2021 جىلى «بولاشاق» باعدارلاماسى بويىنشا وقۋعا 1055 ستيپەنديا ءبولىندى. ونىڭ ىشىندە 445 ستيپەنديا ماگيستراتۋرا, رەزيدەنتۋرا جانە دوكتورانتۋرا باعدارلامالارى بويىنشا بولىنگەن. 110 گرانت دەنساۋلىق ساقتاۋ, مادەنيەت, سپورت سالاسىنىڭ قىزمەتكەرلەرى, پەداگوگتار, مەملەكەتتىك قىزمەتشىلەر, ينجەنەر-تەحنيكتەرگە 5 سانات بويىنشا تاعىلىمدامادان وتۋگە بەرىلگەن. قر پرەزيدەنتى قاسىم-جومارت توقاەۆتىڭ «عالىمدار» تاعىلىمداماسى ساناتى بويىنشا قازاقستان عالىمدارىنىڭ الەمنىڭ جەتەكشى عىلىمي ورتالىقتارىندا تاعىلىمدامادان ءوتۋىن قامتاماسىز ەتۋ ماقساتىنداعى تاپسىرماسىنا سايكەس 500 ستيپەنديا بەرىلىپ وتىر.
«وسى جىلعا ارنالعان «بولاشاق» باعدارلاماسى بويىنشا باسىم ماماندىقتار تىزبەسىندە اكادەميالىق وقۋعا ارنالعان 80 جانە تاعىلىمدامادان وتۋگە ارنالعان 137 ماماندىق بار. تىزىمگە «ينكليۋزيۆتى ءبىلىم بەرۋ», «ۆيرۋسولوگيا», «ۋربانيستيكا», «جاڭا ماتەريالدار تەحنولوگياسى» سياقتى وزەكتى ماماندىقتار ەندى», دەپ اتاپ ءوتتى «حالىقارالىق باعدارلامالار ورتالىعى» اق پرەزيدەنتى اينۇر كارىبوزوۆا.
ەستەرىڭىزگە سالا كەتەيىك, 2021 جىلى «بولاشاق» باعدارلاماسى بويىنشا وقۋعا بولاتىن شەتەلدىك جوعارى وقۋ ورىندارىنىڭ تىزىمىنە 27 ەلدىڭ 207 ۋنيۆەرسيتەتى كىرگەن. ولار حالىقارالىق اكادەميالىق رەيتينگتەردىڭ (QS, Times Higher Education (THE), Academic rankings of World Universities (ARWU) العاشقى 250 پوزيتسياسىندا تۇر.
