بىراق بۇلاردان دا ۇرەيلى, بۇلاردان دا قاتال, بۇلاردان دا ۇزاق جالعىزدىق بار. ول ۋاقىتپەن بەتپە-بەت كەلگەن جالعىزدىق. ءوز-وزىڭمەن جاپاندا جالعىز قالعان ءۇنسىز جالعىزدىق – ادام جانىنىڭ ەڭ اۋىر ازابى شىعار. تىم قۇرىسا ساعاتتىڭ تىقىلىن ءماسليحاتتاس ەتە الماي جالعىز قالۋدىڭ سۇمدىعىن كەز كەلگەن ادام كوتەرە الماۋى دا مۇمكىن. ءيا, جالعىزدىقسىز ادامزاتتى ەلەستەتە الماس تا ەدىك. تىرشىلىك بار جەردە جالعىزدىق بار. ءتىپتى پەندە عۇمىرىنىڭ ءماندى بولىگى دە كەيدە وسى جالعىزدىقپەن تۇتاس بايلانىستى بولۋى مۇمكىن.
حات تاسۋشى چاك نولاند ەشقاشان ۋاقىتتىڭ تۇتقىنى بولامىن دەپ ويلاماسا كەرەك. ءاردايىم سەكۋندتارمەن ساناسىپ جۇرەتىن مازاسىز ونىڭ ۋاقىت اقىر سوڭىندا فوبياسىنا اينالادى. ادامنىڭ كەيدە ەڭ مىقتى قاسيەتى ونىڭ ەڭ ءالسىز تۇسى بولاتىنى بار. نولاند ءۇشىن ۋاقىت ونىڭ ەڭ ءالسىز تۇسى ەدى. الايدا ول ۇشاق اپاتىنا ۇشىراعانعا دەيىن ەشتەڭەدەن بەيحابار, ۋاقىتپەن ءجۇرىپ-تۇرۋدىڭ حاس شەبەرى ساعاتىنا قاراپ-قاراپ قويىپ سۇيگەنىنە قوڭىراۋ شالادى. قولاستىنداعى بىرنەشە جۇمىسكەردى حات تاسۋدا ۋاقىتتان ءبىر ساتكە دە كەشىگۋگە بولمايتىنىن قاتتى تالاپ ەتكەنى سونشالىق, ول ءوز ومىرىندەگى ۋاقىتتىڭ پاتشاسىنداي ەدى. بىراق كەيىن وعان ۋاقىتتىڭ ءوزى پاتشا بولىپ شىعادى. ول ارينە, كەيىن.
ازىرگە ءبىزدىڭ باس كەيىپكەرىمىز چاك نولاند كەللي فريرس ەسىمدى بولاشاق قالىڭدىعىنىڭ ءوتىنىپ تۇرىپ «قال» دەگەنىنە دە قاراماستان, اۋىرىپ تۇرعان ءتىسىن دە جۇلدىرتپاستان, ەسىكتەن ەنگەلى تۇرعان جاڭا جىلدى دا قارسى الماستان ۇشاققا وتىرىپ, جۇك تولى لاينەرمەن حات-حابارلاردى تاراتۋعا ۇزاق ساپارعا اتتانىپ كەتەدى.
جالپى رەجيسسەر روبەرت زەمەكيستىڭ بۇل ءفيلمى («يزگوي» – «تالكەك») استارى تەرەڭ, الەمدى ءالى كۇنگە دەيىن ءوز جۇمباعىمەن تاڭعالدىرۋدان تالماي كەلە جاتقان شەدەۆر. كينو كارتينا اۋەلدە ايتقانىمىزداي, ادام مەن ۋاقىتتىڭ بەتپە-بەت جالعىزدىعى دەگەنىمىزبەن, ودان بولەك تە ايتار ويلارى از ەمەس. بايقاپ قاراعان ادام اتالعان فيلم ادام بالاسىنىڭ ءاردايىم وتكەنمەن بەلگىلى ءبىر داۋىرلەردە, زامانداردا, جىلداردا, ساتتەردە قوشتاسىپ وتىراتىندىعىن اڭعارار ەدى. فيلمدەگى قوسالقى كەيىپكەرلەر, نەشە جىل بىرگە تۇرعان ايەلى بەتتيمەن اجىراسىپ, جاس كەلىنشەگىمەن باسقا قالادا تىرشىلىك كەشىپ جاتقان ءپيتتىڭ ءوزى وتكەنىمەن قوشتاسقان ادام. سونداي-اق ماسكەۋدىڭ ءبىر بۇرىشىندا, قابىرعادا ءىلۋلى تۇرعان لەنيننىڭ قولا تاقتايشاداعى بەينەسىن الىپ تاستاپ جاتقان كورىنىس تە ەسكى قوعامدى كۇرەسىنگە سۇيرەپ, باسقا قوعامعا ءوتىپ بارا جاتقان جاڭا رەسەيدى مەڭزەيدى.
