كۇن تارتىبىندە – ەلباسى جولداۋىن ءتۇسىندىرۋ مەن ناسيحاتتاۋ

ءماجىلىس دەپۋتاتتارى اقپان ايىنىڭ 6-سى مەن 15-ءى ارالىعىندا ەلىمىز ايماقتارىندا بولىپ, ەلباسىنىڭ «قازاقستان جولى-2050: ءبىر ماقسات, ءبىر مۇددە, ءبىر بولاشاق» جولداۋىن ءتۇسىندىرۋ, ناسيحاتتاۋ جۇمىسىنا كىرىسپەك. بۇل تۋرالى «نۇر وتان» پارتياسى فراكتسياسىنىڭ جينالىسىندا ءماجىلىس توراعاسى, فراكتسيا جەتەكشىسى نۇرلان نىعماتۋلين ءمالىم ەتتى. جيىن بارىسىندا نۇروتاندىق-ماجىلىسمەندەر الداعى جۇمىس جوس­پارىن قاراپ, بەكىتتى. حالىق قالاۋلىلارى ەڭبەك ۇجىمدارىمەن, شاعىن جانە ورتا بيزنەس وكىلدەرىمەن كەزدەسىپ, الەۋمەتتىك نىسانداردى ارالايدى. دەپۋتاتتار ۇزاقمەرزىمدى «قازاقستان-2050» ستراتەگياسىن نەگىزگە الا وتىرىپ, ەلىمىز دامۋىنىڭ باسىم باعىتتارىن بەلگىلەگەن جولداۋدىڭ ماقساتتارى مەن مىندەتتەرى جايىندا كەڭىنەن اڭگىمەلەيدى. بۇل رەتتە اتالعان ستراتەگيالىق قۇجاتتى قۇقىقتىق قامتاماسىز ەتۋ بويىنشا زاڭ شىعارماشىلىق جۇمىسىنا باسا نازار اۋدارىلماق. سونداي-اق, وسى ۋاقىتقا دەيىن قا­بىل­دانعان جانە قازىرگى ۋاقىتتا قاراۋعا الىنعان زاڭنامالىق اكتى­لەر­گە دە باسا نازار اۋدارىلادى. نۇرلان نىعماتۋليننىڭ اتاپ وتكەنىندەي, پرەزيدەنتىمىز ەلى­مىز الدىندا ۇلكەن ءمۇم­كىندىكتەرگە جول اشىپ وتىر. ونى جۇزەگە اسىرۋعا ءاربىر قازاقستاندىق بەلسەنە ارالاسۋعا ءتيىس. ءماجىلىس سپيكەرى ناسيحات جۇمىسى بارىسىندا وبلىس, اۋدان ورتالىقتارىمەن قاتار, شال­عاي­داعى ەلدى مەكەندەردى دە قامتۋ ماڭىزدى ەكەنىن قاداپ ايتتى, دەپ حابارلادى وسى پالاتانىڭ ءباسپاسوز قىزمەتى.