بيىل شىلدەدە ۇلتتىق ستاتيستيكا بيۋروسى قاشىقتان جۇمىس ىستەيتىن قىزمەتكەرلەر سانىن ستاتيستيكالىق ەسەپتەرگە جاڭا ينديكاتور رەتىندە ەنگىزدى. رەسمي مالىمەتتەرگە سايكەس, بۇل سانات جۇمىسپەن قامتىلعان حالىقتىڭ جالپى سانىنىڭ شامامەن 1% قۇرايدى. حابارلاندىرۋ سايتىنداعى كوپتەگەن ماماندىقتار تسيفرلىق ساۋاتتىلىقتىڭ بولۋىن تالاپ ەتەدى.
ونداعى ەڭ ءجيى كەزدەسەتىن بوس جۇمىس ورىندارى – تەلەفونمەن ساۋالناما جۇرگىزەتىن وپەراتور, ديزاينەر, رەپەتيتور, SMM مامانى جانە ساۋدا مەنەدجەرى. ال Tik Tok روليكتەرىن قارايتىن مامان, فۋتبول ساراپشىسى, فيتنەس برەندتىڭ امباسسادورى سىندى ۆاكانسيالار كوپ ەمەس. جۇمىس بەرۋشىلەر 75 مىڭ تەڭگەدەن 150 مىڭ تەڭگەگە دەيىن, كەي حابارلاندىرۋلاردا ءتىپتى 1 ملن تەڭگەگە دەيىن جالاقى ۇسىنادى.
جالپى قازاقستاننىڭ جاڭا كاسىپتەر مەن قۇزىرەتتەر اتلاسى 129 جويىلىپ بارا جاتقان, 95 ترانسفورماتسيالاناتىن جانە 239 مۇلدەم جاڭا ماماندىق انىقتادى. ولاردىڭ كوپشىلىگى قوعامدا جاڭا قاجەتتىلىكتەرىنىڭ پايدا بولۋىمەن بايلانىستى. كوپ جاعدايدا بولاشاقتاعى قىزمەتتەر بىردەن بىرنەشە سالاداعى ءبىلىمدى قاجەت ەتەدى. ەكى سالانىڭ تۇيىسكەن جەرىندە جۇمىس ىستەۋگە دايىن ماماندار سۇرانىسقا يە بولادى. اسىرەسە, جۇمىس ىستەپ جۇرگەن سالانىڭ تسيفرلىق الەۋەتىن ەسكەرىپ, جاڭا تەحنولوگيالاردى قازىردەن باستاپ مەڭگەرگەن ءجون. اتلاس اۆتورلارىنىڭ ايتۋىنشا, قازاقستاندىقتارعا IT داعدىلارى تۋرالى ويلانۋ كەرەك. ءتىپتى اۋىل شارۋاشىلىعىندا دا جەم نەمەسە سۋ كولەمىن ەسەپتەي الاتىن تسيفرلىق جۇيەلەر پايدالانىلاتىن بولادى, ال ەگىستىكتەردە اۆتونومدى روبوتتار جۇمىس ىستەيدى, ولارعا قىزمەت كورسەتۋ ءۇشىن اۋىل شارۋاشىلىعىن دا, روبوتوتەحنيكانى دا بىلەتىن ماماندار قاجەت بولادى.
