القا وتىرىسىندا انىقتالعان وڭ قادامدار

كەشە استانادا پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆتىڭ قاتىسۋىمەن كولىك جانە كوممۋنيكاتسيالار مينيسترلىگىنىڭ القا وتىرىسى بولدى. وعان اتالعان سالانىڭ ءمينيسترى اسقار جۇماعاليەۆ توراعالىق ەتتى. ماجىلىستە وتكەن جىلعى جۇمىستار قورىتىندىلانىپ, الدا اتقارىلاتىن مىندەتتەر ناقتىلاندى. القا ماجىلىسىنە سالا ماماندارىمەن قاتار, پارلامەنت دەپۋتاتتارى مەن پرەزيدەنت اكىم­شىلىگى قىزمەتكەرلەرى كەلدى. جي­نالعان قاۋىمدى كۇن تارتىبىمەن تانىستىرعان ا.جۇماعاليەۆ, وتكەن جىلدىڭ قورىتىندىسى تۋرالى بايانداي كەلىپ, ءدال بۇگىنگى كۇندە مينيسترلىكتىڭ الدىندا تۇرعان مىندەتتەر جونىندە اڭگىمەلەدى. مەملەكەت باسشىسى مەن ۇكىمەت جۇكتەگەن تاپسىرمالار مۇلتىكسىز ىسكە اسىرىلىپ جاتقانى جايلى ايتتى. «وتكەن جىلى 2200 شاقىرىم رەسپۋبليكالىق ماڭىزى بار اۆتو­جول جوندەلدى. زامان تالابىنا ساي 13 بىردەي ەلەكتروندى تارازى ورناتىلدى. سونداي-اق, كولىكتىك باقىلاۋدىڭ 11 تۇراقتى بەكەتى جابى­لىپ, تەڭىز پورتتارىنىڭ جۇك­تەردى وتكىزۋ قابىلەتى 16,8 ملن. تونناعا دەيىن ۇلعايتىلدى. ال, اۋەدە 15 حالىقارالىق اۆيامار­شرۋت, تەمىرجولدا 6 بىردەي جولاۋشى باعىتى اشىلدى. وعان قوسا, 241 قىزمەت كورسەتۋ مەن رۇقسات بەرۋ جۇيەسى اۆتوماتتاندى­رىلدى. تاعى ءبىر جەتىستىگىمىز, ۇيالى بايلانىس وپەراتورلارى اراسىنداعى ينتەركوننەكت ءمول­شەرى 15 پايىزعا تومەندەتىلىپ, وبلىس ورتالىقتارىندا 4G قىز­مەتىن قوسۋ ءىسى باستالدى. سون­داي-اق, ەل تۇرعىندارىنىڭ تەڭ­ جارتىسى ەفيرلىك ساندىق تەلەرا­ديو­تارالىمعا قول جەتكىزدى», دەدى مينيستر. ەلدەگى اۆتوجولدار دا ا.جۇما­عا­ليەۆتىڭ نازارىنان تىس قال­مادى. «بۇيىرتسا, اعىمداعى جىلى استانا-بۋراباي اقىلى تاس جولىنان 1 ميلليارد تەڭگەدەن استام قارجى تۇسەدى دەپ وتىرمىز. وسىلايشا, بۇل ۋچاسكەنى كۇتۋدىڭ بارلىق شىعىنىن تولىق جابامىز», دەپ قايىردى ول. نەگىزى اۆتوجول اقىلى بولعاننان بەرى شامامەن جارتى ميللياردتاي تەڭگە جينالىپتى.  مينيستر وتكەن جىلى جەمىستى اتقارىلعان جۇمىستاردى تىزبەلەي كەلىپ, جولداردى جوندەۋ ىسىنە كوپتەپ جاڭا تەحنيكا-تەحنولوگيالار تارتىلىپ جاتقانىنا توقتالدى. بىلتىر اۆتوپارك­تەر مەن تەمىرجول پاركتەرىنىڭ ايتارلىقتاي جاڭارىپ, جاڭعىرعانىن تىلگە تيەك ەتتى. ماسەلەن, اۆتوپاركتەر 1700 جاڭا اۆتوبۋس پەن 840 جاڭا جۇك ماشيناسىمەن تولىعىپتى. تەمىرجولدا 97 لوكوموتيۆ, 1704 جۇك جانە 237 جولاۋشى ۆاگوندارى جاڭالانىپتى. كوممۋنيكاتسيا سالاسىنا دا كەڭىنەن توقتالعان مينيستر ۇستىمىزدەگى جىلى ورىندالاتىن مىندەتتەر جونىندە ايتتى. 2014 جىلى ەلىمىزدە رەس­پۋب­لي­كا­لىق ماڭىزى بار 2,3 مىڭ شا­قىرىم اۆتوجول جوندەلىپ, 18 قوسىمشا ەلەكتروندى تارازى ورناتىلادى. جاڭادان 5 جو­عا­رى جىلدامدىقتى تەمىرجول با­عىتتارى ىسكە قوسىلادى. بۇدان بولەك, 13 اۋە باعدارى اشىلىپ, 160 ەلەكتروندى قىزمەت پەن رۇقسات بەرۋ قۇجاتتارى اۆتوماتتاندىرىلاتىن بولادى. دەسە دە, بيىلعى نەگىزگى جۇمىس مەملەكەت باسشىسىنىڭ تاپسىرماسى بويىنشا ازىرلەنگەن كولىك ينفراقۇرىلىمىن دامىتۋ جونىندەگى 2010-2014 جىلدارعا ارنالعان جانە «اقپاراتتىق قازاقستان-2020» مەملەكەتتىك باع­دارلاماسىندا قاراستىرىلعان شارالار اياسىندا اتقارىلادى, دەدى ا.