تاراپتار تەمىرجول تەحنيكاسى – ەلەكتروۆوزدار مەن باعىتتامالى جەتەكتەردى ءوندىرۋ جانە ولارعا سەرۆيستىك قىزمەت كورسەتۋ بويىنشا ىنتىماقتاستىقتى كەڭەيتۋدىڭ جاي-كۇيى مەن پەرسپەكتيۆاسىن تالقىلادى.
كەلىسسوز بارىسىندا Alstom-نىڭ قازاقستانداعى قۇراستىرۋشى ءوندىرىسىن وقشاۋلاۋ دەڭگەيىن 2021 جىلى 38%-دان 2025 جىلى 50%-عا دەيىن ۇلعايتۋ ماسەلەسىنە ەرەكشە نازار اۋدارىلدى. اقشالاي مانىندە وقشاۋلاۋ جىلىنا 5 ملرد تەڭگەنى قۇرايدى. بۇل رەتتە كومپانيا اتالعان ۋاقىتقا دەيىن قازاقستاندىقتار اراسىنان 700 جوعارى بىلىكتى ينجەنەر دايىندايدى, سونداي-اق قر تەمىرجول ينفراقۇرىلىمىن تسيفرلاندىرۋ جوبالارىن ىسكە اسىرۋعا قاتىسادى.
Alstom – ەنەرگەتيكالىق جابدىقتار مەن تەمىرجول كولىگى وندىرىسىندەگى الەمدىك كوشباسشىلاردىڭ ءبىرى. قازاقستاندا 2010 جىلدان بەرى جۇمىس ىستەيدى, 950-دەن استام قىزمەتكەرى بار. قازىرگى ۋاقىتتا قر-عا 100 ملن ەۋرودان استام ينۆەستيتسيا سالدى. نۇر-سۇلتان قالاسىندا ەلەكتروۆوزدار شىعارۋ جانە ولارعا تەحنيكالىق قىزمەت كورسەتۋ بويىنشا «ەلەكتروۆوز قۇراستىرۋ زاۋىتى» (ەكز) جانە الماتى قالاسىندا باعىتتامالى جەتەكتەر ءوندىرۋ بويىنشا «كازەلەكتروپريۆود» (كەپ) بىرلەسكەن كاسىپورىندارى, ءۇش سەرۆيس دەپوسى جانە ءبىر سەرۆيس ورتالىعى جۇمىس ىستەيدى.
Alstom – ورتالىق ازيا مەن كاۆكاز اۋماعىندا ەلەكتروۆوزدار مەن باعىتتامالى جەتەكتەردىڭ بىردەن-ءبىر ءوندىرۋشىسى, سونداي-اق وسى ايماقتاعى تەمىرجول ونەركاسىبىن جاڭعىرتۋ باعدارلاماسىنىڭ نەگىزگى قاتىسۋشىسى.
كەزدەسۋگە يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, «سامۇرىق – قازىنا» اق باسقارما توراعاسى الماسادام ساتقاليەۆ, «قازاقستان تەمىر جولى» ۇك» اق باسقارما توراعاسى نۇرلان ساۋرانباەۆ قاتىستى.
