بۇل جادىگەرلەردى مۋزەيگە 2015 جىلى «ۇلتتىق مۋزەيگە سىي تارتۋ» اكتسياسى اياسىندا قايراتكەردىڭ ۇلى سايان جۇمابەك ۇلى تاپسىرىپتى. ونىڭ ىشىندە جۇمابەك اعامىزدىڭ قالتا ساعاتى, كوزىلدىرىگى, قولجازبالارى جانە لەنين وردەنى مەن دەپۋتاتتىق كۋالىگى بار.
جۇمابەك تاشەنوۆ قازىرگى اقمولا وبلىسى ارشالى اۋدانىنداعى تاناكول دەگەن اۋىلدا ومىرگە كەلىپ, العاشقى ەڭبەك جولىن ءوزىنىڭ تۋعان جەرىنەن باستايدى. ەكىنشى دۇنيەجۇزىلىك سوعىس كەزىندە اقمولا مەن سولتۇستىك قازاقستان وبلىسىندا جاۋاپتى قىزمەتتەر اتقارىپ, 1952-55 جىلدارى اقتوبە وبلىسى پارتيا كوميتەتىنىڭ ءبىرىنشى حاتشىسى بولدى. ودان كەيىن قازاق كسر جوعارعى كەڭەسى تورالقاسىنىڭ توراعاسى, 1960 جىلى قازاق كسر مينيسترلەر كەڭەسىنىڭ توراعالىعىنا تاعايىندالىپ, وسى قىزمەتتە جۇرگەندە قازاق جەرىنىڭ تۇتاستىعىن ساقتاپ قالۋعا كوپ ەڭبەك ءسىڭىردى. ءدال سول جىلدارى تىڭ ولكەسىنە بىرىكتىرىلگەن سولتۇستىك وبلىستاردى رەسەيگە, وڭتۇستىكتەگى ماقتا وسىرەتىن اۋدانداردى وزبەكستانعا بەرۋ جونىندە ماسەلە كوتەرىلگەندە, سوعان بىردەن قارسىلىق كورسەتتى. سونىمەن بىرگە ماڭعىستاۋدى تۇرىكمەنستانعا قوسۋ تۋرالى ۇسىنىسقا دا كەلىسىم بەرمەگەن. سونداي-اق اقىن-جازۋشىلارىمىزدىڭ ءۇنى «قازاق ادەبيەتىن» جابۋ مەن سول كەزدەگى رەسپۋبليكالىق «سوتسياليستىك قازاقستان» گازەتىن «كازاحستانسكايا پراۆدانىڭ» اۋدارماسى ەتىپ شىعارۋعا قارسى بولىپ, ۇلتتىق باسىلىمداردىڭ جابىلىپ قالماۋىنا قايراتكەرلىك تانىتتى.وسىلاي تۋعان حالقىنىڭ قورعانى بولعان ەسىل ەرگە «ۇلتشىل» دەگەن جالا جابىلىپ, حرۋششەۆتىڭ نۇسقاۋىمەن قىزمەتتەن بوساتىلىپ, 1961 جىلى بۇگىنگى تۇركىستان وبلىسىنا كىشىگىرىم قىزمەتكە جىبەرىلدى. اسىل ازامات 1986 جىلى شىمكەنت قالاسىندا 71 جاسىندا دۇنيەدەن وزدى.
