گولوۆكين بيىلعى جىلدى دا جەڭىسپەن باستادى

وتكەن جىلى كاسىپقويلار رينگىندە 4 كەزدەسۋ وتكىزىپ, سونىڭ بارلىعىن دا مەرزىمىنەن بۇرىن بىتىرگەن قازاقستاندىق گەننادي گولوۆكين بيىلعى جىلدى دا جەڭىسپەن باستادى. ول اقپاننىڭ 2-سىنە قاراعان ءتۇنى موناكونىڭ مونتە-كارلو قالاسىندا گانالىق وسۋمانۋ ادامامەن قولعاپ ءتۇيىستىرىپ, ونى 7 راۋندتا نوكاۋتپەن ۇتتى. بۇل جولى ءوزىنىڭ WBA جانە IBO نۇسقالارى بويىنشا الەم چەمپيونى دەگەن اتاعىن قورعاعان گەننادي ۇرىستىڭ باسىنان باسىمدىعىن بايقاتتى. گونگ سوعىلىسىمەن بۋىرقانعان بۋراداي ارقىراپ العا ۇمتىلعان قاراعاندىلىق قابىلان قارسىلاسىن تاپتاپ وتە شىعاتىنداي بولىپ كورىندى. شىنىندا سولاي بولدى. ءبىرىنشى راۋندتا-اق العاشقى نوكداۋنىن الىپ ۇلگەرگەن وسۋمانۋ اداما بۇدان كەيىن ءبىزدىڭ باعلانعا سەس تانىتاتىنداي قارسىلىق كورسەتە المادى. ۋاقىت ۇزاعان سايىن قارقىنىن ۇدەتكەن گەنا ونى التىنشى راۋندتا تاعى ءبىر ەسەڭگىرەتىپ تاستادى. وسى تۇستا-اق ادامانىڭ ادىمى ۇزاققا بارا قويماسى اڭعارىلىپ قالدى. سول كورىنگەن كوكجيەك كەلەسى راۋندتا الدىمىزدان جارقىراپ شىعا كەلدى. قارسىلاسىن تاعى ءبىر ۇرىپ قۇلاتقان گەننادي گولوۆكين تەحنيكالىق نوكاۋتپەن جەڭىسكە جەتتى. وسىلايشا, قازاقستاندىق بوكسشى كاسىپقويلار رينگىندە وتكىزگەن 29 ۇرىسىن تۇگەل جەڭىسپەن اياقتاپ شىقتى. سولاردىڭ 26-سى ءدال وسىلاي مەرزىمىنەن بۇرىن اياقتالدى. ءبىزدىڭ باعلاننىڭ كەلەسى جەكپە-جەگىنىڭ وتەتىن ۋاقىتى بولىپ 26 ءساۋىر بەلگىلەنىپ وتىر. ازىرگە ونىڭ سول كۇنگى قارسىلاسى كىم ەكەنى بەلگىسىز. رۋسلان يگىلىك.