ەلوردادا «ASHYQ» جوباسىنىڭ كوشباسشىلارىنىڭ ءتىزىمى بىرنەشە اپتا سايىن جاڭارتىلىپ وتىرادى. نۇر-سۇلتان قالاسى «اتامەكەن» كاسىپكەرلەر پالاتاسى ديرەكتورىنىڭ ورىنباسارى قۋانىشبەك مۇقاش كاسىپكەرلەرگە وسى ستاتۋستىڭ ارتىقشىلىقتارىن ايتىپ بەردى.
«نۇر-سۇلتان قالاسى بويىنشا قازىر «ASHYQ» جوباسىنا قاتىساتىن 13 مىڭنان استام كاسىپكەرلىك نىسان بار. قازىرگى ۋاقىتتا ەلوردادا وسى جوبانىڭ 294 كوشباسشىسى انىقتالدى. كوشباسشىلار وزگەلەرىنە قاراعاندا ەكى ساعات ارتىعىراق جۇمىس ىستەۋگە قۇقىلى. ال مەكەمە قىزمەتكەرلەرىنىڭ 90 پايىزى ەكپە العان بولسا, ولار كەلۋشىلەر سانىن كوبەيتۋگە قۇقىلى. مىسالى مەيرامحانالارعا كەلۋشىلەردىڭ 50%-ىن ءبىر ۋاقىتتا قابىلداۋعا رۇقسات ەتىلسە, ASHYQ كوشباسشىلارى بۇل ساندى 70%-عا دەيىن ارتتىرا الادى. مەيرامحانالار مەن كافەلەر ءۇشىن بۇل وتە جاقسى موتيۆاتسيا. بارلىعى كوشباسشى بولعىسى كەلەدى. بۇرىن 150 نىسان جوبا كوشباسشىسى بولسا, قازىر ولاردىڭ سانى 300-گە جۋىق», دەدى قۋانىشبەك مۇقاش.
بۇگىندە ەلوردانىڭ كاسىپكەرلىك نىساندارىنىڭ كوپشىلىگى «ASHYQ» جوباسىنا قاتىسا وتىرىپ, QR-كودتى سكانەرلەۋ ارقىلى ءوز قىزمەتىن جۇزەگە اسىرادى. وسىلايشا كوپتەگەن مەيرامحانادا كەلۋشىلەر سانى ارتتى. بۇل ازاماتتاردىڭ دەنساۋلىعىنىڭ قاۋىپسىزدىگىن قامتاماسىز ەتەدى جانە ءۇي كارانتينىن بۇزۋشىلاردى انىقتاۋعا مۇمكىندىك بەرەدى.
«ASHYQ» جوباسى بيزنەستىڭ, اسىرەسە كارانتين كەزىندە زارداپ شەككەن مەيرامحانانىڭ جۇمىسىنا كوپ كومەكتەسەدى. جاقىندا ءبىز «ASHYQ» كوشباسشىسى بولدىق, بۇل ءبىزدىڭ جۇمىس ۋاقىتىمىزدى كوبەيتتى. ەندى ءبىز بۇرىنعىداي 00:00-گە دەيىن ەمەس تۇنگى 2-گە دەيىن جۇمىس ىستەي الامىز, تيىسىنشە كەلۋشىلەر سانى 20%-عا ارتتى. كەلگەن جۇرت QR كودتى ەش قيىندىقسىز سكانەرلەيدى, ونىڭ ناتيجەسىندە ازاماتتاردىڭ كوپشىلىگىنىڭ ۆاكتسيناتسيالانعانىن بايقايمىز», دەپ اتاپ ءوتتى «KOREAN HOUSE» مەيرامحاناسىنىڭ مەنەدجەرى روزا يۋگاي.
«اسەم» سو ديرەكتورى نۇرلان نۇرماعانبەتوۆ «ASHYQ» جۇيەسىنىڭ ارتىقشىلىقتارىن اتاپ ءوتتى. ساۋدا ورتالىعى جوبانىڭ كوشباسشىسى بولىپ سانالادى.
«ASHYQ» جوباسىن ءبىز پيلوتتىق جوبا رەتىندە 23 شىلدەدە ىسكە قوستىق. بۇگىنگە دەيىن «قىزىل» جانە «سارى» ستاتۋسى بار 15-كە جۋىق تۇرعىن ساۋدا ورتالىعىنا كىرمەك بولدى. ال قازىر «ASHYQ» كوشباسشىسى بولىپ سانالامىز. ەكى اپتا ىشىندە 40 مىڭ check in جۇزەگە اسىرۋعا مۇمكىندىگىمىز بار. قازىرگى ۋاقىتتا جۇيەنى قولدانۋدا ەشقانداي پروبلەما تۋىندامايدى. عيماراتقا كەلۋشىلەردىڭ ءبارى ماسكا رەجيمى مەن قاشىقتىقتى ساقتايدى. ال جوبا كوشباسشىسى اتانعاندار ءۇشىن ارتىقشىلىقتار قاراستىرىلعان. سوندىقتان قالامىزداعى بارلىق نىسان جوبا اياسىندا كوشباسشى بولۋعا ۇمتىلۋى ءتيىس دەپ ەسەپتەيمىن. مىسالى, ەلوردا «قىزىل» ايماقتا بولسا, ءبىز كوشباسشى رەتىندە «سارى» ايماقتىڭ تالاپتارىنا سايكەس جۇمىس ىستەي الامىز. ال «سارى» ايماقتا بولساق, «جاسىل تالاپتارىنا سايكەس جۇمىس ىستەيمىز. بۇل بىزگە جۇمىس ۋاقىتىن 2 ساعاتقا ۇزارتۋعا, كەلۋشىلەر قاتارىن 10%-عا تولىقتىرۋعا مۇمكىندىك بەرەدى», دەدى نۇرلان نۇرماعامبەتوۆ.
