تاراپتار قازاقستاننىڭ ترانزيتتىك الەۋەتىن ارتتىرۋ جانە ونى جاھاندىق كولىك دالىزدەرىنە ودان ءارى ينتەگراتسيالاۋ, ساۋدا راسىمدەرىن جەڭىلدەتۋ جونىندەگى حالىقارالىق ستاندارتتاردى ىسكە اسىرۋ, حالىقارالىق جەتكىزىلىم تىزبەگىنىڭ قاۋىپسىزدىگىن قامتاماسىز ەتۋ جانە كەدەندىك تولەمدەر مەن سالىقتاردىڭ جينالۋىن جاقسارتۋ ماسەلەلەرىن تالقىلادى.
كەلىسسوز بارىسىندا ترانزيتتىك كەدەرگىلەردى جويۋدا قر-نىڭ دكۇ-مەن ىنتىماقتاستىعىن كەڭەيتۋگە, ەلەكتروندى ساۋدانى دامىتۋعا, شەتەلدەرمەن كەدەندىك اقپارات الماسۋ پروتسەستەرىن ستاندارتتاۋعا جانە ەكسپورتتىق-يمپورتتىق وپەراتسيالاردى ودان ءارى تسيفرلاندىرۋعا ەرەكشە نازار اۋدارىلدى.
ۇكىمەت باسشىسى قر كولىك الەۋەتىن ارتتىرۋ ماقساتىندا دكۇ ستاندارتتارىنا سايكەس قازاقستان-قىتاي شەكاراسىندا جاڭا «نۇر جولى» وتكىزۋ بەكەتى سالىنىپ, قازاقستاننىڭ وزبەكستانمەن شەكاراسىندا «ب. قونىسباەۆ», قازاقستان-قىرعىز شەكاراسىنداعى «قورداي» وتكىزۋ بەكەتتەرى جاڭعىرتىلعانىن اتاپ ءوتتى. قوسىمشا 2024 جىلعا دەيىن 9 اۆتوموبيل جانە 1 تەمىرجول وتكىزۋ بەكەتىن جاڭعىرتۋ جوسپارلانعان. وتكىزۋ بەكەتتەرىن جاڭعىرتۋ شەكارادان ءوتۋ ۋاقىتىن قىسقارتىپ, ولاردىڭ وتكىزۋ مۇمكىندىگىن 8 ەسەگە دەيىن ۇلعايتۋعا مۇمكىندىك بەرەدى.
ك. ميكۋريا قازاقستاندا جۇرگىزىلىپ جاتقان كەدەن جانە سالىق سالالارىنداعى رەفورمالارعا, شەكارالىق وتكىزۋ بەكەتتەرىن جاڭعىرتۋ, ۇلتتىق تاۋار وتكىزۋ جۇيەسىن قالىپتاستىرۋ جانە قر ترانسشەكارالىق ساۋدا ينفراقۇرىلىمىن دامىتۋ بويىنشا شارالارعا جوعارى باعا بەردى. سوڭعى ءۇش جىلدا دكۇ قازاقستانعا ەكسپورتتىق-يمپورتتىق وپەراتسيالار سالاسىنداعى نەگىزگى حالىقارالىق كونۆەنتسيالاردى يمپلەمەنتاتسيالاۋ جۇمىستارى شەڭبەرىندە 12 تەحنيكالىق ميسسيا جىبەردى. 2022 جىلعا قر ترانزيتتىك الەۋەتىن ارتتىرۋ جانە ساۋدا راسىمدەرىن جەڭىلدەتۋ بويىنشا 5 ميسسيا جوسپارلانعان.
قازاقستانعا وسى ساپارى اياسىندا ك. ميكۋريا تۇركىستان قالاسىنداعى اۋەجايعا جانە قازاقستاننىڭ وزبەكستانمەن شەكاراسىنداعى جاڭعىرتىلعان «ب. قونىسباەۆ» وتكىزۋ بەكەتىنە باردى. 2019 جىلعى ناۋرىزدا قر-عا ساپارى كەزىندە دكۇ باسشىسى قر-نىڭ قحر-مەن شەكاراسىنداعى «نۇر جولى» وتكىزۋ بەكەتىندە, «استانا – تستو» بەكەتىندە جانە نۇر-سۇلتان قالاسىنداعى «Continental Logistics» كولىك-لوگيستيكا ورتالىعىندا بولعان ەدى.
