بيىلعى 27-28 قىركۇيەكتە قازاقستان پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان قازاقستاننىڭ حالىقارالىق ۇيىمدارمەن ءوزارا ءىس-قيمىلدارىن جانداندىرۋ, سەرىكتەستىك بايلانىستارىن نىعايتۋ, سونداي-اق اۋستريامەن ەكىجاقتى ىنتىماقتاستىق ماسەلەلەرىن تالقىلاۋ ماقساتىندا ۆەناعا جۇمىس ساپارىمەن باردى.
ساپار بارىسىندا ەقىۇ باس حاتشىسى حەلگا شميدپەن, بۇۇ باس حاتشىسىنىڭ ورىنباسارى, بۇۇ ەسىرتكى جانە قىلمىس جونىندەگى باسقارماسىنىڭ اتقارۋشى ديرەكتورى گادا ۋاليمەن كەزدەسۋلەر وتكىزىپ, اۋستريا پارلامەنتىنىڭ ءبىر توپ دەپۋتاتىمەن, فەدەرالدىق پرەزيدەنت اكىمشىلىگىنىڭ جانە اۋستريانىڭ سىرتقى ساياسي ۆەدومستۆوسىنىڭ رەسمي تۇلعالارىمەن كەلىسسوزدەر جۇرگىزدى.
ءىس-شارالار كەزىندە ارناۋلى وكىل حالىقارالىق ۇيىمدارمەن ءتيىمدى ءارى جان-جاقتى ىنتىماقتاستىقتى دامىتۋ قازاقستاننىڭ سىرتقى ساياساتىنداعى ستراتەگيالىق باسىمدىعى ەكەنىن اتاپ ءوتتى.
بۇۇ-نىڭ ۆەناداعى بولىمشەسىنىڭ باسشىسى گادا ۋالي وڭىرلىك جانە حالىقارالىق دەڭگەيدەگى بۇۇ ەقب-مەن ىنتىماقتاستىعى جانە قولداۋى, سونداي-اق زاڭسىز ەسىرتكى ترافيگىنە, قىلمىسقا, سىبايلاس جەمقورلىق پەن تەرروريزمگە قارسى كۇرەستەگى بەلسەندىلىگى ءۇشىن ۇيىمنىڭ اتىنان قازاقستانعا العىس ءبىلدىردى. ول وڭىردەگى قۇقىق قورعاۋ ورگاندارىنىڭ جۇمىسىن ءتيىمدى ۇيلەستىرەتىن ەسىرتكىنىڭ زاڭسىز اينالىمىنا قارسى كۇرەس جونىندەگى ورتالىق ازيا وڭىرلىك اقپاراتتىق ۇيلەستىرۋ ورتالىعى ء(واواۇو) پلاتفورماسىنىڭ ماڭىزدىلىعىنا نازار اۋداردى. سونىمەن بىرگە اۋعانستان جانە كورشى ەلدەر بويىنشا وڭىرلىك باعدارلاماعا قول قويۋ اياسىندا بۇۇ ەقب باسشىسى جاقىن ۋاقىتتا ورتالىق ازيا ەلدەرىنە ساپارمەن كەلۋگە نيەتتى ەكەنىن جەتكىزدى.
ەقىۇ باسشىسى حەلگا شميدپەن وتكەن كەزدەسۋدە حالىقارالىق كۇن تارتىبىندەگى وزەكتى ماسەلەلەر بويىنشا, سونداي-اق ۇيىممەن ەكىجاقتى ءوزارا ءىس-قيمىلدىڭ كەڭ اۋقىمى تۋرالى, ونىڭ ىشىندە ءوڭىر ەلدەرىنىڭ كولىك-ترانزيتتىك الەۋەتىن ودان ءارى دامىتۋ ماسەلەلەرى جونىندە تۇشىمدى ويلار ورتاعا سالىندى.
