پورتۋگاليانىڭ ورەندەرى الەم چەمپيوناتىندا بەس رەت باق سىنادى. 2000 جىلى ولار قولا مەدالدى يەلەندى. گۆاتەمالادا وتكەن سول جارىستىڭ توپتىق تۋرنيرىندە پيرەنەي تۇبەگىنىڭ تۇلەكتەرى قازاقستان قۇراماسىمەن كەزدەسىپ, 6:2 ەسەبىمەن جەڭىسكە جەتكەنى جانكۇيەرلەردىڭ جادىندا. ءدال سونداي ەسەپپەن ولار الاڭ يەلەرىن دە ۇتتى. بىراق برازيلياعا ءالى جەتپەدى – 0:4. ءوز توبىندا ەكىنشى ورىندى يەلەنگەن پورتۋگاليالىقتار ەكىنشى كەزەڭدە نيدەرلاند (3:1) پەن حورۆاتيانى (3:1) جەڭگەنىمەن, يسپانياعا (1:3) ەسە جىبەردى. جارتىلاي فينالدا قايتا برازيليالىقتارمەن جولىقتى. بۇل جولى وڭتۇستىك امەريكانىڭ وعلاندارى قارسىلاستار قاقپاسىنا جاۋاپسىز سەگىز گول سالدى. ءۇشىنشى ورىن ءۇشىن تارتىستا رەسەيدى 4:2 ەسەبىمەن ۇتىپ, قولا مەدالدى ولجالادى.
2004 جىلى تايپەيدە پورتۋگاليا ويىنشىلارى ەكىنشى كەزەڭدە سۇرىنسە, 2008 جىلى برازيليادا ءوز توبىنان شىعا المادى. 2012 جىلى تايلاندتا پلەي-وففقا جولداما الدى. 1/8 فينالدا پاراگۆايدى (4:1) جەڭىپ, ¼ فينالدا يتالياعا (3:4) جول بەردى. 2016 جىلى كولۋمبيادا جالاۋى جەلبىرەگەن جارىستا پورتۋگاليالىقتاردىڭ جەڭىس تۇعىرىنا كوتەرىلۋگە جاقسى مۇمكىندىگى بولدى. توپتىق تۋرنيردەن ىركىلمەي وتكەن ولار پلەي-وففتىڭ العاشقى ەكى كەزدەسۋىندە كوستا-ريكا (4:0) مەن ازەربايجاندى (3:2) قاپى قالدىردى. جارتىلاي فينالدا ارگەنتينادان (2:5) ايلاسىن اسىرا المادى. ال قولا مەدال ءۇشىن تارىستا يرانمەن تەڭ ءتۇستى. پەنالتي سوعۋ بارىسىندا پارسى ەلى وكىلدەرىنىڭ (3:4) باعى جاندى.
پيرەنەي تۇبەگىنەن كەلگەن جىگىتتەر ەۋروپا چەمپيوناتىنا توعىز رەت قاتىستى. العاشقى ءۇش جارىستا جولدارى بولماعانىمەن, ودان كەيىن جاقسى ناتيجە كورسەتە باستادى. «ەۋرو» دوداسىنداعى ەڭ زور تابىسى – 2018 جىلعى چەمپيوندىق اتاق. سلوۆەنيادا وتكەن ءتۋرنيردىڭ فينالىندا ولار يسپانيانى (3:2) سان سوقتىردى. 2010 جىلى ماجارستاندا وتكەن جارىستا اقتىق سىنعا دەيىن القىنباي جەتكەنىمەن, شەشۋشى تۇستا جوعارىدا اتالعان سىرالعى قارسىلاسىنىڭ اسىعى الشىسىنان ءتۇستى – 4:2. 2014 جىلعى جارىستى ءتورتىنشى ورىنمەن قورىتىندىلاسا, 2012 جانە 2016 جىلدارى شيرەك فينالدان اسا المادى.
پورتۋگاليا قۇراماسىنىڭ باستى جۇلدىزى ريكاردۋ فيليپە دا سيلۆا براگا (ريكاردينو) ەكەنى ءسوزسىز. 35 جاستاعى ويىنشىنىڭ سپورتتىڭ بۇل تۇرىندە باعىندىرماعان بەلەسى جوق. ونىڭ ۇلتتىق قۇراما ساپىندا جۇرگەنىنە باقانداي 18 جىل بولدى. ءبىر كەرەمەتى, ول التى مارتە (2010, 2014, 2015, 2016, 2017, 2018) تورتكۇل دۇنيەنىڭ تەڭدەسسىز فۋتزالشىسى اتانىپ, ءبىر رەت (2016) سۇرمەرگەندەر كوشىن باستادى. ەۋروپانىڭ ەڭ ۇزدىك ويىنشىسى (2007, 2018) جانە ەڭ مەرگەن شابۋىلشىسى (2016, 2018) اتاعىن ەكى رەتتەن يەلەندى. جەر- جاھانداعى بىردە-ءبىر فۋتزالشى وسىنداي وراسان زور تابىسىمەن ماقتانا المايدى.
بۇل كۇندەرى بالتىق جاعالاۋىندا ءوتىپ جاتقان الەم چەمپيوناتىنىڭ توپتىق تۋرنيرىندە پورتۋگاليالىقتار ءبىرىنشى ورىندى يەلەندى. ولار تايلاند (4:1) پەن سولومون ارالدارىنان (7:0) باسىم ءتۇسىپ, ماروككومەن (3:3) تەڭ وينادى. 1/8 فينالدا قوسىمشا ۋاقىتتا سەربيانى (4:3) سان سوقتىرىپ كەتتى. يسپانياعا قارسى وتكىزگەن شيرەك فينالدىق سايىستا دا ويىن ەكسترا-تايمعا ۇلاسىپ, اقىرىندا جەڭىسكە جەتتى – 4:2.
مىنە, جارتىلاي فينالدا قازاقستان قۇراماسى وسىنداي ازۋلى قارسىلاسپەن كۇش سىناسادى. بىراق ءبىزدىڭ جىگىتتەر دە وسال ەمەس. ءدال قازىر ولار «جەڭىسكە جەتەمىز!» دەپ جەر تارپىپ تۇر. ەگەر وسى باسەكەدە مەرەيىمىز ۇستەم بولسا, وندا ليتۆاداعى ءدۇبىرلى دوپ دوداسىندا باس جۇلدە ءۇشىن تالاسۋ مۇمكىندىگىنە يە بولامىز. ولاي بولسا, تارتىناتىن نەسى بار؟! العا, قازاقستان!
تاعى ءبىر ايتا كەتەرلىك جايت, ەكى كوماندا ءبىر-بىرىمەن نەبارى ەكى رەت قانا كەزدەستى. عاسىرلار توعىسىندا گۆاتەمالادا بولعان جايتتى جوعارىدا ايتتىق. ەسەسىنە 2015 جىلى ەۋروپا چەمپيوناتىنىڭ ىرىكتەۋ ويىنىن وتكىزۋ ءۇشىن قازاقستانعا كەلىپ, ءبىزدىڭ جىگىتتەردەن 1:3 ەسەبىمەن جەڭىلىپ قايتتى.
