وزىق ستاندارت – وزىق جۇيە

كەشە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن كەزەكتى بريفينگكە ەلىمىزدىڭ قورشاعان ورتانى قورعاۋ جانە سۋ رەسۋرستارى ءمينيسترى نۇرلان قاپپاروۆ قاتىسىپ, ۆەدومستۆو الدىندا تۇرعان ماقسات-مىندەتتەرگە توقتالدى. بريفينگتە ءسوز العان ن.قاپ­پاروۆ ەلباسىنىڭ قازاقستان حالقىنا ارناعان جولداۋىندا 30 دامىعان مەملەكەت ساناتىنا قوسىلۋ ماقساتتارىنا جەتۋدىڭ جولدارى ايقىندالعانىنا توقتالا كەلە, وسى اۋقىمدى قۇجاتتا بەلگىلەنگەن مىندەتتەردى ورىنداۋ باعىتىندا جالپىۇلتتىق جوس­پاردىڭ قابىلدانعانىن اتاپ ءوتتى. «بۇل جوسپار اياسىندا ءبىز­دىڭ مينيسترلىككە بىرقاتار تاپ­سىرمالار بەرىلگەن-تۇعىن. ءبىرىن­شىدەن, كولىكتى جانارمايدىڭ ەكو­لوگيالىق تازا تۇرلەرىنە كو­شىرۋ, ەلىمىزدە ەلەكتروموبيلدەر ءوندىرىسىن اشۋعا مۇمكىندىكتەر تۋدىرۋ جانە سوعان قاجەتتى ينفراقۇرىلىم قالىپتاستىرۋ بويىنشا ۇسىنىستار ەنگىزۋ تاپسىرىلدى. ارينە, بۇل ماسەلەلەردى قاراستىرۋ تاپسىرماسى بىزبەن بىرگە بىرقاتار ورتالىق جانە جەرگىلىكتى اتقارۋشى ورگاندارعا دا جۇكتەلدى. وسىعان وراي, ارنايى قۇرىلاتىن ۆەدومستۆولىق جۇمىس توبى بۇل باعىتتاعى پروبلەمالاردى شەشۋ جولدارىن قاراستىرادى», دەدى مينيستر. ونىڭ ايتۋىنشا, قازىرگى تاڭدا ەلدەگى اۆتوكولىكتەردىڭ 80 پايىزى 10 جىلدان استام مەرزىمدە قولدانىستا بولعان. ماسەلەن, بۇگىندە ءىرى قالالارداعى جەكەمەنشىك كولىكتەردىڭ ۇلەس سالماعى 70 پايىزدى قۇرايدى ەكەن. بۇل ورايدا, ۆەدومستۆو باسشىسى اۆتوكولىك پاركتەرىن جاڭارتۋ جانە كولىكتىڭ ەكولوگيالىق تازا تۇرلەرىن دامىتۋ شارالارىن بەلگىلەپ, ەسكى كولىكتەردى كادەگە جاراتۋ جانە پايدالانۋعا ىنتالاندىرۋ باعدارلاماسى ازىرلەنىپ جاتقانىن جەتكىزدى. سونداي-اق, ن.قاپپاروۆ ەلىمىزدەگى جانارماي ساپاسىنىڭ ەۋروپالىق دەڭگەيدەن تومەن ەكەندىگىن دە جاسىرمادى. مۇنىڭ سەبەبىن ول جەرگىلىكتى مۇناي زاۋىتتارىنىڭ وندىرىستىك جابدىقتارىنىڭ ەسكىرگەندىگىمەن جانە بولشەك-ساۋدا ورىندارىندا ستاندارتتاردىڭ ورىندالماي كەلە جاتقاندىعىمەن بايلانىس­تىردى. «ءبىز وندىرىلەتىن جانارماي ساپاسىن جوعارىلاتۋ, جاڭا ستاندارتتاردى ازىرلەۋ شارالارىن قاراستىرماقپىز. قازىرگى جولدار ينفراقۇرىلىم مەن ەلەكتروموبيلدەردى قولدانۋعا مۇمكىندىك بەرمەيدى. گاز تاسىمالداۋ ينفراقۇرىلىمى دا دامىماعان. سونىڭ سالدارىنان, كولىك سالاسىندا كوگىلدىر وتىندى قولدانۋ مۇمكىندىگى تومەن. سوندىقتان, گاز, ەلەكتر