ەل پرەزيدەنتى قاسىم-جومارت توقاەۆ «تاۋەلسىزدىك – قازاقستان مەملەكەتتىلىگىنىڭ بەرىك تىرەگى» ەكەنىن, ال «مەرەيتوي ساياسي-ەكونوميكالىق رەفورمالار, تسيفرلاندىرۋ, بالالار مەن مۇگەدەكتەردىڭ قۇقىعىن قورعاۋ, ەكولوگيا ماسەلەسىن شەشۋ اياسىندا وتەتىنىن» اتاپ ءوتتى.
ەلىمىزدەگى بۇقارالىق اقپارات قۇرالدارى جىل بويى قازاقستاندىقتاردىڭ نازارىن ەل تاريحىنىڭ اتاۋلى كەزەڭىنە اۋدارعانى بەلگىلى. بۇل – وتە دۇرىس قادام. ويتكەنى جەكەلەگەن تۇلعالاردىڭ ەڭبەگى مەن قىزمەتىنە قاراپ, جاس مەملەكەتتىڭ قالىپتاسۋى مەن دامۋىنىڭ تۇتاس كورىنىسىن قالىپتاستىرۋعا بولادى.
1991 جىلعى 16 جەلتوقساندا قازاقستان رەسپۋبليكاسىنىڭ جوعارعى كەڭەسى «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق زاڭدى قابىلدادى. سول قيىن-قىستاۋ كەزەڭدە قازاقستان حالقى ءۇشىن تاعدىرشەشتى قۇجاتتى ازىرلەۋ ەڭ العاشقى ماڭىزدى ءارى نەگىزگى جەتىستىك بولدى. بۇل قادام جاڭا دەموكراتيالىق مەملەكەت پەن قوعامنىڭ ىرگەتاسىن قالادى. وسىلايشا, دۇنيەجۇزىنىڭ ساياسي كارتاسىندا قازاقستان اتتى مەملەكەت پايدا بولىپ, جەكە شەكاراسى بەلگىلەنىپ, نەگىزگى قۇجاتتارى قابىلداندى.
قازىر ءبىز جان-جاقتى دامىپ, كوركەيىپ كەلە جاتقان ەلدە ءومىر سۇرەمىز. دۇنيەجۇزىلىك بانكتىڭ دەرەكتەرى بويىنشا, 2006 جىلى قازاقستان تابىسى ورتاشا دەڭگەيدەن جوعارى ەلدەر قاتارىنا, ال 2012 جىلى الەمنىڭ باسەكەگە قابىلەتتى ەلۋ ەكونوميكاسىنىڭ قاتارىنا كىردى, 2015 جىلى دۇنيەجۇزىلىك ساۋدا ۇيىمىنىڭ تەڭ قۇقىلى مۇشەسى اتاندى.
ەلدەگى كوپتەگەن وڭ وزگەرىسكە تىكەلەي قاتىسقان مامان رەتىندە تاۋەلسىزدىكتىڭ وتىز جىلى – ەكونوميكالىق پروگرەسس پەن ورنىقتى دامۋ كەزەڭى ەكەنىن تولىق سەنىممەن ايتا الامىن. ەكونوميكانى, تسيفرلاندىرۋ پروتسەسىن, الەۋمەتتىك سالانى جانە ءبىلىم بەرۋدى قوسا العاندا, كوپتەگەن كورسەتكىش بويىنشا قازاقستان بۇرىنعى كسرو-نىڭ وزگە رەسپۋبليكالارىنان اسىپ ءتۇستى, دەربەس, ساياسي جانە ەكونوميكالىق تاۋەلسىز مەملەكەتكە اينالدى.
ۇلتتىق تاريحىمىزدىڭ جاڭا بەتتەرى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆپەن تىعىز بايلانىستى. ول مەملەكەتتى باسقارۋدىڭ ماڭىزدى پرينتسيپتەرىن ورنىقتىردى, كەيىنىرەك ولار «الدىمەن – ەكونوميكا, سودان كەيىن – ساياسات» دەگەن ومىرشەڭ دە تاريحي قاعيداتقا ۇلاستى. ياعني ەلىمىز باستاپقىدا ەكونوميكالىق دامۋعا ارقا سۇيەدى, وسى تۇراقتى نەگىزدە دەموكراتيالىق ينستيتۋتتار قۇرۋدى كوزدەدى.
