كۇرەس • 08 قازان، 2021

جاقانشا مەن شادۋكاەۆ قولا جۇلدەدەن ءالى دە ۇمىتتەرىن ۇزگەن جوق

36 رەت كورسەتىلدى

سكانديناۆيا تۇبەگىندە ءوتىپ جاتقان الەم چەمپيوناتىندا گرەك-ريم كۇرەسى شەبەرلەرى كەشە وزدەرىنىڭ العاشقى باسەكەلەرىن وتكىزدى. ءتورت سالماق دارەجەسى بويىنشا وتكەن سايىستار اسا شيەلەنىستى تارتىسقا تولى بولدى.  

گرەك-ريم كۇرەسى شەبەرلەرى اراسىنداعى جارىستىڭ العاشقى كۇنى ءتورت سالماق دارەجەسى بويىنشا باسەكەلەر ءوتتى. بىراق بۇل جولى دا بالۋاندارىمىز سەنىم ۇدەسىنەن شىعا المادى. قاھارمان قيسمەتوۆ (72 كيلو)، تەمىرلان شادۋكاەۆ (77 كيلو) جانە ماقسات ەرەجەپوۆ (82 كيلو) تۇساۋكەسەر كەزدەسۋلەرىندە جەڭىلىستىڭ كەرمەك ءدامىن تاتتى. قاھارمان ەۋروپا بىرىنشىلىگىنىڭ قولا جۇلدەگەرى، ليتۆالىق كريستۋپاس شلەيۆاعا (1:10)، تەمىرلان وليمپيادا مەن الەمنىڭ ەكى دۇركىن چەمپيونى، رەسەيلىك رومان ۆلاسوۆقا (0:11) جانە ماقسات الەم چەمپيوناتىنىڭ كۇمىس جۇلدەگەرى، شۆەتسيالىق الەكس كەسسيديسكە (3:9) ەسە جىبەردى. تابلوداعى ەسەپكە قارساڭىزدار، جەرلەستەرىمىزدىڭ ەشقايسى قارسىلاستارىنا جارىتىپ قارسىلىق كورسەتە الماعانىن اڭعارۋ قيىن ەمەس.

قورلان جاقانشا (55 كيلو) العاشقى اينالىمدا ءبىراز جىلدان بەرى برازيليانىڭ تۋى استىندا ونەر كورسەتىپ جۇرگەن قانداسىمىز مارات عاريپوۆپەن كۇش سىناستى. بۇل تارتىس 9:0 ەسەبىمەن قورلاننىڭ پايداسىنان شەشىلدى. بىراق كەلەسى كەزدەسۋدە ەۋروپا چەمپيونى، الەم كۋبوگىنىڭ يەگەرى، رەسەيلىك ەمين سەفەرشاەۆ قازاق بالۋانىنا سان سوقتىرىپ كەتتى. 

ءسويتىپ، ءبىزدىڭ بالۋاندارعا وزدەرى ەسە جىبەرگەن قارسىلاستارىنىڭ تىلەۋىن تىلەۋدەن باسقا امالى قالمادى. ەگەر ولار اقتىق سىنعا دەيىن القىنباي جەتسە، جەرلەستەرىمىزگە جارىستى ودان ءارى جالعاستىرۋعا مۇمكىندىك تۋىندايدى. ياعني، ولار جۇبانىش باسەكەسىنە قاتىسۋ قۇقىعىنا يە بولادى. ول جەردە سۇرىنبەسە، قولا مەدالعا دا قول جەتكىزۋگە بولادى. بىراق «وزگەگە قاراعان كۇنىڭ قۇرسىن» دەمەكشى، قيسمەتوۆ پەن ەرەجەپوۆكە تىزە بۇكتىرگەن جىگىتتەردىڭ وزدەرى دە كوپ ۇزاماي جەڭىلىستىڭ كەرمەك ءدامىن تاتتى. ەندىگى ءۇمىت – جاقانشا مەن شادۋكاەۆتا ەدى. ويتكەنى، ولاردىڭ الدىن وراعان رەسەيدىڭ قوس ساڭلاعى فينالعا شىقتى.

سوڭعى جاڭالىقتار

ۇقساس جاڭالىقتار