جۇماعاليەۆ. بيىل «ەلەكتروندى ۇكىمەت» دامۋىنىڭ جاڭا كەزەڭى باستالادى ەكەن. اتاپ ايتقاندا, smart government دامىتۋ جونىندەگى جۇمىس جالعاسادى. ول بويىنشا ازاماتتىڭ جەكە كابينەتى جاسالادى. ول e-gov پورتالىنىڭ پايدالانۋشىسىنا ءوزىنىڭ جەكە دەرەكتەرىن باقىلاۋعا مۇمكىندىك بەرەدى. سونىمەن قاتار, 160 ەلەكتروندى قىزمەتتى اۆتوماتتاندىرۋ جوس­پارلانىپ وتىرىلعان كورىنەدى. ۇتقىر ەلەكتروندى قىزمەتتەر مەن سەرۆيستەر ءتىزىمى 50-گە دەيىن كەڭەيتىلمەك. مينيسترلىك ۇيالى بايلانىس ساپاسىن ارتتىرۋ ماقساتىندا اي­ماقتاردا تەكسەرۋ جۇمىسىن ءارى قاراي جالعاستىرا بەرمەك. ودان تىس 2014 جىلعى MNP-ابو­نەنتكە ءوز ءنومىرىن ساقتاي وتىرىپ, وپەراتوردى اۋىستىرۋىنا مۇمكىندىك بەرەتىن تەحنولوگيانى تەستىلەۋ ۇيعارىلىپتى. وسىناۋ جاعىمدى اقپاراتتارمەن بايانداماسىن اياقتاعان مينيستر مەملەكەت باسشىسى مەن ۇكىمەتتىڭ بيىلعى جىلعا جۇكتەگەن مىندەتتەرىن تولىق ورىندايتىندارىن ايتتى. القا ءماجىلىسىن پرەمەر-ءمينيستردىڭ ءبىرىنشى ورىنباسارى ب.ساعىنتاەۆ قورىتىن­دى­لادى. «مەملەكەت باسشىسى «قازاقستان جولى – 2050: ءبىر ماقسات, ءبىر مۇددە, ءبىر بو­لا­شاق» اتتى جولداۋىندا كو­لىك جانە كوممۋنيكاتسيالار سا­لاسىندا ات­قارىلۋعا ءتيىس جۇمىستاردى ناقتىلاپ بەردى. ول مىندەتتەردى جۇزەگە اسىرۋعا مەملەكەتىمىزدىڭ شاماسى جەتەدى. سوندىقتان الدىن الا جاسالعان باعدارلامالار مەن ولارداعى جوبا-جوسپارلاردى دۇرىس جۇيەلەپ, جۇزەگە اسىرۋ جولدارىن ايقىنداپ الۋ كەرەك», دەدى ۇكىمەت باسشىسىنىڭ ءبىرىنشى ورىنباسارى. «بۇگىندە جەمىستى جۇرگىزىلىپ جاتقان جۇمىستارعا قاراماستان, جولدىڭ ساپاسىنا قاتىستى ماسەلەلەر ءالى دە وزەك­تى. قازىرگى ۋاقىتتا جەرگىلىكتى ماڭىزداعى جولداردىڭ – 40, رەس­پۋبليكالىق تاسجولداردىڭ 20 پايىزىنىڭ جاعدايى قاناعات­تانارلىقسىز. سوندىقتان وسى باعىتتاعى جۇمىسقا ۇلكەن كوڭىل ءبولۋ كەرەك», دەپ جالعادى ءسوزىن ب.ساعىنتاەۆ. ونىڭ ايتۋىنا قاراعاندا, كولىك جاعدايى دا كوڭىل قۋانت­پايدى. ءالى كۇنگە دەيىن كوپ­تە­گەن ەلدى مەكەندەر اۆتوبۋس­پەن تولىق قامتىلماعان ەكەن. قامتىلعاندارىنىڭ توزۋى جوعارى دەڭگەيدە. وكىنىشكە قا­راي, بۇل كورسەتكىش 80 پايىزعا جۋىق كورىنەدى. كەدەن وداعىنىڭ تەحنيكالىق رەگلامەنتىنە سايكەس, 2015 جىل­دىڭ 1 قاڭتارىنان باستاپ وداق اۋ­ماعىندا ەۋرو-5 ستاندارتى ەن­گىزىلەدى. رەسەي مەن بەلورۋسسيا وسى ستاندارتقا وتكەن. بۇل ءبىز­دىڭ ەلگە دە قاتىستى. كولىك جانە كوممۋنيكاتسيا مينيسترلىگى مەن جەرگىلىكتى اتقارۋشى ورگاندار­ ەلىمىز ەۋرو-5 ستاندارتىنا كوش­كەن­گە دەيىن اۆتوبۋس پاركتەرىن مەي­لىنشە جاڭارتۋلارى قاجەت, دەدى ب.ساعىنتاەۆ. سەبەبى, كەلەر جىلدىڭ باسىنان باستاپ اۆتوبۋستاردىڭ باعاسى 18 پايىزعا دەيىن قىمباتتايدى ەكەن. سوندىقتان, پرەمەر-ءمينيستردىڭ ءبىرىنشى ورىنباسارى بۇل شارۋاعا ۇلكەن ءمان بەرىپ, وڭ قادام جاساۋ كەرەكتىگىن ەسكەرتتى. نۇرباي ەلمۇراتوۆ, «ەگەمەن قازاقستان».