بۇل «قازاقتەلەكوم» مەن استانالىق اكىمدىكتىڭ تسيفرلاندىرۋ باعىتىنداعى العاشقى بىرلەسكەن تاجىريبەسى ەمەس. كومپانيانىڭ ءباسپاسوز قىزمەتى تاراتقان مالىمەتكە سۇيەنسەك, بىلتىر ۇلتتىق بايلانىس وپەراتورى باس قالاداعى دەنساۋلىق ساقتاۋ ۇيىمدارىندا ورتالىقتاندىرىلعان بەينەباقىلاۋ جۇيەسىن ەنگىزۋدى باستاپ, بۇل قوعامدىق قاۋىپسىزدىكتى قامتاماسىز ەتىپ قانا قويماي قالاداعى اۋرۋحانالار مەن ەمحانالاردا كورسەتىلەتىن قىزمەتتەردىڭ ساپاسىن جاقسارتۋعا سەپتەستى.
جاسىراتىنى جوق, پاندەميا باستالعالى بەرى ەلىمىزدە مەديتسينالىق كومەككە دەر كەزىندە قول جەتكىزۋ وزەكتى ماسەلەگە اينالدى. سونىمەن قاتار قوڭىراۋ اعىنى مەن بەلگىلى ءبىر اۋرۋحانانىڭ جۇكتەمەسىن, ونداعى بوس ورىنداردىڭ سانىن ءبىلۋ قيىنعا سوقتى. ءدال وسى ماسەلەلەردى شەشۋ ءۇشىن تسيفرلاندىرۋ, ياعني زاماناۋي تالداۋ مەن جاساندى ينتەللەكت جۇيەسىن ەنگىزۋ قاجەتتىلىگى تۋىندادى.
«قازىر كومپانيادا Smart City جەلىسىن باسقارۋدىڭ كوپتەگەن تەتىگى قاراستىرىلعان. ونىڭ ىشىنە IoT LPWAN جەلىسى, دايىن بۇلتتى بەينەباقىلاۋ ينفراقۇرىلىمى, Big Data, COVID كارانتيندىك شارالارىن ساقتاۋ جانە باقىلاۋ قۇرالدارى, GPS مونيتورينگى, بەينەكونفەرەنتسيا, تەلەمەديتسينا جانە تاعى باسقالارى كىرەدى. ءبىز ۇسىنعان شەشىمدەر باسىمدىقتاردى دۇرىس انىقتاۋعا جانە ۇسىنىلاتىن قالالىق قىزمەتتەردىڭ ساپاسىن جاقسارتۋعا جانە ەلوردا تۇرعىندارىنىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى. ال جەرگىلىكتى باسقارۋ ورگاندارىنا بۇل بىرنەشە مۇمكىندىككە جول اشادى», دەدى ق.ەسەكەەۆ.
ءسوز ورايى كەلگەندە ايتا كەتەيىك, اقمولا وبلىسىنداعى اقكولدە Smart City جوباسى بىرنەشە جىل بويى تابىستى ىسكە اسىرىلىپ جاتىر. تۇتاستاي ايتقاندا, اقكول قازاقستاندا ءبىرىنشى بولىپ Smart City تەحنولوگيالارىن ەنگىزۋگە مۇمكىندىك الدى. Smart تەحنولوگيالاردى ەنگىزۋ قالالىق قىزمەتتەردىڭ جۇمىسىن وڭتايلاندىرۋعا جانە تۇرعىنداردىڭ ءومىر ءسۇرۋ دەڭگەيىن جاقسارتۋعا سەپتىگىن تيگىزۋدە. ماسەلەن, كوممۋنالدىق قىزمەتتەردىڭ كورسەتكىشتەرىن جيناۋ ءۇشىن پاتەرلەردى ارالاپ ءجۇرۋدىڭ قاجەتى جوق, دەرەكتەر اۆتوماتتى تۇردە جيناقتالادى. تۇرعىندار قولجەتىمدى بەينەباقىلاۋدى ىسكە قوسىپ, ونلاين رەجىمدە بەينەكامەرالارداعى اقپاراتقا قول جەتكىزە الادى. سونىمەن قاتار «اقىلدى قالا» شەشىمدەرى ماڭعىستاۋ وبلىسىنىڭ جاڭاوزەن قالاسىندا جانە تۇركىستان قالاسىندا قاناتقاقتى جوبا رەتىندە ەنگىزىلىپ جاتىر.