تاۋەلسىزدىكتىڭ العاشقى جىلدارىندا كوپتەگەن ساياسي جانە الەۋمەتتىك-ەكونوميكالىق ماسەلە بولدى. ەلدە گيپەرينفلياتسيا بەلەڭ الدى, دۇكەندەردىڭ سورەلەرى بوس تۇردى. مەن مۇنى جاقسى بىلەمىن, ويتكەنى قىزمەتىمنىڭ نەگىزگى بولىگى وسى كەزەڭمەن تۇسپا-تۇس كەلگەن-ءدى. مەن تۇڭعىش پرەزيدەنتتىڭ قانداي قيىندىقتارعا تاپ بولعانىن جانە ولاردىڭ بۇكىل كەڭ-بايتاق ەلىمىزدىڭ اۋقىمىندا قالاي شەشىلگەنىمەن جاقسى تانىسپىن.
تاۋەلسىزدىك جىلدارىندا ساياسي تۇراقتىلىقتى ساقتاپ قالۋ – قازاقستان ءۇشىن ەڭ ۇلكەن جەتىستىكتەردىڭ ءبىرى بولدى. 1995 جىلى قازاقستان رەسپۋبليكاسىنىڭ كونستيتۋتسياسى قابىلداندى. تەجەمەلەر مەن تەڭەستىرۋلەر جۇيەسىنىڭ كومەگىمەن بيلىكتىڭ سوت, زاڭ شىعارۋشى جانە اتقارۋشى تارماقتارى تەڭدەستىرىلىپ, حالىقتىڭ قالاۋىن ورىنداۋشى, ۇلتتىق مۇددەنى قورعاۋشى جانە زاڭداردى جۇزەگە اسىرۋشى تاراپتارعا اينالدى.
نارىقتىق رەفورمالار, يندۋستريالاندىرۋ جانە شەتەلدىك ينۆەستيتسيالاردىڭ اعىنى ەلىمىزدەگى ونىمدىلىكتى ارتتىردى, حالىق جۇمىسپەن قامتىلا باستادى, قوعامداعى الەۋمەتتىك تەڭسىزدىك ازايا ءتۇستى. وسىلايشا, «قازاقستاندىق دامۋ مودەلى» دەگەن ۇعىم كەڭىنەن تارادى.
تاۋەلسىزدىك جىلدارىندا قازاقستان ءوزىنىڭ ۇلتتىق بىرلىگىنىڭ بىرەگەي ۇلگىسىن جاسادى. قازاقستاننىڭ تۇڭعىش پرەزيدەنتى قازاقستان حالقى اسسامبلەياسىن قۇرۋ يدەياسىن ۇسىندى. رەسپۋبليكادا ۇلتى مەن ءدىني سەنىمىنە قاراماستان, ەلدىڭ بارلىق ازاماتتارى ءۇشىن تەڭ مۇمكىندىكتەر جاسالدى. قازاقستان حالقى اسسامبلەياسىنىڭ بىرەگەيلىگى بۇكىل الەمدە مويىندالىپ, ول قازاقستاننىڭ حالىقارالىق برەندىنە اينالدى جانە ازاماتتىق قوعام مەن مەملەكەت اراسىنداعى بايلانىستىرۋشى بۋىن بولىپ قالىپتاستى.
تاۋەلسىز مەملەكەتتىڭ باس قالاسى – قازىرگى نۇر-سۇلتان – ەلباسى نۇرسۇلتان ءابىش ۇلى نازارباەۆتىڭ ەرەكشە جوباسى, تاۋەلسىز قازاقستاننىڭ تابىستى سيمۆولى جانە ەلدىڭ ەتالونى. 1999 جىلى يۋنەسكو شەشىمىمەن ەلوردامىز «الەم قالاسى» اتاعىنا يە بولدى. 2000 جىلدان باستاپ ول استانالار مەن ءىرى قالالاردىڭ حالىقارالىق اسسامبلەياسىنىڭ مۇشەسى اتاندى.
