جانكۇيەرلەردىڭ العاشقى توبى 6 اقپاندا جولعا شىعادى

قازاقستان جانكۇيەرلەرىنىڭ العاشقى توبى سوچيدە وتەتىن XXII قىسقى وليمپياداعا 6 قاڭتاردا اتتانادى, دەپ حابارلادى يندۋستريا جانە جاڭا تەحنولوگيالار مينيسترلىگىنىڭ تۋريزم يندۋسترياسى كوميتەتى. باسقارما دەرەگى بويىنشا, سوچيدەگى قىسقى وليمپيا ويىندارى كەزىندە قاۋىپسىزدىك ساقتاۋ ماقساتىندا تۇڭعىش رەت جانكۇيەرلەرگە پاسپورت بەرىلەدى. ونسىز جانكۇيەرلەر قالاعا كىرە المايتىن كورىنەدى. «قازاقستان دەلەگاتسياسىنىڭ ءبىرىنشى توبى 6 اقپان كۇنى الماتىدان ۇشاتىن بولادى. ال ەكىنشى توپ 15 اقپاندا اتتانادى, – دەلىنگەن حابارلامادا. – جالپى, قازاقستاننىڭ رەسمي دەلەگاتسياسى مەن جانكۇيەرلەرى قاتارىنا 400-گە جۋىق ادام كىرەدى. ولاردىڭ ىشىندە سپورت ارداگەرلەرى, ەڭبەك سىڭىرگەن جاتتىقتىرۋشىلار, جاس سپورتشىلار مەن جۋرناليستەر, سونداي-اق جانكۇيەرلەر مەن ساياحاتشىلار بار». سوچيدە الماتى قالاسىن ەكسپو-2017 مەن XXIV قىسقى وليمپيا ويىندارىن وتكىزۋگە ۇمىتكەر رەتىندە ۇسىنۋ جونىندە بىرقاتار شارا ۇيىمداستىرۋ جوسپارلانىپ وتىر. سونىمەن قاتار, قازاقستاننىڭ تۋريستىك الەۋەتىن ارتتىرۋ ماقساتىندا ونداعى ساياحاتشىلار مەن جانكۇيەرلەرگە ارنايى ماتەريالدار تاراتىلادى. سوچيدەگى قىسقى وليمپيا ويىندارى 2014 جىلعى 7-23 اقپان ارالىعىندا وتەدى. وندا قازاقستاننىڭ مۇددەسىن 10 سپورت تۇرىنەن باق سىنايتىن 50 سپورتشى قورعاماق. ايدار ورىسباەۆ, «ەگەمەن قازاقستان».