ەرجان قازىحان باس حاتشىنى قازاقستاندا قازاقستان پرەزيدەنت قاسىم-جومارت توقاەۆتىڭ باستاماسى بويىنشا جۇرگىزىلىپ جاتقان دەموكراتيالىق وزگەرىستەردى ىلگەرىلەتۋگە باعىتتالعان رەفورمالار تۋرالى حاباردار ەتتى. سونىمەن قاتار ولار ايەلدەردىڭ الەۋمەتتىك جاعدايىن جاقسارتۋ, كليماتتىڭ وزگەرۋى جانە COVID-19 پاندەمياسىنىڭ سالدارىن ەڭسەرۋ ماسەلەلەرىنە نازار اۋدارۋدىڭ ماڭىزدىلىعىن ايتتى.
تاراپتار قازىرگى ۋاقىتتا ەقىۇ-عا قاتىسۋشى بارلىق مەملەكەتتىڭ بىرلەسىپ, اۋعانستانداعى جاعدايدى تۇراقتاندىرۋ جانە اۋعان حالقىنا كومەك كورسەتۋ ىسىندەگى كۇش-جىگەردى جۇمىلدىرۋ قاجەت ەكەنىنە باسا ءمان بەردى.
ەقىۇ باس حاتشىسى ۇيىمنىڭ قىزمەتىنە ۇنەمى جانە دايەكتى قولداۋ كورسەتىپ كەلە جاتقانى ءۇشىن قازاقستانعا ريزاشىلىعىن ءبىلدىردى.
بۇدان بولەك ەرجان قازىحان اۋستريا پارلامەنتىنىڭ دەپۋتاتتارى – ادام قۇقىقتارى جونىندەگى پارلامەنتتىك كوميتەتتىڭ مۇشەلەرىمەن كەزدەسۋ وتكىزدى.
اۋستريالىق دەپۋتاتتار ءوز كەزەگىندە قازاقستاننىڭ ساياسي رەفورمالارىنىڭ الەۋەتىن قولداپ, ادام قۇقىقتارى سالاسىندا جۇيەلى تۇردە جۇزەگە اسىرىلىپ جاتقان شارالاردىڭ ماڭىزدىلىعىن اتاپ ءوتتى.
ارناۋلى وكىل قازاقستاننىڭ كەڭ اۋقىمدى ماسەلەلەر تىزبەگى بويىنشا, ونىڭ ىشىندە دەموكراتيالاندىرۋ, زاڭ ۇستەمدىگى مەن ادام قۇقىقتارىن قامتاماسىز ەتۋ, ازاماتتىق ينستيتۋتتاردى دامىتۋ سالاسىندا اشىق ءارى سىندارلى ديالوگقا ءازىر ەكەنىن ايتتى.
فەدەرالدىق پرەزيدەنت اكىمشىلىگىنىڭ جوعارى وكىلدەرىمەن جانە اۋستريا ءسىم باسشىلىعىمەن كەلىسسوزدەر شەڭبەرىندە تاراپتار ساياسي جانە ساۋدا-ەكونوميكالىق ىنتىماقتاستىقتىڭ قازىرگى جاي-كۇيى مەن كەلەشەگىنە, حالىقارالىق كۇن تارتىبىندەگى وزەكتى ماسەلەلەرگە, ونىڭ ىشىندە اۋعانستانداعى سوڭعى وقيعالارعا, پاندەميانىڭ الەۋمەتتىك-ەكونوميكالىق سالدارىمەن كۇرەسىنە جانە كليماتتىڭ وزگەرۋى بويىنشا جالپى كۇش-جىگەردى ۇيلەستىرۋگە قاتىستى پروبلەمالاردى كەشەندى تۇردە تالقىلادى.
بيىلعى 22 قىركۇيەكتە نۇر-سۇلتان قالاسىندا وتكەن قازاقستان-اۋستريا ۇكىمەتارالىق كوميسسياسىنىڭ قورىتىندىلارى بويىنشا قول جەتكىزىلگەن كەلىسىمدەردى ىسكە اسىرۋ, جوعارى جانە اسا جوعارى دەڭگەيدەگى ساياسي ديالوگتى جانداندىرۋ جونىندە تۇبەگەيلى ۋاعدالاستىققا قول جەتكىزىلدى.
