استانادا بولاشاق وليمپياداشىلاردى دايارلايتىن تاعى ءبىر مەكەن - «جاس باتىر» سپورتتىق-ساۋىقتىرۋ كەشەنى پايدالانۋعا بەرىلدى. بۇگىن ق.مۇنايتپاس ۇلى اتىنداعى وليمپيادا رەزەرۆى رەسپۋبليكالىق مەكتەپ ينتەرنات-كوللەدجىنە قاراستى وسى وردانىڭ اشىلۋ سالتاناتى ءوتتى. بۇل تۋرالى egemen.kz ءتىلشىسى حابارلادى.
راسىمگە سپورت جانە دەنە شىنىقتىرۋ ىستەرى اگەنتتىگىنىڭ توراعاسى تاستانبەك ەسەنتاەۆ, «قاجىمۇقان مۇنايتپاس ۇلى اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ ينتەرنات-كوللەدجى» رمم ديرەكتورى سەرىك توكيەۆ, وليمپيادا چەمپيونى, «استانا» پرەزيدەنتتىك سپورت كلۋبىنىڭ پرەزيدەنتى باقتيار ارتاەۆ, وليمپيادانىڭ كۇمىس جانە قولا جۇلدەگەرلەرى گەورگي تسۋرتسۋميا مەن ارمان ءشىلمانوۆ قاتىستى.
راسىمدە اگەنتتىك توراعاسى سپورت كەشەنىن ارالاپ, جاڭا پايدالانۋعا بەرىلگەن سپورت نىسانىنىڭ قۇرىلىسىنا جوعارى باعا بەردى. وندا اتاقتى بالۋان قاجىمۇقان اتىنداعى سپورت ورداسىنىڭ وقىتۋشىلار قۇرامى مەن وقۋشىلارىنىڭ الدىندا ءسوز سويلەپ, تالاي داڭقتى سپورتشىلارىمىزدى تۇلەپ ۇشىرعان مەكتەپتىڭ قابىرعاسىنان الداعى ۋاقىتتا دا ەلىمىزدىڭ نامىسىن قولدان بەرمەيتىنە, كوك بايراعىمىزدى بيىككە كوتەرەتىن ساڭلاقتارىمىزدىڭ شىعاتىنىنا سەنىم ءبىلدىردى. ال وقۋ ورنى وقۋشىلارىنىڭ اتىنان قازاقستان چەمپيونى, ءىىى جاستار ويىندارىنىڭ جەڭىمپازى ماديار جانۇزاق ءسوز الىپ, سپورت كەشەنى ءۇشىن ريزاشىلىعىن جەتكىزدى.
كەشەننىڭ قۇرىلىسى 2011 جىلى باستالعان. مۇندا ءبىر كۇندە 300 ادام جاتتىعا الادى. ءار اينالىمدا ون ادام ورىننان سەكىرىپ, سەگىز ادام يادرو لاقتىراتىنداي مۇمكىندىك تە جاسالعان.
داستان كەنجالين.
دەرەككوز: «جاس باتىر» سپورتتىق-ساۋىقتىرۋ كەشەنى.
فوتو: ماقسۇت ءىرجانوۆ.
