«ۇيىمنىڭ باس حاتشىسى ستانيسلاۆ زاس دۋشانبەدەگى سامميتكە قاتىسۋشىلار اۋعانستاندا بەيبىتشىلىك ورناتۋ بويىنشا بۇۇ-عا كومەكتەسۋ تۋرالى شەشىمىن قولدايتىنىن جەتكىزدى. ول شەكارادا جاعداي ۋشىققان جاعدايدا ۇقشۇ كومەككە كەلەدى دەپ اتاپ ءوتتى», دەپ جازادى ورتالىق ازيا جاڭالىقتار قىزمەتى.
رەسەيدىڭ سىرتقى ىستەر ءمينيسترى سەرگەي لاۆروۆ ماسكەۋ تالىپتەرمەن بايلانىسىپ وتىرعانىن, ءبىرىنشى كەزەكتە ولارمەن كورشى ەلدەرگە شابۋىل جاساماۋ جونىندە كەلىسىم ءجۇرىپ جاتقانىن جەتكىزدى.
«رەسەي تالىپتەرگە ازىرگە ەشقانداي تالاپ قويمادى. ءبىز ولاردىڭ ۋادەلەرىن قالاي ورىندايتىنىن باقىلاپ وتىرمىز. تالىپتەر ءوز ماقساتتارىن ايتتى. «تەرروريزمگە, ەسىرتكى تاسىمالىنا قارسى كۇرەسەمىز, اۋعانستان اۋماعىنداعى كورشى ەلدەرگە ەشقانداي شابۋىل جاسامايمىز» دەپ ۋادە بەردى», دەيدى لاۆروۆ.
ال ساراپشىلار ۇقشۇ-نى اۋعانستانداعى جاعدايعا بايلانىستى ارەكەتسىزدىگىن سىناپ جاتىر. ولار ۇيىمعا مۇشە ەلدەردەن ناقتى ءىس-ارەكەت, بولجام, تالداۋ كۇتكەنىن ايتادى. «بۇگىنگى كۇنى ۇقشۇ-عا مۇشە ەلدەردە اۋعانستانعا قاتىستى ناقتى ۇستانىم جوق», دەيدى تاجىكستاندىق ساراپشى وسيم بەكمۋحامماد.
1992 جىلى قۇرىلعان ۇجىمدىق قاۋىپسىزدىك شارت ۇيىمىنا ارمەنيا, بەلارۋس, قازاقستان, قىرعىزستان, رەسەي جانە تاجىكستان كىرەدى.
