2 قازاندا سايلاۋشىلار جەرگىلىكتى ءوزىن ءوزى باسقارۋ ورگاندارىنىڭ (ساكرەبۋلو) 2 مىڭنان استام مۇشەسىن جانە تبيليسي, كۋتايسي, پوتي, ءباتۋميدى قوسا العاندا, 64 قالانىڭ اكىمدەرىن تاڭدادى. 3,4 ميلليون ازاماتتىڭ داۋىس بەرۋ قۇقىعى بار, 241 ادام اكىم بولۋعا, ال 2,8 مىڭ ۇمىتكەر قالالىق كەڭەستەرگە ءوز كانديداتۋراسىن ۇسىنعان.
بيىلعى جاعداي 2012 جىلدان باستالعان سايلاۋ ناۋقاندارىمەن ۇقساس. نەگىزگى دودا بيلەۋشى «گرۋزين ارمانى» مەن ء«بىرتۇتاس ۇلتتىق قوزعالىس» وپپوزيتسياسىنىڭ اراسىندا ءوربىدى. سايلاۋعا بارلىعى 40-تان استام پارتيانىڭ وكىلدەرى قاتىستى.
بۇل سايلاۋ گرۋزيادا قالىپتاسقان ىشكى ساياسي داعدارىستىڭ تاعى ءبىر كەزەڭى بولدى. جاعداي 2020 جىلدىڭ كۇزىندە وتكەن پارلامەنتتىك سايلاۋدان كەيىن تاعى ۋشىعا تۇسكەن. سايلاۋدا «گرۋزين ارمانى» پارتياسى باسىمدىقپەن جەڭىپ, وزگە توعىز وپپوزيتسيالىق پارتيا پارلامەنتكە وتكەن. الايدا ولاردىڭ بارلىعى دەرلىك سايلاۋ كەزىندەگى زاڭ بۇزۋشىلىقتاردى ايتا كەلە, جاڭا پارلامەنتتە جۇمىس ىستەۋدەن باس تارتقان. ساياسي تىعىرىقتان شىعاتىن جولدى تابۋ ءۇشىن ەۋروپالىق كەڭەستىڭ باسشىسى شارل ميشەل ارالاسۋعا ءماجبۇر بولعان.
داۋىس بەرۋ اياقتالعاننان كەيىن شىعارىلعان exit poll ناتيجەسى بويىنشا بيلەۋشى پارتيا الدا كەلە جاتقانى بەلگىلى بولدى.
گرۋزيا وپپوزيتسياسى جەرگىلىكتى سايلاۋدىڭ ناتيجەلەرىن بيلىككە دەگەن سەنىمنىڭ «رەفەرەندۋمى» رەتىندە قاراستىرىپ وتىر. 2021 جىلدىڭ ساۋىرىندە ەۋروپالىق كەڭەستىڭ پرەزيدەنتى شارل ميشەلدىڭ دەلدالدىعىمەن «گرۋزين ارمانى» پارتياسى مەن بىرنەشە وپپوزيتسيالىق پارتيا اراسىندا گرۋزيانىڭ ساياسي داعدارىستان شىعۋى تۋرالى كەلىسىمگە قول قويىلعان. قۇجاتتا بىرقاتار رەفورما قاراستىرىلعان, سونىمەن قاتار ەگەر بيلەۋشى پارتيا جەرگىلىكتى سايلاۋدا 43%-دان استام داۋىس جيناي الماسا, مەرزىمىنەن بۇرىن پارلامەنتتىك سايلاۋ وتكىزەتىنى تۋرالى دا ەرەجە بار. الايدا كەيىنىرەك بيلەۋشى «گرۋزين ارمانى» پارتياسى بۇل كەلىسىمنەن شىقتى. ونىڭ وكىلدەرى ەگەر بيلەۋشى پارتيا جەرگىلىكتى سايلاۋدا 1% داۋىس جيناسا دا, مەرزىمىنەن بۇرىن پارلامەنتتىك سايلاۋ بولمايتىنىن مالىمدەگەن.
سونداي-اق 1 قازاندا گرۋزيا پرەمەر-ءمينيسترى يراكلي گاريباشۆيلي وتكىزگەن توتەنشە بريفينگتە سايلاۋعا وراي ەلگە ورالعان ەكس-پرەزيدەنت ميحايل سااكاشۆيليدىڭ قاماۋعا الىنعانى بەلگىلى بولدى.
