كورمە قوناقتارىنىڭ نازارىنا تاۋەلسىز قازاقستاننىڭ قالىپتاسۋ تاريحى مەن ەلىمىزدەگى قارقىندى ساياسي, ەكونوميكالىق, الەۋمەتتىك جانە رۋحاني وزگەرىستەردى, ونىڭ حالىقارالىق ارەناداعى جەتىستىكتەرىن اشىپ كورسەتەتىن فوتوسۋرەتتەر مەن كىتاپتار, سونداي-اق ۇلتتىق تاريحتىڭ كورنەكتى تۇلعالارىنىڭ پورترەتتەرى ۇسىنىلدى.
كورمەنى اشقان قازاقستان ەلشىسى جالعاس ادىلباەۆ قازاقستاننىڭ تاۋەلسىزدىك جىلدارىندا قول جەتكىزگەن جەتىستىكتەرىن, ەكونوميكالىق پروگرەستى, قوعامدىق دامۋدى, حالىقارالىق قاۋىپسىزدىك ارحيتەكتۋراسىنداعى بەلسەندى ءرولىن اتاپ ءوتتى. ديپلومات اۋديتورياعا ەلىمىزدىڭ تۇراقتى دامۋى مەن ازاماتتارىمىزدىڭ ءال-اۋقاتىن قامتاماسىز ەتۋگە باعىتتالعان قازىرگى ۋاقىتتا جۇرگىزىلىپ جاتقان ەكونوميكالىق جانە ساياسي رەفورمالار تۋرالى حاباردار ەتتى.

سونداي-اق, ول پرەزيدەنت قاسىم-جومارت توقاەۆتىڭ «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىنىڭ نەگىزگى ەرەجەلەرى تۋرالى قىسقاشا ايتىپ بەردى.
كورمەنىڭ اشىلۋىندا ءسوز سويلەگەن موڭعوليانىڭ قازاقستانداعى ەكس-ەلشىسى دامدينجاۆ داشنيام قازاقستان تاۋەلسىزدىكتىڭ 30 جىلى ىشىندە مىقتى مەملەكەتتى قالىپتاستىرۋ بويىنشا ىرگەلى جۇمىس اتقارعانىن, ينفراقۇرىلىمدى جاڭعىرتۋ جانە دامىتۋ بويىنشا تابىستى رەفورمالار مەن كەشەندى شارالار جۇرگىزگەنىن العا تارتتى.

ءىس-شارا بارىسىندا قوناقتار دومبىرا مەن موڭعول حالىق اسپاپتارىندا ورىندالعان قازاقتىڭ ۇلتتىق مۋزىكالىق شىعارمالارىن تىڭدادى.