ەلىمىزدە وتكەن ەڭ ماڭىزدى ءارى اۋقىمدى ءىس-شارالاردىڭ ءبىرى – 2017 جىلعى EXPO حالىقارالىق مامانداندىرىلعان كورمەسى بولدى. قازاقستان تمد ەلدەرىنىڭ اراسىندا وسى بەدەلدى ءىس-شارانى وتكىزگەن العاشقى ەل بولدى. كورمەگە 115 مەملەكەت پەن 22 حالىقارالىق ۇيىم قاتىستى. ونى ءتورت ميلليونعا جۋىق ادام تاماشالادى. كورمە «جاسىل ەنەرگيا» تاقىرىبىنا ارنالدى.
«جاسىل» ەنەرگەتيكاعا كوشۋ, «جاسىل» تەحنولوگيالاردى ەنگىزۋ – جاھاندىق ەكونوميكانىڭ ءوسىپ كەلە جاتقان جاڭا باعىتى. «جاسىل» ەكونوميكا مەملەكەتتىڭ تۇراقتى دامۋىن قامتاماسىز ەتۋ ءۇشىن ماڭىزدى. بولجام بويىنشا, 2050 جىلعا قاراي «جاسىل» ەكونوميكا سالاسىنداعى وزگەرىستەر ءىجو-ءنى قوسىمشا 3 پايىزعا وسىرۋگە, 500 مىڭنان استام جاڭا جۇمىس ورنىن اشۋعا, سونداي-اق ونەركاسىپ پەن قىزمەتتەردىڭ جاڭا سالالارىن قالىپتاستىرىپ, قازاقستاندىقتاردىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ بەلسەندى سىرتقى ساياسي قىزمەتى مەن حالىقارالىق باستامالارىنىڭ ارقاسىندا قازاقستان ەۋرازيالىق ەكونوميكالىق وداق, ۇقشۇ, شىۇ جانە تۇركى كەڭەسى سياقتى ۇيىمداردىڭ قۇرىلۋىندا نەگىزگى ءرول اتقاردى. قازاقستان تمد ەلدەرى اراسىندا ءبىرىنشى بولىپ ەقىۇ ءسامميتىن وتكىزدى.
مەن ەلىمىزدىڭ قالىپتاسۋى مەن دامۋىندا ەرەكشە مانگە يە بىرقاتار ءىس-شارانى عانا اتاپ ءوتتىم. بۇل وقيعالار قازاقستاندىقتاردىڭ بارلىعىنا ءمالىم. دەسە دە, مەن ءۇشىن ولار – ەرەكشە ەستە قالارلىق, جاقىن ءارى قىمبات ساتتەر.
ايەلدەردىڭ ءرولى تۋرالى ايتپاسام بولماس. پروگرەسكە ۇمتىلعان كەز كەلگەن قوعامدا ايەلدەردىڭ ورنى تومەندەتىلسە, ول قوعام ەشقاشان ۇيلەسىمدى دامي المايدى. ايەلدەردىڭ جاعدايى, لاكمۋس قاعازى سەكىلدى, قوعام مۇشەلەرىنىڭ گۋمانيزم, تەڭدىك جانە مەيىرىم قاعيداتتارىنا دەگەن ادالدىعىن ءدال كورسەتەدى.
حالىقارالىق ارەنادا ايەلدەردىڭ تەڭ قۇقىعىنا قول جەتكىزۋدەگى باستى قادام 1979 جىلعى 18 جەلتوقساندا بۇۇ باس اسسامبلەياسى ايەلدەرگە قاتىستى كەمسىتۋشىلىكتىڭ بارلىق ءتۇرىن جويۋ تۋرالى كونۆەنتسيانى قابىلداعان كەزدە جاسالدى. قازاقستان وعان 1998 جىلى, ال فاكۋلتاتيۆتىك حاتتاماعا 2001 جىلى قوسىلدى. بۇل ەكى قۇجات تا ەشبىر كەدەرگىسىز راتيفيكاتسيالاندى. ويتكەنى ءبىزدىڭ ۇلتتىق زاڭنامامىز حالىقارالىق قۇقىق نورمالارىنا تولىعىمەن سايكەس كەلەدى.
