بيىل تۇبەكتەگى وڭىردە قۋاڭشىلىقتان زارداپ شەككەن شارۋالارعا قارجىلاي قولداۋ كورسەتۋ ءۇشىن ۇكىمەت رەزەرۆىنەن 1,9 ملرد تەڭگە ءبولىندى. قايتارىمسىز قاراجات ءتورت ت ۇلىكتىڭ انالىق باسى ءۇشىن مال ازىعىنا جۇمسالعان شىعىنداردى ءىشىنارا وتەۋگە بەرىلۋدە.
باسقارما باسشىسىنىڭ ايتۋىنشا, قازىرگى تاڭدا بولىنگەن قاراجاتتىڭ 57%-ى يگەرىلدى, ياعني 5 900 جەكە قوسالقى ءۇي شارۋا قوجالىعىنا 745 ملن تەڭگە جانە 575 شارۋا قوجالىعىنا 395 ملن تەڭگە قارجىلاي مەملەكەتتىك قولداۋ كورسەتىلگەن.
جەرگىلىكتى بيۋدجەتتەن 150 ملن تەڭگە ءبولىنىپ, «كاسپي» اكك اق-ى ارقىلى اتالعان قايتارىمدى قارجىعا 15 شىلدەدەن بەرى ءار قالا, اۋدانداردان تاعايىندالعان وپەراتورلار قاجەتتىلىككە قاراي ءشوپ تاسىمالداۋدا. بۇگىنگە دەيىن 1 350 توننا ءشوپ ساتىپ الىندى جانە بۇل جۇمىس جىل اياعىنا دەيىن جالعاسادى. جەرگىلىكتى بيۋدجەتتەن 54 ملن تەڭگە ءبولىنىپ, قايتارىمدى قاراجاتقا اۋدانداردان تاعايىندالعان وپەراتورلار قوستاناي وبلىسىنان 950 توننا ارپا جەتكىزدى. قازىرگى تاڭدا ارپا تۇگەل ساتىلىپ, اينالىمداعى قارجىعا قوسىمشا 1 مىڭ توننا مال ازىعىن ساتىپ الۋ جۇمىستارى جۇرۋدە. سونىمەن قاتار 107 ملن تەڭگەگە 15 ۆاگون 3-4 سۇرىپتى بيداي (بيداي قالدىعى) ساتىپ الىندى, جاقىن كۇندەرى وڭىرگە جەتكىزىلەدى.
جالپى, جىل باسىنان بەرى وبلىسقا 41 500 توننا ءشوپ تاسىمالداندى. سونىڭ 3500 تونناسى وزگە وڭىرلەردەن كومەك رەتىندە جەتكىزىلىپ, قۋاڭشىلىقتان زارداپ شەككەن مال يەلەرىنە تەگىن ۇلەستىرىلدى. ال وڭىرگە تاسىمالدانعان جەم كولەمى 24 مىڭ توننانى قۇرادى.
باسقارما باسشىسى اۋىل شارۋاشىلىعى جانۋارلارىن بىردەيلەندىرۋ بازاسىنا تىركەلمەگەن مالعا مەملەكەت تاراپىنان سۋبسيديا نەمەسە قولداۋ كورسەتىلمەيتىنىن ايتتى.
قازىر وڭىردە 636 824 باس مال تىركەلگەن. ونىڭ ىشىندە شىعىنعا ۇشىراعانى – 1 163 (جالپى سانىنىڭ 0,18%-ى). ولگەن مالدىڭ 194-ءى عانا اۋىل شارۋاشىلىعى جانۋارلارىن بىردەيلەندىرۋ دەرەكقورىنا تىركەلگەن.
– توتەنشە جاعدايلار دەپارتامەنتى اۋا ىلعالدىلىعىنا تەكسەرۋ جۇرگىزدى. ناتيجەسى توتەنشە جاعداي جاريالاۋ شارتتارىنا سايكەس كەلگەن جوق. سونداي-اق جانۋارلار اراسىندا ۋلانۋ مەن جۇقپالى اۋرۋعا شالدىعۋ دەرەگى تىركەلمەدى جانە وسىمدىكتەر زيانكەستەردەن زاقىمدانباعان, ياعني توتەنشە جاعداي جاريالاۋعا زاڭدى نەگىز جوق, – دەدى باسقارما باسشىسى.
كۇن تارتىبىندەگى ماسەلەنىڭ ءبىرى – مالدىڭ قىستىق ازىق قورىن دايىنداۋ. 2021-2022 جىلدارعا وڭىردەگى ءتورت ت ۇلىكتى قىستىق مال ازىعىمەن قامتاماسىز ەتۋ ماقساتىندا, پرەمەر-مينيستر ا.ءماميننىڭ تاپسىرماسىنا سايكەس, بيۋدجەتتەن قايتارىمدى قاراجات رەتىندە مال ازىعىنا 5,3 ملرد تەڭگە قارجى ءبولىندى. ونىڭ 1,9 ملرد تەڭگەسى شوپكە, 3,4 ملرد تەڭگەسى جەمگە قاراستىرىلعان. بۇل قارجىعا جىل سوڭىنا دەيىن 26 مىڭ توننا ءشوپ پەن 34 مىڭ توننا جەم ساتىپ الىنادى دەپ جوسپارلانۋدا.
– قازىر اتالعان قارجىنىڭ 600 ملن تەڭگەسىنە مال ازىعىن تاسىمالدايتىن وپەراتورلار تاعايىندالىپ, وزگە وڭىرلەردەن ءشوپ تاسىمالداۋ جۇمىستارى باستالىپ كەتتى. بۇدان بولەك اتىراۋ مەن اقتوبە وبلىستارىنىڭ شابىندىق جەرلەرىنەن ءشوپ شابۋعا 5 شارۋا قوجالىعى بارادى. ولار وزدەرىنە قور جيناپ, ارتىعىن وزگە مال يەلەرىنە ساتادى. سونىمەن قاتار بۇگىندە جەرگىلىكتى شابىندىقتا 14 بريگادا ءشوپ شاۋىپ جاتىر. ولار جىل سوڭىنا دەيىن 15 مىڭ توننا ءشوپ دايىنداماق, – دەيدى س.قالدىعۇل.
ماڭعىستاۋ وبلىسى
