پرەزيدەنت • 22 قىركۇيەك، 2021

قاسىم-جومارت توقاەۆ: ءبىز شىنىمەن دە جاقسى الەم قۇرۋىمىز كەرەك

55 رەت كورسەتىلدى

اقوردانىڭ رەسمي سايتىندا قاسىم-جومارت توقاەۆتىڭ COVID-19 پاندەمياسىنا قارسى كۇرەسكە ارنالعان جاھاندىق سامميتتە سويلەگەن ءسوزى جاريالاندى، دەپ جازادى Egemen.kz.

«پاندەميانى توقتاتىپ، قايتا جاڭعىرۋدى جاقسارتۋ»

بۇۇ باس اسسامبلەياسىنىڭ جوعارى دەڭگەيدەگى 76-شى سەسسياسى

پرەزيدەنت مىرزا!

باس حاتشى مىرزا!

قۇرمەتتى سامميتكە قاتىسۋشىلار! حانىمدار مەن مىرزالار!

وسى ءسامميتتى دەر كەزىندە ۇيىمداستىرعاندارىڭىزعا ريزاشىلىعىمدى بىلدىرۋگە رۇقسات ەتىڭىزدەر.

الەم سوڭعى ونجىلدىقتاردا دەنساۋلىق ساقتاۋ سالاسىنىڭ بۇرىن-سوڭدى بولماعان عالامدىق داعدارىسىنا ۇشىراپ وتىر. سونىڭ سالدارىنان تۋىنداعان ەكونوميكالىق قيىندىقتار تەڭسىزدىكتەردى ارتتىردى جانە عالامدىق قوعامداستىقتىڭ شاراسىزدىعىن كورسەتتى.

قالىپتاسقان جاعداي جان-جاقتى ءارى ناقتى شارالار قابىلداۋدى تالاپ ەتەدى.

ءبىزدىڭ باستى مىندەتىمىز – شۇعىل تۇردە ۆاكتسيناعا جاھاندىق قولجەتىمدىلىكتى ارتتىرۋ بولۋى كەرەك دەپ ويلايمىن.

بۇل عالامدىق ەتيكا مەن بىرلىكتىڭ ماسەلەسى. ويتكەنى ۆاكتسينالارعا قول جەتكىزۋدەگى ادىلەتسىزدىك حالىقتىڭ دەنساۋلىعىنا نۇقسان كەلتىرىپ قانا قويماي، قوعامداعى الشاقتىقتى ودان ءارى ۇلعايتا بەرمەك.

ءبىز ۆاكتسينالاردىڭ ەكى ميللياردتان استام دوزاسىمەن قامتاماسىز ەتۋگە جانە دەنساۋلىققا تونگەن جاھاندىق قاتەرلەردەن ۇجىمدىق قورعانىستى جاقسارتۋعا باعىتتالعان جان-جاقتى كۇش جۇمىلدىرۋدى قۇپتايمىز. دۇنيەجۇزىلىك «ۇجىمدىق يممۋنيتەتكە» ۇلەس قوسا وتىرىپ، قازاقستان QazVac ۆاكتسيناسىن جاساۋ ارقىلى ەكپە ويلاپ تاپقان الەمدەگى العاشقى ون ەلدىڭ قاتارىنا ەندى.

جۋىردا QazVac كوروناۆيرۋستىڭ دەلتا شتاممىنا توتەپ بەرە الاتىنداي كۇشەيتىلدى. بۇگىندە قازاقستان حالقىنىڭ 31 پايىزى ەكپەنى تولىق الدى. ازاماتتارىمىز ەركىن تاڭداۋ جاساۋى ءۇشىن ۆاكتسينانىڭ بىرنەشە ءتۇرىن جەتكىلىكتى دەڭگەيدە ۇسىنىپ وتىرمىز. وسى ءسامميتتىڭ پايدالى يدەيالارى مەن ماقساتتارىن جۇزەگە اسىرۋ ءۇشىن ءبىز ناقتى ىشكى جوسپارلارىمىز بەن مىندەتتەمەلەرىمىزدى ازىرلەدىك. قازاقستاندا ۇلتتىق بيولوگيالىق قاۋىپسىزدىك جۇيەسىن قۇرۋدىڭ زاڭنامالىق نەگىزى ازىرلەنگەن.

