جاميليا باقبەرگەنوۆا الەم چەمپيوناتىنىڭ كۇمىس جۇلدەگەرى اتاندى

ايەلدەر كۇرەسىنەن وتكەن التى سالماق دارەجەسى بويىنشا باسەكەلەردە كىمدەردىڭ جەڭىس تۇعىرىنا كوتەرىلگەنى جايىندا ءبىز بۇعان دەيىن ەگجەي-تەگجەيلى باياندادىق. سكانديناۆيا تۇبەگىنە ساپار شەككەن قازاقستان قۇراما كومانداسى مۇشەلەرى اراسىنان جاميليا باقبەرگەنوۆا عانا ەل سەنىمىن اقتادى. قالعاندارى جارتى جولعا دا جەتپەدى. «دجوردال امفي» كەشەنىندە توسەلگەن بوز كىلەمدە فرانتسيا مەن تۇركيا بالۋاندارىنان باسىم تۇسكەن باقبەرگەنوۆا فينالدا جاپونيالىق ماساكو فۋرۋيچيمەن ايقاستى. كۇن شىعىس ەلىنىڭ وكىلى جاسوسپىرىمدەر مەن جاستار بۋىنى اراسىنداعى دۇنيەجۇزىلىك دودالاردا سان مارتە دارالانىپ، 23 جاسقا دەيىنگى بۇرىمدىلداردىڭ الەم بىرىنشىلىگىندە باس جۇلدەنى ولجالاعان وتە مىقتى سپورتشى. ونىڭ ۇستىنە، قوس سپورتشىنىڭ جولى وسىعان دەيىن ءۇش مارتە قيىسىپ، ەكى رەتىندە ماساكونىڭ مەرەيى ۇستەم بولعان ەكەن.

جاسىراتىنى جوق، سول كەشتە قازاق جانۇيەرلەرى جاميليادان ەرەن ەرلىك كۇتتى. بارلىعىمىز دا تورتكۇل دۇنيەنىڭ تەڭدەسسىزدەرى جينالعان جارىستىڭ التىن تۇعىرىندا الاشتىڭ ارۋى مارقايىپ تۇرسا عوي دەپ ارماندادىق. الايدا ماساكونىڭ مىقتىلىعىن مويىنداماسقا ەش لاج جوق. ول جاقسى ءبىر ءادىس جاساي الماعانىمەن، كوزدەگەن ماقساتىنا قول جەتكىزدى. ءوزىنىڭ جىلدامدىعى مەن ەپتىلىگىنىڭ ارقاسىندا قازاق قىزىنىڭ ارتىنا شىققانى ءۇشىن ەكى ۇپايدى ەنشىلەدى. ودان كەيىن باقبەرگەنوۆانى كىلەمنىڭ شەتىنە يتەرىپ شىعارىپ، تاعى دا ۇپايعا يەلىك ەتتى. وتە ساۋاتتى قورعانعان فۋرۋيچي باسەكەنى سوڭىنا دەيىن سول باسىمدىعىن ساقتاپ قالدى. ناتيجەسىندە ول جەڭىمپاز اتانسا، جاميليا كۇمىس مەدالدى قاناعات تۇتتى. 

جالپى ايەلدەر كۇرەسىنەن وتكەن الەم چەمپيوناتتارىندا قازاقستان قۇراماسى 4 كۇمىس جانە 7 قولا مەدالدى يەلەندى. ازىرگە قورجىنىمىزدا بىردە-ءبىر باس جۇلدە جوق. جانە دە كۇمىس مەدالدى مويىندارىندا جارقىراتقان بالۋانداردىڭ بارلىعى دا سىرتتان كەلگەن لەگيونەرلەر ەكەنىن ايتا كەتۋگە ءتيىسپىز. ماسەلەن، 2007 جانە 2010 جىلدارى اقتىق سىندا بەلدەسكەن ەلەنا شالىگينا ءبىزدىڭ ەلگە رەسەيدىڭ كەمەروۆو وبلىسىنان قونىس اۋدارىپ كەلدى. 2008 جىلى سول مەجەدەن كورىنگەن جۇلدىز ەشىموۆا قىرعىزستاننىڭ تالاس ءوڭىرىنىڭ تۋماسى. 2012 جىلى ەكىنشى ورىنعا تابان تىرەگەن گيۋزەل مانيۋروۆا موردوۆيادا دۇنيەگە كەلدى. ال نورۆەگيانىڭ استاناسىنداعى جاعداي مۇلدە وزگەشە. بۇل جەردە ءوزىمىزدىڭ ءتول تۇلەگىمىز، قاراپايىم عانا قازاقتىڭ قىزى فينالدىق سايىستا ونەر كورسەتۋ قۇرمەتىنە بولەندى. بۇيىرعانى – كۇمىس مەدال. ءيا، وسى جەتىستىكتىڭ ءوزى-اق جاميليا باقبەرگەنوۆانىڭ تاريحتا قالاتىنداي ءىس تىندىرۋ ءۇشىن جەتكىلىكتى بولدى.

