جيىندا ەلباسى كىتاپحاناسىنىڭ ديرەكتورى باقىتجان تەمىربولات ءوزى باسقارىپ وتىرعان مەكەمەنىڭ قىزمەتىنە توقتالىپ, كىتاپحانالاردىڭ نەگىزگى مىندەتى – ءبىلىمدى جيناقتاۋ, ساقتاۋ جانە بەرۋ ەكەندىگىن باسا ايتىپ ءوتتى.
− بۇل ميسسيانىڭ وزەكتىلىگى بۇگىندە كۇشەيىپ وتىر. ادامزات كەلەر كۇننەن ورىن الار زاڭدىلىقتاردى انىقتاۋ ءۇشىن تاريحقا ۇڭىلسە, سول تاريحتى قامتيتىن باعا جەتپەس عىلىمي اقپاراتتى كىتاپحانالار ناسيحاتتايدى. ەلباسى كىتاپحاناسى تاريحي اقپاراتتى جيناقتاۋ مەن ساقتاۋ تۇرعىسىنان كلاسسيكالىق كىتاپحانالارعا جاقىن, − دەدى ول.
ال ەلورداداعى ۇلتتىق اكادەميالىق كىتاپحانا ديرەكتورى ءۇمىتحان مۇڭالباەۆا مەملەكەت باسشىسى قاسىم-جومارت توقاەۆتىڭ «بالانىڭ وقۋعا دەگەن قىزىعۋشىلىعى, قورشاعان ورتانى كىتاپ ارقىلى تانۋى مەكتەپ قابىرعاسىندا قالىپتاسۋ كەرەك. ال كىتاپحانا وقۋشىنىڭ سول ىنتاسىن وياتىپ, ونى قىزىقتى كىتاپ الەمىنە جەتەلەۋى قاجەت» دەگەن ءسوزىن ايتا كەلىپ: «بۇگىندە, الەم جاڭا سىناقتاردى ەڭسەرىپ, ونىڭ ىشىندە پاندەميامەن كۇرەسىپ جاتقاندا, ادامنىڭ ءوزىن دامىتۋعا, جەتىلدىرۋگە بوس ۋاقىتى بار. بۇل جاعدايدا كىتاپحانا – ىزدەنۋدە كومەككە كەلەر ءبىرىنشى قۇرال», − دەدى.
سونداي-اق كونفەرەنتسيادا حالىقارالىق كىتاپحانالىق قاۋىمداستىقتار مەن مەكەمەلەر فەدەراتسياسى (IFLA) جانە اقش-تاعى كاماريلو كوپشىلىك كىتاپحاناسى مەن كاناداداعى ۆانكۋۆەر كوپشىلىك كىتاپحاناسىنىڭ قاتىسۋشىلارعا قۇتتىقتاۋ حاتى وقىلسا, ماسكەۋدەگى رەسەي مەملەكەتتىك كىتاپحاناسى باس ديرەكتورىنىڭ سىرتقى بايلانىستار جانە كورمە قىزمەتى جونىندەگى ورىنباسارى ناتاليا سامويلەنكو رۋحاني-مادەني قۇندىلىعى مول باسىلىمداردى ەلەكتروندى نۇسقاعا كوشىرۋدىڭ ماڭىزدىلىعىن ءسوز ەتتى.
فرانتسيا ۇلتتىق كىتاپحاناسى حالىقارالىق بايلانىستار ءبولىمىنىڭ قىزمەتكەرى جەرالدين شاتلار مەكەمە قورىندا قازاق تىلىندە جازىلعان 130-دان استام ادەبيەتتىڭ ساقتاۋلى تۇرعانىن جەتكىزىپ: «كىتاپحانامىزدىڭ مۇراسىن كەڭىنەن تاراتۋعا مۇددەلىمىز. ادامزاتتىڭ مادەني ميراسىن ساقتاۋ ءۇشىن ءبىز الەم كىتاپحانالارىمەن جۇمىس ىستەيمىز. وسى ورايدا تاجىريبەمىزبەن, يدەيالارىمىزبەن, وزىق بىلىمىمىزبەن بولىسۋگە دايىنبىز», دەدى. سانكت-پەتەربۋرگتەگى ب.ن.ەلتسين اتىنداعى پرەزيدەنتتىك كىتاپحانانىڭ اقپاراتتىق رەسۋرستار ديرەكتورى ەلەنا جابكو «رەسەيدىڭ مادەني مۇراسى: ونى ساقتاۋ مەن كەڭىنەن تاراتۋداعى كىتاپحانالاردىڭ ءرولى» تاقىرىبىندا بايىپتى بايانداما جاسادى.
سونىمەن قاتار جيىندا فيلولوگيا عىلىمدارىنىڭ دوكتورى, پروفەسسور يرجي شيما (پراگا), تۇركيا ۇلتتىق كىتاپحاناسى باسپاسىنىڭ باس ديرەكتورى الي وداباشا (انكارا), ەستونيا ۇلتتىق كىتاپحاناسى حالىقارالىق بايلانىستار ءبولىمىنىڭ مەڭگەرۋشىسى ماري كاننۋساار (تاللين), بەلارۋس رەسپۋبليكاسى جازۋشىلار وداعى (مينسك) توراعاسىنىڭ ورىنباسارى ەلەنا ستەلماح, م.ي.رۋدومينو اتىنداعى شەتەل ادەبيەتى كىتاپحاناسىنىڭ (ماسكەۋ) باس ديرەكتورى پاۆەل كۋزمين, «قارجى جاڭالىقتارى» سلوۆاكيالىق ينتەرنەت-باسىلىمىنىڭ باس رەداكتورى ۆلاديمير باچيشين جانە قازاقستان جازۋشىلار وداعىنىڭ توراعاسى, اقىن ۇلىقبەك ەسداۋلەت پەن پۋبليتسيست سادىبەك تۇگەل قاتىسىپ, كىتاپحانا سالاسى تۋرالى وزەكتى ويلارى مەن ۇسىنىستارىن ورتاعا سالدى.