ساراپشىلاردىڭ ايتۋىنشا, ايەلدەر وتپەلى كەزەڭنىڭ سىناقتارىن ءوز موينىنا الدى جانە ەڭ باستىسى – ولاردى ءساتتى ەڭسەردى. وسىلايشا ولار تاۋەلسىز قازاقستاننىڭ قالىپتاسۋى مەن كوركەيۋىنە ەلەۋلى ۇلەس قوستى. ەلىمىز ەگەمەندىككە قول جەتكىزگەن تۇستا نازىك جاندى ارۋلارىمىز وت باسى, وشاق قاسىندا قالىپ قويماي, ەلىمىزدىڭ قوعامدىق-ساياسي ومىرىنە بەلسەنە ارالاستى.
بۇگىنگى تاڭدا قازاقستان ايەلدەرى الەۋمەتتىك جوبالاردى ازىرلەپ, ىسكە اسىرۋدا, زاڭنامالىق اكتىلەردى تالقىلاپ, قابىلداۋدا, كاسىپكەرلىك قىزمەتتە بەلسەندىلىك تانىتىپ كەلەدى. ايەلدەردىڭ مۇنداي ۇستانىمىن مەملەكەت تە قولداپ, ىنتالاندىرىپ وتىرادى.
بۇل ويىما مەن بيىل ماۋسىم ايىندا گەندەرلىك تەڭدىك پەن ورتالىق ازيانىڭ بەس ەلىندە ايەلدەردىڭ مۇمكىندىگىن كەڭەيتۋ سالاسىنداعى وزىق تاجىريبە بويىنشا وتكەن ۆيرتۋالدى كەزدەسۋدە قازاقستان اتىنان ءسوز سويلەۋگە شاقىرىلعانىمدا تاعى دا كوز جەتكىزدىم. بۇل ەلدەردىڭ وكىلدەرى 1995 جىلى بەيجىڭدەگى ايەلدەر جاعدايى جونىندەگى IV دۇنيەجۇزىلىك كونفەرەنتسياعا قاتىسقانىن ايتا كەتۋ كەرەك. پاندەمياعا قاراماستان, الەمدىك قوعامداستىق ونلاين كەزدەسۋلەر وتكىزىپ, مەملەكەتتەر قابىلداعان مىندەتتەمەلەردىڭ ناتيجەلەرىن تالقىلاپ تۇرۋعا تىرىسىپ وتىر.
كوتەرىلگەن تاقىرىپتاردىڭ ىشىندە «وتكەنگە قاراساڭىز, وسىنداي كورنەكتى ءارى تاريحي ساياسي مىندەتتەمەلەرگە قول جەتكىزۋدىڭ العىشارتتارى قانداي بولدى؟ ءسىز كونفەرەنتسياعا قاتىسۋشى رەتىندە, بەيجىڭنەن ورالعاننان كەيىن ءوز ەلىڭىزدە نەنى وزگەرتكىڭىز كەلەدى؟ ءسىزدىڭ ويىڭىزشا, ءالى دە جۇزەگە اسپاعان نەندەي شارالار بار؟» دەگەن ساۋالدار نازار اۋدارتتى. بارلىعى ەندى عانا باستالىپ, جاندانىپ جاتقان شاقتى ەسكە الىپ, سول اتموسفەرانى قايتا سەزىنۋدىڭ ءوزى ەرەكشە بولدى.
نۇرسۇلتان ءابىش ۇلى نازارباەۆ ايەلدەردىڭ الەۋمەتتىك جاعدايىنا, كوڭىل كۇيىنە ءاردايىم نازار اۋداراتىن. ول مەملەكەتىمىز قالىپتاسىپ جاتقان العاشقى كۇردەلى جىلداردا ايەلدەردىڭ قوعامدىق مارتەبەسىن ارتتىرۋعا كوڭىل بولە وتىرىپ, ارنايى ورگان – قازاقستان رەسپۋبليكاسى پرەزيدەنتiنiڭ جانىنداعى وتباسى, ايەلدەر ىستەرى جانە دەموگرافيالىق ساياسات جونiندەگi كەڭەستى قۇردى.