ۇشاعى اپاتقا ۇشىراپ, جالعىزدىقتىڭ تابانداتقان ءتورت جىلىن ارالدا جالعىز ءوزى وتكەرگەن باستى كەيىپكەرىمىز دە وتكەنىمەن تولىق قوشتاسىپ, ومىرگە قايتا كەلگەن ادام بولاتىن. نەكەلەسەمىز دەپ جۇرگەن بولاشاق جارى 4 جىلدا باسقا ادامعا تۇرمىسقا شىعىپ كەتەدى. كەللي (قالىڭدىعى) – چاكتىڭ وتكەنى بولاتىن. ونى ءتىپتى باستى كەيىپكەرىمىزدىڭ قاقساتىپ, شىداتپاي, اقىر سوڭىندا كونكيدىڭ تەمىرىمەن ءوزى ءبىر سوعىپ ج ۇلىپ تاستاعان تىسىمەن دە وبرازدى تۇردە بەينەلەپ قاتار قاراۋعا بولادى. كەللي چاكتىڭ ج ۇلىنعان ءتىسى دەپ تۇسىنگەنىمىز دۇرىس. قايتكەن كۇندە دە ۇشاق اپاتقا ۇشىراعان ساتكە دەيىنگى ءومىردىڭ بارلىعى چاكتىڭ وتكەنى بولاتىن.
باس كەيىپكەردى يەسىز ارالدان امان الىپ شىققان ءۇمىت شىراعى ەدى. حات تاسۋشىنىڭ جالعىز مىندەتى بولسا, ول – اماناتقا ادالدىق تانىتىپ سىرتىندا مەكەنجايلارى جازىلعان قوراپتاردى ءوز يەلەرىنە امان-ساۋ جەتكىزۋ. چاك سول مىندەتىنە 4 جىل ارالدا جۇرسە دە ادال بولۋعا تىرىسادى. ۇشاق اپاتىنان تەڭىزدىڭ جاعاسىنا شاشىلىپ تۇسكەن قانشاما سالەمدەمە ونىڭ كەيىن كەرەگىنە دە جارايدى. تەك ءبىر عانا قوراپتى اشپاۋعا بەكىنەدى. سول قوراپتى يەسىنە جەتكىزۋ ءۇشىن دە ول ءومىر ءسۇرۋدى ويلايدى. سول ءۇمىت ءبىزدىڭ قاھارماندى ارالدان امان الىپ وتەدى.
پسيحولوگيالىق, فيزيكالىق تۇرعىدان ابدەن قاجىعان كەزدە ادام جالعىزدىقتىڭ وزىمەن سويلەسە باستايدى. چاك بىردە وت تۇتاتا الماي ابدەن قينالىپ, ىزالانعان ساتىندە قان-قان قولىمەن سالەمدەمەلەردىڭ بىرىنەن شىققان ۆولەيبول دوبىن جىندانىپ, لاقتىرىپ كەپ قالادى. قىزىق بولعاندا, الگى اپپاق دوپقا جۇققان قولىنىڭ قانى ادامنىڭ بەت الپەتىنە ۇقساي قالماسى بار ما؟ نە كەرەك, چاك سول دوپتى وزىمەن سىرلاس دوس ەتۋگە كوشەدى. ءتىپتى جانسىز دوپپەن كەڭەسىپ, داۋلاسىپ, ازىلدەسىپ, اقىر سوڭىندا دوپقا «تىنىشتال, اۋزىڭدى جاپ» دەگەنگە دەيىن بارادى. جوق, ءسىز ويلاعانداي چاك جىندانبايدى. تەك «ۋيلسون» دەگەن اتى بار دوپ ول ءۇشىن شىنىمەن سويلەيتىن. ادام جانىن ۇققاندا سونداي, ءبىر قاراساڭ مۇڭايىپ, بۇرىسە قالادى. ەندى بىردە ك ۇلىمسىرەپ, ءتىپتى ىستەپ جاتقان جۇمىسىڭا كومەكتەسە كەتەتىندەي. ەڭ قيىنى, «ۋيلسوننىڭ» سۋعا اعىپ كەتەتىن جەرى. ءيا, دوسى سۋعا اعىپ مەرت بولادى. بىراق بۇل ءبىر جاعىنان تۇسىنگەن ادامعا «ۋيلسون» دا چاكتىڭ وتكەنى بولاتىن تۇعىن. ونىمەن قوشتاسپاسا, جانسىز دوپتى قۇتقارام دەپ ءوزى دە سۋعا باتىپ كەتەر ەدى. الايدا نەشە جىل قۇراستىرعان اعاش سال ءجۇزىپ-ءجۇزىپ الىستان مۇنارتقان كەمەگە قاراي تولقىنمەن جوڭكىلىپ بارا جاتادى...
