ايماقتار • 22 قىركۇيەك، 2021

بالقاشتان باستاۋ الدى

30 رەت كورسەتىلدى

قاراعاندى وبلىستىق مادەنيەت، مۇراعاتتار جانە قۇجاتتاما باسقارماسى جانە مادەني ويىن-ساۋىق جانە حالىق شىعارماشىلىعىنىڭ عىلىمي-ادىس­تەمەلىك ورتالىعى ۇيىمداستىرعان «سارى­ارقانىڭ كوشپەلى مادەنيەتى» اتتى وڭىرلىك فەستيۆالى بالقاش قالاسىندا ءوتتى.

ارقا توسىندە تۇڭعىش ۇيىمداستىرىلعان ءىس-شارانىڭ ماقساتى دا ايقىن. ول ۇلتىمىزدىڭ باي مادەنيەتىن شى­عارماشىلىق، مۋزىكا، قولونەر، ويىن-ساۋىق جانە سپورت ارقىلى كورسەتۋ ەدى.

فەستيۆال اياسىندا «شەبەرلەر قالاسى» دەگەن تا­قىرىپتا حالىق قولونەرشىلەرىنىڭ ەكسپوزيتسياسى كەلۋ­شىلەر نازارىنا ۇسىنىلدى. بالقاشتاعى م.حامزين اتىنداعى مادەنيەت سارايىنىڭ ءىشى كيىز كىلەمدەرگە، تەكەمەتتەرگە، زەرگەرلىك بۇيىمدارعا، ۇلتتىق ناقىشتاعى كيىم-كەشەكتەرگە تولىپ كەتتى. بۇدان بولەك، ۇلتتىق تاعام­دار كورمەسى دە كەلۋشىلەردىڭ نازارىن وزىنە اۋداردى. ال جەرگىلىكتى سپورتشىلار بولسا، قازاق كۇرەسى، اسىق اتۋ جانە توعىزقۇمالاق سىندى ۇلتتىق سپورت تۇرلەرىنەن ءوز شەبەرلىكتەرىن كورسەتتى.

ارنايى قۇرىلعان قازىلار القاسى ونەرپازداردىڭ شىعارماشىلىق دارىنىنا باعا بەرگەننەن كەيىن، جە­ڭىم­پازدار مەن جۇلدەگەرلەرگە سىي-سىياپاتتار جاسال­دى. سونداي-اق «سايىن دالام – سارىارقا» اتتى تەاتر­لاندىرىلعان قويىلىمدا انشىلەر مەن ايتىسكەرلەر جۇرت الدىندا ونەر كورسەتىپ، قازىلار مەن كوپشىلىكتىڭ ىقىلاسىنا بولەندى.

وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ بال­قاشتان باستاۋ العان «سارىارقانىڭ كوشپەلى مادەنيەتى» فەستيۆالى الداعى ۋاقىتتا وساكاروۆ، بۇقار جىراۋ، نۇرا جانە اباي اۋداندارىندا، سونىمەن بىرگە قاراعاندى مەن تەمىرتاۋ قالالارىندا جالعاساتىنىن ايتادى.

ال بايقاۋ مارەگە جەتكەننەن كەيىن، ۇزدىك شىققان ونەرپازدار مەن شەبەرلەر جەلتوقسان ايىندا كەنشىلەر استاناسىندا وتەتىن گالا-كونتسەرتتە ونەر كورسەتەتىن بولادى.

 

قاراعاندى وبلىسى،

بالقاش قالاسى

 

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار