«قازاقستان» ورتالىق كونتسەرت زالىنىڭ ساحناسىندا وتەتىن اۋقىمدى جوبادا بيىل قاشىقتان وتكەن ىرىكتەۋ كەزەڭنىڭ 17 جەڭىمپازى ونەر كورسەتەدى. ىرىكتەۋگە ءار وڭىردەن 8 بەن 12 جاس ارالىعىنداعى 5 583 بالا قاتىسقان بولاتىن. بۇگىنگى كەش «شەتەلدىك جانە وتاندىق حيت اندەرگە» ارنالىپ, جاس انشىلەر تانىمال تۋىندىلاردى يليا باشكاتوۆتىڭ جەتەكشىلىگىمەن ورىندايدى. بالالاردىڭ ونەرىن ءالي وقاپوۆ, ايگەرىم راقىشەۆا (Ayree), ەردەن جاقسىباەۆ, بەيبىت كوشقاليەۆ جانە ديانا سنەگينا سىندى وتاندىق تانىمال انشىلەر باعالاماق. جانكۇيەرلەر ءوز داۋىسىن www.baladauysy.kz سايتىنا كىرىپ, تاڭداعان ورىنداۋشىعا بەرە الادى.
سونداي-اق VI ماۋسىم اياسىندا جانە تاۋەلسىزدىكتىڭ 30 جىلدىعىنا وراي «بالا داۋىسى – ءان بۇلاعى» اتتى بالالار اندەرى جيناعىنىڭ تۇساۋكەسەرى ءوتتى.
2016 جىلدان باستاپ «بالا داۋىسى» بايقاۋى قازاقستاننىڭ مادەني ومىرىندەگى ەڭ ءىرى وقيعالاردىڭ ءبىرى بولىپ تابىلادى. جوبا مۋزىكالىق دارىندى بالالاردى انىقتاپ, وعان قولداۋ كورسەتۋدى, جاڭا بالالار اندەرى ارقىلى بالالار مۋزىكالىق شىعارماشىلىعىن جان-جاقتى ناسيحاتتاۋ جانە دامىتۋدى ماقسات ەتەدى. سوندىقتان جيناق بالالار رەپەرتۋارىن كەڭەيتۋگە, بايىتۋعا ءوز ۇلەسىن قوسادى.
بۇل جاڭا اندەر جيناعىنا ەلىمىزدىڭ وڭىرلەرىنەن 17 كومپوزيتور مەن 4 اقىننىڭ شىعارمالارى ەنگەن. جيناقتا ماتىندەر مەن مۋزىكالىق ماتەريالدار بار, ال ديسكىدە اندەردىڭ ەكى ءتۇرلى نۇسقاسى بەرىلگەن (داۋىسى بار جانە داۋىسى جوق فونوگراما). ايتا كەتەيىك, 2016 جىلدان باستاپ ۇلتتىق «بالا داۋىسى» جوباسى اياسىندا 79 جاڭا بالالار ءانى جازىلعان. ۇيىمداستىرۋشىلاردىڭ ايتۋىنشا, جيناق بالاباقشالار مەن مەكەپتەرگە تەگىن تاراتىلادى.
– بۇل جيناق تالانتتى بالالار ءۇشىن جاقسى مۇمكىندىك بولماق. جاڭا اندەردى ورىنداي وتىرىپ, ولاردىڭ وتانعا دەگەن ماحابباتى مەن بولاشاعىنا دەگەن سەنىمى ارتا تۇسەدى, – دەيدى «جاندانۋ الەمى» قورىنىڭ باسقارما توراعاسى مۇرات يساحانوۆ.
جيناققا ەنگەن ءان اۆتورلارى – كومپوزيتورلار بالنۇر قىدىربەك, بەكجىگىت سەردالى, ەركىن نۇرىمبەتوۆ, كومەك ىبراي ۇلى, بەرىك ورازالين, ارسەن بەيسەنوۆ, مارات سۋتيۋشەۆ, سۆەتلانا ستەپۋرينا, جاندوس وماروۆ, مارات جاقىپوۆ, بولات قوحامانوۆ, مايرا ابلاي, ءالي ەرمەكباەۆ, ەرجان قورعانبەك, ءاديلحان ادىرباەۆ, ساۋكەن ءالىش, ايسۇلۋ ءتاني ارنايى العىس حاتتارمەن ماراپاتتالدى.
– اۆتورعا ءوز شىعارماسىنىڭ كەڭ تارالعانىنان ارتىق باقىت بار ما! سونداي-اق وسى جوباعا اتسالىسقان بارلىق كومپوزيتوردىڭ اتىنان «جاندانۋ الەمى» قورىنىڭ ۇيىمداستىرۋشىلارىنا العىس ايتامىن. ءبىز ءوز اندەرىمىزدىڭ جۇرەكتەن جۇرەككە جەتەتىنىنە سەنىمدىمىز. جيناقتاعى ءار ءان – ءبىزدىڭ ەلىمىزدەگى ءار وتباسىنا جولداعان ىستىق سالەمىمىز, اق نيەتىمىز, – دەيدى كومپوزيتور ايسۇلۋ ءتاني.
اقىندار اراسانباي ەستەنوۆ, ەرنۇر سەيداحمەتوۆ, مارات ادىباەۆ, المات ءيسادىل دە ماراپاتتالىپ, جيناققا يە بولدى.
وسى ماۋسىمنىڭ جەڭىمپازدارىن 9 قازاندا بىلەتىن بولامىز. ەل تاۋەلسىزدىگىنىڭ 30 جىلدىعىنا جانە «بالا داۋىسى» جوباسىنىڭ 5 جىلدىعىنا ارنالعان «تۋعان كۇنىڭمەن, «بالا داۋىسى!» اتتى گالا-كونتسەرتتە ونەرپازدار الدىڭعى جىلداردىڭ فيناليستەرىمەن بىرگە تانىمال اندەردى ورىندايدى. ايتا كەتەيىك, فينالعا قاتىساتىن ءاربىر جاس انشىگە باعالى سىيلىقتارمەن قاتار ارنايى مۇسىنشە (ستاتۋەتكا) تابىستالادى. ال «بالا داۋىسى» بايقاۋىنىڭ گران-پري يەگەرىنە ۇلتتىق ونەر ۋنيۆەرسيتەتىندە وقۋ گرانتى بەرىلەدى.
