ىنتىماقتاستىقتىڭ جاڭا مازمۇنى

قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ استاناعا رەسمي ساپارمەن كەلگەن نيدەرلاند كورولدىگىنىڭ سىرتقى ىستەر ءمينيسترى فرانس تيممەرمانسپەن كەزدەستى, دەپ حابارلادى سەناتتىڭ ءباسپاسوز قىزمەتى. جۇزدەسۋشىلەر ەكىجاقتى قاتىناستاردىڭ ءارتۇرلى ماسەلەلەرى جانە الەمدەگى جاعدايلار تۋرالى پىكىر الماستى. سەنات توراعاسى اتاپ وتكەندەي, نيدەرلاند قازاقستاننىڭ ەۋروپالىق وداقتاعى نەگىزگى ارىپتەستەرىنىڭ ءبىرى بولىپ تابىلادى. پرەزيدەنت ن.نازارباەۆتىڭ جىل سايىنعى حالىققا جولداۋىنداعى مىندەتتەر اياسىندا ەكىجاقتى ىنتىماقتاستىقتىڭ ەكونوميكالىق جانە عىلىمي-تەحنيكالىق ماسەلەلەرى جاڭا مازمۇنعا يە بولىپ كەلەدى. ءوز كەزەگىندە ف.تيممەرمانس قازاقستان­نىڭ الەمدەگى دامىعان 30 ەلدىڭ قاتارىنا كىرۋ ستراتەگياسىنا جوعارى باعا بەردى. نيدەرلاند اۋىل شارۋاشىلىعى جانە بالاما ەنەرگەتيكا سالالارىندا تاجىريبە الماسۋ ارقىلى بۇل جوباعا قاتىسۋعا نيەتىن ءبىل­دىردى. بيىلعى جىلعى ناۋرىز ايىندا گااگاداعى يادرولىق قاۋىپسىزدىك جونىندەگى سام­ميت قارساڭىندا نيدەرلاند ءسىم باسشىسى يادرولىق قارۋسىزدانۋ ماسەلەلەرىندەگى قازاقستان كوشباسشىلىعىنىڭ ءمانى زور ەكەنىن اتاپ ءوتتى. كەزدەسۋ بارىسىندا ق.توقاەۆ قازاقستان مەن نيدەرلاند پارلامەنتارالىق بايلانىستارى تۋرالى ءوز ويلارىمەن ءبولىستى. اتاپ ايتقاندا, قازاقستاندا گوللاند دەپۋتاتتارىنىڭ, ونىڭ ىشىندە نيدەرلاند سەناتى توراعاسىنىڭ وزەكتى ماسەلەلەر بويىنشا پىكىر الماسۋ ءۇشىن استاناعا ساپارى ەكىجاقتى ىنتىماقتاستىققا سەرپىن بەرەدى دەپ سانايدى. ودان باسقا, قازاقستان پارلامەنتىنىڭ دەپۋتاتتارى ەقىۇ پارلامەنتتىك اسسامبلەياسى اياسىندا كوپتاراپتى بايلانىستاردى دامىتۋعا دا نيەتتەنىپ وتىر.