ءتورت جىل – ءومىرى ءبىر قالىپتى ارناعا تۇسكەن ادامدار ءۇشىن زۋ ەتە تۇسەتىن ۋاقىت. ال ومىرگە قايتا كەلگەندەي, ارالدا جالعىز ءوزى تىرشىلىك كەشكەن ادام ءۇشىن ول ۋاقىت عاسىردان دا ۇزاق.
چاك الگى اشپاعان قوراپتى ءوز مەكەن جايىنا اپارا جاتادى. اڭعارعان ادام الگى قوراپتىڭ سىرتىندا پەرىشتەنىڭ قوس قاناتى بەدەرلەنگەن سۋرەتتى كورەدى. ول نەنى ءبىلدىرۋى مۇمكىن؟ ول قوس قانات – اجىراسىپ كەتكەن قوسالقى كەيىپكەرلەر پيت پەن بەتتي بولۋى مۇمكىن, ول – قوسىلماعان, تاعدىر ءبىر بولۋدى جازباعان چاك پەن كەللي بولۋى دا عاجاپ ەمەس. قايتكەن كۇندە دە قوس قانات قاتار سەرپىلمەسە بيىك باعىنبايدى, قاشىقتىق ەڭسەرىلمەيدى. ءيا, ءبىردى ايتىپ بىرگە كەتپەيىك, چاك ءتورت جىل بويى اشپاي كەلگەن سوڭعى قوراپتى يەسىنە تابىستايدى. يەسى كىم دەپ سۇرارسىز, يەسى باعانادان ايتىپ وتىرعان قوسالقى, بالكىم باستى كەيىپكەر ءپيتتىڭ بۇرىنعى ايەلى – بەتتي.
كەلليدىڭ تاعدىرى نە بولدى دەپ تە سۇراساڭىز بولادى, كەللي الدەقاشان تۇرمىسقا شىعىپ كەتكەن ەدى. كىمگە دەسەڭىز ونى دا ايتۋعا بولادى, بەس جىل بۇرىن چاكتىڭ ءتىسىن ەمدەگەن دانتيستكە...
ادامدى ازاپتاعىڭ كەلسە جالعىز قالدىر. تۇرمەلەردە جالعىزدان-جالعىز جەكە قاماقتا اي مەن كۇننەن جاڭىلىپ قالعان ادامدار كوبىنە مورالدىق قىسىمعا شىداماي سىنىپ كەتەدى ەكەن. ارينە, ادامنىڭ ىشكى مەنى مىقتى بولماسا, كەز كەلگەن سىناق قاۋىپتى.
بىراق چاك ىشكى قۋاتى مىقتى, قيىندىققا وڭاي بەرىلە سالمايتىن ناعىز جانكەشتى ادام بولاتىن. ول ءتىپتى ارالدا قالعان العاشقى جىلدارى اسىلىپ ولەم دەگەن ءجىبىن كەيىن 4 جىلدان سوڭ جارتاستىڭ باسىنداعى اعاشتان شەشىپ الىپ قايىق جاسايدى. كەزىندە ءوزى اپاتقا ۇشىراعانداعى ۇشاقتىڭ دارەتحاناسىنىڭ سۋمەن اعىپ كەلگەن ەسىگىن دە قولدان جاساعان اعاش قايىعىنا جەلكەن ەتەدى. ويلاڭىزشى, دارەتحانانىڭ جارتىلاي سىنىق ەسىگى – ونىڭ جاڭا ومىرىنە اشىلعان التىن قاقپادان كەم ەمەس. نولاند ماناعى اشىلماعان قوراپتىڭ سىرتىنداعى پەرىشتەنىڭ قوس قاناتىن ءوزى قولدان قۇراستىرعان سول قىرىق جاماۋ قايىعىنا دا بەدەرلەپ قويادى. قاناتتىڭ اۋەلگى جاراتىلىسى ۇشۋ ەمەس پە, مۇحيتتىڭ ۇستىندە تۇرعان قاتتى داۋىلعا ىلەسىپ سول قانات-ەسىك ۇشادى دا كەتەدى...