سول كەزدە بەيجىڭدەگى ايەلدەردىڭ دۇنيەجۇزىلىك فورۋمى الەمدىك قوعامداستىققا ايەلدەردىڭ ماسەلەسىن شەشەتىن ينستيتۋتتىق ۇيىم قۇرۋدى ەندى عانا ۇسىنعان ەدى. ال بىزدە مۇنداي مەحانيزم ول كەزدىڭ وزىندە قولدانىستا بولدى.
كەيىنىرەك كەڭەس قازاقستان رەسپۋبليكاسى پرەزيدەنتىنىڭ جانىنداعى وتباسى ىستەرى جانە گەندەرلىك ساياسات جونىندەگى ۇلتتىق كوميسسيا بولىپ وزگەرتىلدى. مەن سول ۇيىمنىڭ توراعاسى رەتىندە 10 جىل قىزمەت ەتتىم. ەلىمىزدەگى گەندەرلىك ماسەلەلەردى زەرتتەۋگە جانە كوپتەگەن جىلدار بويى وسى سالادا قىزمەت ەتۋگە ەرەكشە مۇمكىندىك العانىما قۋانىشتىمىن.
سول كەزدى ەسكە تۇسىرسەم, بەيجىڭنەن ايەلدەر ءۇشىن اشىلعان جاڭا مۇمكىندىكتەرگە قاناتتانىپ ورالعانىمىز ويىما ورالادى. سول جيىندا ەستىگەن, كورگەن دۇنيەلەردىڭ بارلىعىن الداعى قىزمەتىمىزدە پايدالاندىق.
بىردەن قازاقستان رەسپۋبليكاسىندا ايەلدەردىڭ جاعدايىن جاقسارتۋ جونىندەگى ۇلتتىق ءىس-قيمىل جوسپارى ازىرلەندى, ونىڭ ىشىندە بەيجىڭ ءىس-قيمىل پلاتفورماسىنىڭ باعىتتارى بويىنشا دا ءىرى باعدارلامالار قامتىلدى. ول ۇكىمەت قاۋلىسىمەن بەكىتىلدى, ويتكەنى بىزگە ەلدە ايەلدەر مەن بالالاردىڭ ماسەلەلەرىن شەشۋگە نازار اۋدارۋ ءۇشىن مەملەكەتتىك دەڭگەيدە قابىلدانعان قۇجاتتار قاجەت ەكەنىن تۇسىندىك.
ودان كەيىن جىل سايىن جارىق كورەتىن «قازاقستان ايەلدەرى مەن ەرلەرى» جيناعىن شىعارا باستادىق, بۇل ەلدەگى گەندەرلىك جاعدايدى باقىلاۋعا مۇمكىندىك بەردى. باستاپقىدا ول حالىقارالىق ۇيىمنىڭ قولداۋىمەن شىعىپ تۇرسا, قازىر بيۋدجەت قاراجاتى ەسەبىنەن جاريالانادى. بۇل – مەملەكەت تاراپىنان ايەلدەرگە دەگەن قامقورلىق پەن قولداۋدىڭ تاعى ءبىر دالەلى.
گەندەرلىك كورسەتكىشتەر مەملەكەتتىك بيۋدجەتتى قالىپتاستىرۋدا, مەملەكەتتىك جوسپارلار مەن باعدارلامالاردى ازىرلەۋ كەزىندە دە پايدالانىلاتىنىن ايتا كەتكەن ءجون.
بۇگىنگى تاڭدا قازاقستاندىق ايەلدەردىڭ قانشالىقتى كاسىبي تۇرعىدا ءوسىپ, دامىپ كەتكەنىن كورۋگە بولادى. ولار ەكونوميكادا, قارجى سالاسىندا بەلسەندى قىزمەت اتقارادى, ونىڭ ۇستىنە جۇمىسىن وتباسىمەن جانە انالىق قامقورلىعىمەن قاتار الىپ جۇرەدى. سوڭعى جىلدارى قوعامدا تابىستى ىسكەر ايەلدەردىڭ بەينەسى نىعايا تۇسكەنى انىق.
