جۇمىر جەردەگى بىردە-ءبىر كوماندا ءوزىنىڭ اتاق-داڭقى جاعىنان برازيليامەن تەڭەسە المايدى. وسىعان دەيىن سەگىز رەت ۇيىمداستىرىلعان الەم چەمپيوناتىنىڭ بەسەۋىندە ولار باس جۇلدەنى ولجالادى. تارقاتىپ ايتساق, 1989-1996 جىلدار ارالىعىندا وتكەن العاشقى ءۇش جارىستىڭ سوڭعى سىنىندا نيدەرلاند (2:1), اقش (4:1) جانە يسپانيانى (6:4) ۇتتى. 2008 جانە 2012 جىلدارعى بىرىنشىلىكتىڭ شەشۋشى باسەكەسىندە قاتارىنان ەكى رەت يسپاندىقتاردان باسىم ءتۇستى. برازيليادا پەنالتيدەن (2:2, 4:3) جەڭسە, تايلاندتا قوسىمشا ۋاقىتتا (3:2) تىزە بۇكتىردى. 2000 جىلى گۆاتەمالادا كۇمىس مەدالدى مويىندارىنا ءىلدى. وڭتۇستىك امەريكانىڭ قۇرلىعىنىڭ فۋتزالشىلارى فينالدا وزدەرىنىڭ سىرالعى قارسىلاسى يسپانياعا 2:3 ەسەبىمەن ەسە جىبەرگەن بولاتىن. ءدال سول جارىستىڭ توپتىق تۋرنيرىندە ولار قازاقستاننىڭ فۋتزالشىلارىن تاس-تالقان ەتىپ جەڭگەنى دە ەسىمىزدە. بۇل ماتچتا قازاقستاندىقتار 12:1 ەسەبىمەن ويسىراي جەڭىلدى. 2004 جىلى تايپەيدە برازيليالىقتار قولا مەدالدى قاناعات تۇتسا, 2016 جىلى كولۋمبيادان قۇرقول ورالدى. 1/8 فينالدىق مەجەدە ولار ويدا جوقتا يرانعا ەسە جىبەردى.
ليتۆاداعى الەمدىك دوپ دوداسىن برازيليا فۋتزالشىلارى ادەتتەگىدەي وتە كەرەمەت باستادى. توپتىق سايىستا ولار ۆەتنام (9:1), چەحيا (4:0) جانە پانامانى (5:1) ۇتتى. پلەي-وففتىڭ العاشقى ەكى ماتچىندا جاپونيا (4:2) مەن ماروككونى (1:0) جولىنان ىعىستىردى. الايدا جارتىلاي فينالدا ارگەنتينادان (1:2) ايلاسىن اسىرا المادى.
بۇل باسەكەنى ءبىزدىڭ جىگىتتەر وتە كەرەمەت باستادى. دامىلسىز شابۋىلداردىڭ ناتيجەسىندە 12-مينۋتتا ەسەپ اشىلدى. يگيتا قاقپادان شىققان بەتتە البەرت اقبالىقوۆقا كەرەمەت پاس بەردى. ونىڭ تىزەمەن باعىتتاعان دوبى قاقپاشىعا ءتيىپ, نىساناعا ءدوپ ءتۇستى. بۇل گول ءبىزدىڭ جىگىتتەردى جىگەرلەندىرگەنى سونشالىق, ولار قارقىنىن ەش باسەڭدەتكەن جوق. داۋرەن نۇرعوجيننىڭ ەسەپتى ەسەلەۋگە ەكى تاماشا مۇمكىندىگى بولدى. بىراق وعان ساتتىلىك جولداس بولمادى.
ۇزىلىستەن كەيىن شيەلەنىستى سايىس جالعاستى. قازاقستان قۇراماسى ءجيى شابۋىلداعانىمەن, 25-مينۋتتا تاينان ابايسىزدا ءوز قاقپاسىنا گول سوعىپ, برازيليالىقتاردىڭ جولىن اشتى. ارادا بەس-التى مينۋت وتكەندە ول جەرلەستەرىمىزدى العا شىعارىپ, ءوز قاتەلىگىن جۋىپ-شايعانداي بولدى. بىراق ودان كەيىن داڭقتى برازيليا فۋتزالشىلارىن تۇساۋلاۋدىڭ ەش مۇمكىندىگى بولمادى. ولار قاتارىنان ءۇش گول سوعىپ, الەم چەمپيوناتىنىڭ قولا جۇلدەگەرى اتاندى. وتانداستارىمىز ءتورتىنشى ورىندى يەلەندى. بىراق ويىنشىلارىمىزعا ەش وكپە ايتا المايمىز. وسى دوپ دوداسىندا ولار كەرەمەت ويىن ورنەگىن كورسەتىپ, ءتورتىنشى ورىنعا تۇراقتادى. بۇل – ازىرگە قازاقستان فۋتزالشىلارى تاريحىنداعى ەڭ زور تابىس.
فينالدا ارگەنتينا مەن پورتۋگاليا كۇش سىناستى. بۇل كەزدەسۋدە 2:1 ەسەبىمەن پيرەنەي تۇبەگىنىڭ تۇلەكتەرى جەڭىس تويىن تويلادى. وسىلايشا, ولار تۇڭعىش رەت الەم چەمپيونى اتاندى. قارسىلاستار قاقپاسىنا 9 گول سوققان برازيليالىق كارلوس ۆاگنەر گۋلارتە فيلو (فەرران) جارىس قورىتىندىسى بويىنشا سۇرمەرگەندەر كوشىن باستادى. ەڭ ۇزدىك ويىنشى اتاعى تاعى دا پورتۋگاليانىڭ جۇلدىزى ريكاردينيۋعا بۇيىردى.