بۇل فيلم – كوپ كورەرمەندى ءالى كۇنگە ويلاندىرىپ كەلە جاتقان شىن كلاسسيكا. سەبەبى چاك ەڭ سوڭىندا بەتتيگە ءتورت جىل بويى اشپاي, ساقتاپ الىپ كەلگەن قوراپتىڭ ىشىندە نە زات بولۋى مۇمكىن؟ بىرەۋلەر ايتادى, «ول قوراپتىڭ ىشىندە قۋاتى سول بەتى تاۋسىلماعان, الەمنىڭ كەز كەلگەن نۇكتەسىنەن بايلانىسقا شىعا الاتىن راديو تەلەفون بولدى» دەيدى. ارينە, ءازىل دەپ قابىلدايسىز. بىراق سولاي بولۋى دا عاجاپ ەمەس قوي. بىرەۋلەر, بەتتي كۇيەۋىنە: «قايتا قوسىلايىق!» دەپ جازعان عاشىق حاتى مەن كۇيەۋى پيت ءسۇيىپ جەيتىن ءتاتتى شوكولاد پەن اششى سوۋس بولدى» دەيدى.
ءومىردىڭ اششىسى مەن تۇششىسى قاتار جۇرەتىن ءومىردى ءبىر عانا سوۋس پەن شوكولاد ارقىلى قالاي ادەمى ايتۋعا بولادى دەرسىڭ!.. كىم بىلەدى, باستىسى ونى چاك اشقان جوق. يەسىنە تابىستاپ, ءتورت تاراپقا جۇرەتىن جولايرىقتىڭ ورتاسىندا تۇرا بەردى. فيلم وسىلاي اياقتالادى.
ايتپاقشى, چاكتىڭ ءرولىن ءساتتى سومداعان توم حەنكس كينو ءتۇسىرىلىمىن ءبىر جىلعا كەشىكتىرىپ, تەجەپتى. سويتسە وبرازعا شىنايى كىرۋى ءۇشىن توم شاشىن جالبىراتىپ ءوسىرىپ, ءوزىنىڭ ارسا-ارسا بولىپ ارىقتاۋىن كۇتىپتى. ارالدا ساقال-مۇرتى جالبىراپ جۇرگەن چاكتىڭ بەينەسى شىنايى شىعۋى ءۇشىن سونداي جانكەشتىلىككە بارىپتى. بۇدان كەيىن ونى تالانتتى اكتەر دەمەي كور؟
«تالكەك» – شىن مانىندە شەدەۆر, ادامنىڭ جالعىزدىقپەن كۇرەسىندەگى كوزسىز باتىرلىق تۋرالى ءتامسىل. ونى ءتىپتى, ومىرگە سونشالىقتى قۇشتارلىقتىڭ ەڭ ۇزدىك ەتالونى دەۋگە دە بولادى. ءوزىنىڭ وتكەن ءومىرىن تىنىق مۇحيتىنىڭ تەرەڭىنە باتىرىپ جىبەرىپ, سىنعان اياق-قولىن قايتا جيناپ, ءوزىنىڭ بولمىسىنان جاڭا ادام جاساپ شىققان چاك – ارقايسىمىزدىڭ ءومىرىمىز بولۋى كەرەك.
شىنداپ كەلگەندە چاكتىڭ ۇشاعى اپاتقا ۇشىراعان تىنىق مۇحيتى مەن ونداعى يەسىز ارال ارقايسىمىزدىڭ ىشىمىزدە بار.
يەسىز ارال قاشاندا ۋاقىتپەن بەتپە-بەت كەلەتىن جالعىز جەر.
