بەيجىڭ وليمپياداسىنىڭ چەمپيونى باقىت سارسەكباەۆ جەكە باپكەرى ءارى تۋعان ناعاشى اعاسى بولىپ سانالاتىن كارىم ماحمۋدوۆقا 2009 جىلى سىيعا تارتقان پاتەرىن قايتادان وزىنە الۋعا ارەكەتتەنىپ جاتىر. بۇل تۋرالى Tengrinews.kz حابارلادى.
ب. سارسەكباەۆ جوعارىدا اتالعان ماسەلەنى ءوز پايداسىنا شەشۋ ءۇشىن استانا قالاسىنداعى سارىارقا اۋداندىق سوتىنا ارىز جازىپتى. ونىڭ مۇنداي قادامعا بارۋىنا باپكەرىنىڭ ۋادەسىندە تۇرماعانى سەبەپ بولعان ەكەن. «مەن باپكەرىمە پاتەردى سىيعا بەرگەنىمدى جوققا شىعارمايمىن. بىراق ول پاتەردى الار كەزدە «سەنى لوندون وليمپياداسىنا دايىندايمىن, ۇلتتىق قۇرامادا بولاسىڭ» دەپ اۋىزشا ۋادە بەرگەن ەدى. ەندى سەرتىنەن تايقىپ كەتىپ وتىر عوي», - دەيدى ب. سارسەكباەۆ.
بوكسشىنىڭ كەلەسى ءبىر ايتقان سوزىنە نازار اۋدارساق, ونىڭ باپكەرى العاشىندا جانجال تۋدىرعان پاتەردى كەرى قايتارماقشى بولعان. نە سەبەپتى ەكەنى بەلگىسىز, كەيىننەن ماحمۋدوۆ بۇل پاتەردى پارلامەنت ءماجىلىسىنىڭ دەپۋتاتى ازات پەرۋاشەۆتىڭ جۇرگىزۋشىسىنە «ساتىپ جىبەرگەن» كورىنەدى.
وسى ماسەلەگە بايلانىستى ا. پەرۋاشەۆ Tengrinews.kz سايتىنا بەرگەن سۇحباتىندا ءوز قىزمەتكەرىنە پاتەر الۋ ءۇشىن قارجىلاي كومەك كورسەتكەنىن ايتىپ, جۇرتشىلىق نازارىن مىناعان اۋداردى. «مەنىڭ ءوتىنىشىم بويىنشا دوستارىم بەيجىڭ وليمپياداسىنان جۇلدەمەن ورالعان باقىت سارسەكباەۆقا 4 پاتەر سىيلاعان ەدى. وسى ازاماتتىڭ 2004 جىلى وزبەكستاننان ەلىمىزگە كەلۋىنە ىقپال جاساعان دا ءوزىم ەدىم. جالپى, ءبىز باقىتتى بەلگىلى بوكسشى رەتىندە بىلەمىز. ەندى ول پاتەر داۋىنا قاتىستى جانجالدى تۇسىنىستىكپەن, ازاماتتىق تۇرعىدان شەشەدى دەپ ويلايمىن», - دەدى ا. پەرۋاشەۆ.
«كتك» تەلەارناسىنىڭ حابارلاۋىنشا, باقىتتىڭ باپكەرى الگى پاتەردى وزگەگە شامامەن 300 مىڭ دوللارعا ساتىپ, كەيىن الماتىعا كوشىپ كەتكەن. ال بۇگىن وسىعان قاتىستى سارىارقا اۋداندىق سوتىندا بولعان ىسكە جاتتىقتىرۋشىنىڭ قاتىسپاعانى ءمالىم بولىپ وتىر. باقىت سارسەكباەۆ بولسا, پاتەرىنىڭ باسقا ادامعا ساتىلعانىنا قاراماستان, ونىڭ ىشىنە كىرىپ العان كورىنەدى. ەندى بۇل پاتەردىڭ جاڭا قوجايىنى سوتتان بوكسشىنى ماجبۇرلەپ شىعارۋدى تالاپ ەتۋدە.
ءامىرحان الماعانبەتوۆ.
دەرەككوز: Tengrinews.kz, «كتك» تەلەارناسى.
فوتو: Sports.kz.