پارلامەنت ماجىلىسىندە دە ايەلدەردىڭ كورسەتكىشىندە جاقسى وزگەرىستەر بار: ەگەر 2016 جىلى ماجىلىستەگى ايەلدەر ۇلەسى 10 پايىز بولسا, 2021 جىلى 29 پايىزعا جەتكەن. پارلامەنت تاجىريبەسىندە العاش رەت ايەلدەر مەن جاستارعا ارنالعان پارتيالىق تىزىمدەردە 30 پايىزدىق كۆوتا ەنگىزىلدى.
وتكەنگە كوز جۇگىرتسەك, قازاقستاننىڭ بەيجىڭ ءىس-قيمىل پلاتفورماسىنىڭ ەرەجەلەرىن ىسكە اسىرۋدا قول جەتكىزگەن ەلەۋلى جەتىستىكتەرىن دە اتاپ وتۋگە بولادى. بۇل جالپى ەلىمىز جەتكەن جەتىستىكتەرىمەن قاتار مۇمكىن بولدى.
بەيجىڭ پلاتفورماسىنان بولەك, قازاقستان باسقا دا حالىقارالىق شارتتار بويىنشا مىندەتتەمەلەر الىپ, كوپتەگەن زاڭدار قابىلدادى. جەتىستىكتەردىڭ ىشىندە گەندەرلىك باعىتتاعى ەكى ماڭىزدى زاڭدى اتاپ وتۋگە بولادى: «ەرلەر مەن ايەلدەردىڭ تەڭ قۇقىقتارىنىڭ جانە تەڭ مۇمكىندىكتەرىنىڭ مەملەكەتتىك كەپىلدىكتەرى تۋرالى» جانە «تۇرمىستىق زورلىق-زومبىلىق پروفيلاكتيكاسى تۋرالى» زاڭدار. كەزىندە وسى قۇجاتتاردىڭ ازىرلەنۋىنە جانە قابىلدانۋىنا مەن باستاماشىلىق جاساعان ەدىم.
دەگەنمەن, ءالى دە شەشىمىن تاپپاعان ماسەلەلەر بار, الداعى ۋاقىتتا ولار بويىنشا جۇمىس ىستەۋ كەرەك.
ايتالىق, قازىر جۇمىسسىزدار اراسىندا ادەتتەگىدەي ايەلدەردىڭ ۇلەسى كوپ. ايەلدەر مەن ەرلەردىڭ جالاقىسىنىڭ اراقاتىناسى تۋرالى دا سۇراقتار بار. بۇل ماسەلەلەردىڭ ءبىر ۇشى بارلىق دەڭگەيدەگى بيۋدجەتتەردىڭ گەندەرلىك ماسەلە تۇرعىسىنان قاراستىرىلماعانىنا كەلىپ ءتىرەلۋى مۇمكىن. ايەلدەرگە قاتىستى زورلىق-زومبىلىق تا كۇن تارتىبىندە تۇر. قابىلدانعان شارالارعا قاراماستان, ماسەلە ءالى دە وزەكتى بولىپ وتىر.
حالىقتىڭ دەنساۋلىعى, ونىڭ ىشىندە رەپرودۋكتيۆتى جانە جىنىستىق ماسەلەلەر وزەكتى. نەكەگە تۇرعانداردىڭ شامامەن 16 پايىزى بەدەۋلىكتەن زارداپ شەگەدى. ايەلدەر ءۇي شارۋاشىلىعىمەن اينالىسىپ, ەرلەرگە قاراعاندا الدەقايدا كوپ كۇش جۇمسايدى. سوندىقتان وتباسىندا تەڭدىكتى قامتاماسىز ەتۋ قاجەتتىلىگى بارعان سايىن ماڭىزدى بولىپ وتىر. وتباسىنداعى گەندەرلىك قاتىناستىڭ تەڭ ءارى ۇيلەسىمدى بولۋى – جالپى قوعامنىڭ ۇيلەسىمدىلىگىنە اسەر ەتەدى, ونىڭ دامۋى مەن وركەندەۋىنە ىقپال ەتەدى.
قازىرگى ۋاقىتتا بۇل ماسەلەلەردىڭ بارلىعى «قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى» اياسىندا شەشىلۋ ۇستىندە.
