تۇساۋكەسەر باسەكەسىندە يتاليانىڭ مىقتى ويىنشىسى, الەمنىڭ بۇرىنعى 18-راكەتكاسى اندرەاس سەپپيدى سان سوقتىرىپ, جەرگىلىكتى جانكۇيەرلەردى قۋانتقان جەرلەسىمىز كەشە يليا يۆاشكومەن كەزدەستى. 27 جاستاعى بەلارۋس وكىلى بۇل كۇندەرى اتر رەيتينگىندە 52-ورىندا تۇر. بيىل ول ۋيمبلدوننىڭ ءتورتىنشى كەزەڭىنە دەيىن جەتسە, اقش-تىڭ اشىق بىرىنشىلىگىنىڭ ءۇشىنشى اينالىمىندا ونەر كورسەتتى. بۇل كەزدەسۋدە يۆاشكونىڭ شەبەرلىك دەڭگەيى سكاتوۆتان ءبىر باس جوعارى ەكەنى انىق بايقالدى. باسەكە 6:2, 6:3 ەسەبىمەن بەلورۋسسيالىق تەننيسشىنىڭ پايداسىنا شەشىلدى. وسىلايشا, ول Astana Open دوداسىنا قاتىسۋشىلار اراسىندا العاشقى بولىپ شيرەك فينالعا جولداما الدى.
دميتري پوپكو مەن اۋستراليالىق دجون ميللماننىڭ اراسىنداعى باسەكەدە وتانداسىمىز وسالدىق تانىتتى – 6:3, 1:6, 4:6. كەشە كەشكىسىن ميحايل كۋكۋشكين جاسىل قۇرلىقتىڭ تاعى ءبىر وكىلى دجەيمس داكۆوردپەن كۇش سىناستى. بۇگىن الەكساندر بۋبليك سەربيالىق ميومير كەتسمانوۆيچپەن سايىسقا تۇسەدى. ەندى وسى ەكى جەرلەسىمىزدەن جەڭىس كۇتەمىز. كۋكۋشكين دە, بۋبليك تە اتر دودالارى مەن «ۇلكەن دۋلىعا» ساناتىنداعى تۋرنيرلەرگە ۇزدىكسىز قاتىسىپ كەلە جاتقان ساقا سپورتشىلار.
ەستەرىڭىزگە سالا كەتەيىك, Astana Open ءتۋرنيرى 26 قىركۇيەككە دەيىن جالعاسادى. الەمدىك كورتتاردا ءبىراز بەدەل جيناعان ويىنشىلاردىڭ باسىن قوسىپ وتىرعان ايتۋلى جارىستىڭ جۇلدە قورى بيىلعى جىلى 480 مىڭ اقش دوللارىن قۇرايدى.
نۇر-سۇلتانداعى تۋرنيردەن بولەك, تاعى بىرنەشە جەرلەسىمىز ءتۇرلى باسەكەدە باق سىناۋدا. اتاپ ايتساق, چەحيانىڭ وستراۆا قالاسىنداعى WTA دوداسىنىڭ تۇساۋكەسەر كەزدەسۋىندە ەلەنا رىباكينا رەسەيلىك ۆەرونيكا كۋدەرمەتوۆانى 6:1, 6:3 ەسەبىمەن قاپى قالدىردى. يۋليا پۋتينتسەۆا اسا شيەلەنىستى وتكەن ويىندا قىتايلىق چجان شۋايدى شاڭ قاپتىردى – 5:7, 7:6, 6:4. بۇل باسەكە 3 ساعات 24 مينۋتقا سوزىلدى. ەكىنشى كەزەڭدە رىباكينا پولشالىق ماگدا لينەتپەن جولىقسا, پۋتينتسەۆا دا اتالعان مەملەكەتتىڭ وكىلى يگا سۆەنتەكپەن سايىسقا تۇسەدى.