ءبىز حالىقارالىق ستاندارتتارعا سايكەس كەلەتىن بيولوگيالىق قاتەرلەردى بولجاۋعا ارنالعان كەشەندى ءارى جوعارى تەحنولوگيالىق قۇرىلىم جاساقتاۋعا ۇمتىلامىز.

اقش باسشىلىعىنىڭ كۇش-جىگەرى مەن پرەزيدەنت بايدەننىڭ «الەمدى جاقسارتۋ» جاھاندىق باستاماسى اياسىندا سەرىكتەستىكتى دامىتۋ ارقىلى ۇجىمدىق ءىس-قيمىلداردى قامتاماسىز ەتۋگە ۇمتىلىسىن جوعارى باعالايمىز. سوندىقتان قازاقستان ءسىزدىڭ ۇسىنىپ وتىرعان مىندەتتەردى بەكىتۋ تۋرالى كوزقاراسىڭىزبەن كەلىسە وتىرىپ، وسى ماقساتقا قول جەتكىزۋ ءۇشىن ءوز ۇلەسىن قوسۋعا دايىن. ءبىزدىڭ تاجىريبەمىزگە جانە عىلىمي زەرتتەۋلەرگە سۇيەنە وتىرىپ، كەشەندى شارالاردى جۇزەگە اسىرۋ جونىندە بىرقاتار باستامالاردى اتاپ وتكىم كەلەدى.

بىرىنشىدەن، عالامدىق دەڭگەيدەگى الەۋەتتى ارتتىرۋعا نازار اۋدارۋىمىز كەرەك. بىزگە دۇنيەجۇزىلىك دەنساۋلىق ساقتاۋ ۇيىمى بەكىتكەن العاشقى مەديتسينالىق-سانيتارلىق كومەك سالاسىنداعى الماتى دەكلاراتسياسىنىڭ نەگىزگى قاعيداتتارىن ناسيحاتتاۋ قاجەت.

ءبىز بولاشاقتا بيولوگيالىق اپاتتار مەن داعدارىستاردىڭ الدىن الۋ ءۇشىن كۇش بىرىكتىرۋىمىز كەرەك. وسىنى ەسكەرە وتىرىپ، بىلتىر مەن بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋ تۋرالى باستاما كوتەردىم. بارلىق مۇددەلى تاراپتارمەن تاجىريبەلىك كونسۋلتاتسيالار ءجۇرىپ جاتىر. ءبىز سەرىكتەستەردى وسى باستامانى قولداۋعا شاقىرامىز.

ەكىنشىدەن، جاھاندىق تۋريزم مەن بيزنەسكە COVID-19 پاندەمياسىمەن كۇرەستە كومەكتەسۋ ءۇشىن ۆاكتسينا سەرتيفيكاتتارىن ءوزارا مويىنداۋ باعىتىندا جۇمىس ىستەۋ ماڭىزدى. مەديتسينالىق سەرتيفيكاتتار پاندەميادان كەيىنگى كەزەڭدە جۇمىستى قاۋىپسىز قايتا قالپىنا كەلتىرۋگە، ەكونوميكانىڭ تەز وڭالۋىنا جانە جاڭا جۇمىس ورىندارىنىڭ اشىلۋىنا ىقپال ەتەدى.

ۇشىنشىدەن، ءبىز COVID-19 ۆاكتسينالارىنا دەگەن سەنىمدى ارتتىرۋ ءۇشىن الەۋمەتتىك جەلىلەردىڭ قۇرالدارىن قولدانۋىمىز كەرەك. ماسس-مەدياداعى عىلىمي نەگىزدەلگەن اقپاراتتاردىڭ تاپشىلىعىنان قوعامدا كۇمان نەمەسە سەنىمسىزدىك بار. ءبىز حالىقتىڭ ۆاكتسيناعا دەگەن سەنىمىن ارتتىرۋ ءۇشىن ءتۇسىندىرۋ جۇمىستارىندا ناقتى دەرەكتەرگە سۇيەنۋىمىز كەرەك.

ءبىز شىنىمەن دە جاقسى الەم قۇرۋىمىز كەرەك، سونىمەن قاتار ءادىل، ورنىقتى، ەكولوگيالىق تازا جانە ىزگىلىككە نەگىزدەلگەن «جاڭا الەم» قالىپتاستىرعان ابزال. راقمەت!

سوڭعى جاڭالىقتار

ددسۇ QazVac-تى قاشان مويىندايدى؟

كوروناۆيرۋس • بۇگىن، 12:35

ۇقساس جاڭالىقتار