ايەلدەر كۇرەسىنىڭ جالپى كوماندالىق ەسەبىندە جاپونيا قۇراماسى كوش باستادى. كۇن شىعىس ەلىنىڭ سۇلۋلارى 4 التىن، 3 كۇمىس جانە 2 قولانى ولجالادى. ەكىنشى ورىندا – اقش. امەريكانىڭ ارۋلارى 2 التىن، 2 كۇمىس جانە 3 قولانى يەلەندى. كوش باسىنداعى قوس كوماندانىڭ وسىنداي تولاعاي تابىسىنا ەشكىم تاڭدانا قويعان جوق. سەبەبى، ايتۋلى مەملەكەتتەردە بۇل سپورت ءتۇرىنىڭ دامۋىنا بارلىق جاعداي جاسالعان. سونىڭ ارقاسىندا جاپوندار مەن امەريكالىقتار ۇنەمى ۇزدىكتەر قاتارىنان كورىنۋدە.

ءۇشىنشى ساتىعا قىرعىزستان قۇراماسى جايعاستى. وسىعان دەيىنگى الەم چەمپيوناتتارىندا نەبارى قوس جۇلدە العان كورشىلەرىمىز بۇل جولى ءۇش رەت جەڭىس تۇعىرىنا كوتەرىلىپ، جەر جاھاننىڭ جانكۇيەرلەرىن تاماساندىردى. وسلو تورىندە قىرعىز ەلىنىڭ ءانۇرانى ەكى مارتە شىرقالعاندا «قازاق قىزدارى اراسىنان ايسۇلۋ مەن مەيىرىمدەي ءبىر مىقتىنىڭ شىقپاعانى-اي» دەپ ىشتەي كۇبىرلەگەنىمىزدى نەسىنە جاسىرايىق. وعان ايپەرىنىڭ قولا مەدالىن قوسىڭىز. راسىندا دا، بۇل بۇرىمدىلداردىڭ اتتارىنا زاتتارى ساي ەكەن...

ءتورتىنشى ورىنعا مولدوۆا تابان تىرەدى. بۇل ناتيجەنى «سەنساتسيا!» دەپ باعالاساق، ەشكىم ايىپقا بۇيىرا قويماس. ويتكەنى، بۇعان دەيىنگى دۇنيەجۇزىلىك دودالاردىڭ بارلىعىنان مولدوۆالىقتاردىڭ قورجىنى بوس قايتىپ جۇرگەن. ال بۇل جولى قارت قۇرلىقتىڭ وڭتۇستىك-شىعىسىندا ورنالاسقان شاعىن عانا ەلدىڭ وكىلدەرى ءبىر التىن مەن ءبىر كۇمىستى مەدالدى يەمدەندى. كەرەمەت قوي! ۇزدىك بەستىكتى بولگاريا قورىتىندىلادى. بالكان تۇبەگىنەن كەلگەن بالۋاندار ەلىنە باس جۇلدەنىڭ بىرەۋىن ەنشىلەپ قاتتى.

ەگەر مەدالدار ساپاسى مەن سانىن ەسەپكە الساق، جالقى كۇمىستى قاناعات تۇتقان قازاقستان قۇراماسى ەستونيامەن بىرگە سەگىزىنشى جانە توعىزىنشى ورىنداردى ءوزارا ءبولىستى. جوعارىدا اتالعان كوماندالاردان بولەك، تەك گەرمانيا (1 كۇمىس-1 قولا) مەن ءۇندىستان (1 كۇمىس+1 قولا) عانا الدىمىزدى ورادى. ال موڭعوليا (4 قولا)، رەسەي (2 قولا)، ۋكراينا، مىسىر، كانادا، پولشا، شۆەتسيا جانە تۇركيا (ارقايسىندا 1 قولادان). وسى جارىستا بارلىعى 17 مەملەكەتتىڭ وكىلدەرىنە جۇلدەلى ورىندار بۇيىردى.