قۋاتى جانە باسقا دا بالامالى قۋات كوزدەرىمەن جۇرەتىن اۆتوكولىكتەر ءۇشىن ينفراقۇرىلىمدى قۇرىپ, دامىتامىز. سونداي-اق, كولىكتەردى تازا قۋات كوزدەرىنە اۋىستىرۋ بويىنشا مەملەكەتتىك قولداۋ كورسەتۋ شارالارى قاراستىرىلادى», دەدى بۇل ماسەلە تۋراسىندا مينيستر. وسىلاي دەي كەلە, ن. قاپپاروۆ بۇل جۇمىستار اياسىندا بىرقاتار زاڭعا وزگەرىستەر ەنگىزۋ, كولىك اعىمدارى مەن ينفراقۇرىلىمىن باسقارۋ جۇيەسىن جەتىلدىرۋ ارقىلى وسى سەكتورداعى ەنەرگيا تيىمدىلىك پەن رەسۋرستاردىڭ ۇنەمدىلىگىن ارتتىرۋ, كولىك سالاسىنداعى پارنيكتىك گازداردىڭ شىعارىلىمىن ەسەپتەۋ ساپاسىن جوعارىلاتۋ شارالارىن قاراستىرۋ ماسەلەلەرى جوسپاردا تۇرعانىن اتاپ ءوتتى. ەگەر, اتالعان كەشەندى شارالار جوسپارى قابىلداناتىن بولسا, كەيىن ول ەلىمىزدىڭ ءبىر ءىرى قالاسىندا قاناتقاقتى جوبا تۇرىندە جۇزەگە اسىرىلماق كورىنەدى. بۇل كۇنى ن.قاپپاروۆتىڭ نازارىنان ەلباسى جولداۋىن ىسكە اسىرۋ جونىندەگى جالپىۇلتتىق جوس­پاردا ۆەدومستۆوعا تاپسىرىلعان تاعى ءبىر ماڭىزدى مىندەت – نازارباەۆ ۋنيۆەرسيتەتى اياسىندا بولاشاق ەنەرگيانى زەرتتەۋ جانە ەنگىزۋ ينستيتۋتىن قۇرۋ ماسەلەسى دە سىرت قالمادى. «بۇل ورتالىق ەنەرگەتيكانىڭ ۇزاقمەرزىمدى دامۋ پەرسپەكتيۆالارىن ءتۇسىنىپ, بۇل جولداعى تاۋەكەلدەردى ەسكەرىپ, ەلىمىزدىڭ ەنەرگەتيكالىق ورنىقتىلىعى مەن قاۋىپسىزدىگىن قامتاماسىز ەتۋگە سەپتىگىن تيگىزەدى. ورتالىقتى نازارباەۆ ۋنيۆەرسيتەتىنىڭ جانىندا بىرنەشە جىل قىزمەت اتقارىپ كەلە جاتقان ەنەرگەتيكالىق زەرتتەۋلەر ورتالىعى نەگىزىندە قۇرۋعا بولار ەدى. سەبەبى, بۇل ورتالىقتىڭ ماتەريالدىق-تەحنيكالىق بازاسى, زەرتحانالارى, كادرلارى, سونداي-اق, ەسىمدەرى الەمگە تانىمال شەتەلدىك عالىمداردى تارتۋدىڭ جۇزەگە اسقان تەتىكتەرى بار. قۇرىلاتىن ينستيتۋت ادامزاتقا بەلگىسىز مۇلدەم جاڭا قۋات كوزدەرىن اشۋمەن نەمەسە جاڭارتىلاتىن ەنەرگيا كوزدەرىن ارى قاراي دامىتۋمەن قولدانىستاعى تەحنولوگيالاردى جەتىلدىرۋ جولدارىن ىزدەپ, سونداي-اق, ەنەرگيانى ءوندىرۋ, ساقتاۋ جانە تاسىمالداۋ ماسەلەلەرىن شەشۋمەن اينالىسا الار ەدى», دەدى مينيستر. بريفينگ سوڭىندا ن. قاپپاروۆ قورشاعان ورتانى قورعاۋ جانە سۋ رەسۋرستارى مينيسترلىگىنىڭ ماماندارى ەلباسى جولداۋىندا بەلگىلەنگەن وسىنداي ناقتى جانە ماڭىزدى تاپسىرمالاردى ورىنداۋ ءۇشىن بار ىنتا-جىگەرلەرىن جۇمساپ, جۇمىس ىستەۋگە دايىن ەكەندىكتەرىن جەتكىزدى. ءلايلا ەدىلقىزى, «ەگەمەن قازاقستان».