قازاقستان مەن ونىڭ ازاماتتارىنىڭ جەتكەن جەتىستىكتەرى – مەملەكەتتىك تۇتاستىقتى دامىتۋداعى ستراتەگيالىق جولدى تاڭداۋدىڭ دۇرىستىعى مەن ەلىمىزدىڭ زور الەۋەتىنىڭ كورىنىسى.
2020 جىلى قازاقستان باسقا ەلدەرمەن قاتار كوروناۆيرۋس پاندەمياسىنا تاپ بولعانى بەلگىلى. مەملەكەت ىندەتتىڭ تارالۋىن تەجەپ, ازاماتتاردى قولداۋ ءۇشىن قاجەتتى شارالاردى قابىلدادى. مەملەكەتتىك ورگاندار مەن قاراپايىم قازاقستاندىقتاردىڭ بىرلەسكەن كۇش-جىگەرىنىڭ ارقاسىندا پاندەميا ەلگە تىم قاتتى سوققى بولىپ تيگەن جوق.
قازىر ەلىمىز الەمنىڭ ەڭ دامىعان وتىز ەلىنىڭ قاتارىنا ەنۋگە سەنىمدى قادام باسىپ كەلەدى. ەلباسى بۇل ماقساتتى «قازاقستان – 2050» ستراتەگياسىندا ناقتى بەلگىلەگەن ەدى.
الداعى جىلدارعا قويىلعان جوسپارلار دا اۋقىمدى. حالىقتى الەۋمەتتىك قولداۋ سالاسى ەلدىڭ الەۋمەتتىك كودەكسىمەن رەتتەلەتىن بولادى. مەملەكەتتىڭ الەۋمەتتىك تولەمدەر مەن جاردەماقىلار جونىندەگى بارلىق الەۋمەتتىك مىندەتتەمەلەرى تولىق كولەمدە ورىندالادى. دارىگەرلەردىڭ جالاقىسى 2,5 ەسە, پەداگوگتەردىڭ جالاقىسى 2 ەسە وسەدى. 2022 جىلدىڭ 1 قاڭتارىنان باستاپ ەڭ تومەنگى جالاقى وسەدى. ورتاشا ءومىر ءسۇرۋ ۇزاقتىعىن 75 جاسقا جەتكىزۋ كوزدەلىپ وتىر. سىرتقى ەكونوميكالىق ساياساتتا قازاقستاندىق ەكسپورتتى ىلگەرىلەتۋ ماسەلەسى ماڭىزدى باسىمدىققا يە بولماق.
ۋاقىت وتە كەلە قوعام الدىندا جاڭا مىندەتتەر پايدا بولادى. دەگەنمەن, العا باستايتىن باعىت-باعدار ايقىن. تاۋەلسىزدىك جىلدارى جەتكەن جەتىستىكتەر مەن وسى ۋاقىتتا جيناقتالعان تاجىريبەگە سۇيەنە وتىرىپ, بولاشاققا نىق قادام باسامىز. ءاربىر قازاقستاندىق ەرتەڭگى كۇنىنە سەنىمدى. ءبىزدىڭ تاۋەلسىزدىگىمىز بولاشاققا باعدار الادى. ەلىمىزدىڭ تۇراقتى دامۋى حالىقتىڭ ءومىر ءسۇرۋ دەڭگەيىن ودان ءارى ارتتىرۋعا ۇلكەن ءۇمىت سىيلايدى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ ءوز قىزمەتىندە ءدال وسى ماقساتتى كوزدەدى, ءالى دە وسى باعىتتان تايعان جوق. ول دانا دا ءادىل باسشى رەتىندە, حالىققا اشىق, جۇرەگى كەڭ ادام رەتىندە تانىلدى.
گازەت بەتىنەن وتانداستارىمدى قازاقستان تاۋەلسىزدىگىنىڭ 30 جىلدىعىمەن قۇتتىقتاۋعا رۇقسات ەتىڭىزدەر. بارشاڭىزعا شىن جۇرەكتەن زور دەنساۋلىق, مەملەكەتىمىزدىڭ وركەندەۋىن, جاقىندارىڭىزعا اماندىق, جارقىن بولاشاق تىلەيمىن.
ايتكۇل ساماقوۆا,
مەملەكەت جانە قوعام قايراتكەرى
