تىنىباەۆانىڭ ەنشىسىندە. قىرعىزدىڭ باعىنا تۋعان قىز 2017 جىلى پاريجدە ءۇشىنشى ورىنعا تابان تىرەسە, 2019 جىلى نۇر-سۇلتاندا التىننان القا تاقتى.
ال وسلودا قىرعىزستان قۇراماسى ءۇش جۇلدەنى يەلەنىپ, وزىق بەس كوماندانىڭ قاتارىنا ەركىن قوسىلدى. ايسۇلۋ قاتارىنان ەكىنشى مارتە الەم چەمپيونى اتانسا, ايپەرى مەدەتقىزى قولاعا قول سوزدى. ال كەشە تۇندە مەەريم جۇمانازاروۆا اقتىق سىندا ايقاستى. ەگەر ول التىن تۇعىرعا كوتەرىلىپ جاتسا, وعان ءبىز ەش تاڭدانبايمىز. ويتكەنى جۇمانازاروۆانىڭ ورەلى ونەرىن ءبىز ءوز كوزىمىزبەن كوردىك. جانكەشتىلىگى مەن تاباندىلىعىنا سۇيسىندىك. جەڭىسكە دەگەن قۇشتارلىعىنا ءتانتى بولدىق. سوندىقتان دا قىرعىز قىزىنىڭ بويىندا چەمپيون اتانۋعا قاجەتتى قاسيەتتىڭ بارلىعى دا بار دەپ نىق سەنىممەن ايتا الامىز. ءبارى ءبىز ويلاعانداي بولسا, اتالعان مەملەكەتتىڭ ايەلدەر قۇراماسى كوماندالىق سايىستا وزىق ۇشتىكتىڭ قاتارىنا قوسىلاتىنى ايدان انىق. ءتىپتى جاپون بالۋانىنان جەڭىلىپ قالعان جاعدايدىڭ وزىندە مەەريمگە ەشكىم دە وكپە ايتا المايدى. بيىل توكيو وليمپياداسىندا قولا مەدالدى موينىندا جارقىراتقان سپورتشى ءۇشىن الەمدىك دودانىڭ كۇمىس مەدالى دە از ولجا ەمەس.
