اتالعان شتاب تامىز ايىندا قۇرىلعان. ەل ىشىندەگى ەكپەگە قارسى الىپ-قاشپا اڭگىمە, نەگىزسىز جەل ءسوز ءالى دە باسىلا قويعان جوق. ازاماتتىق شتابتىڭ ماقساتى – وڭىرلەردى ارالاپ, حالىققا ۆاكتسينا قابىلداۋ شاراسىنىڭ ءمان-ماڭىزىن ءتۇسىندىرىپ, ەلدى ەكپە تۋرالى شىنايى اقپاراتقا عانا سەنىپ, ماسەلەنىڭ اق-قاراسىن اجىراتا بىلۋگە ۇندەۋ. بىرلەستىك ساپىندا ساقا ساراپشىلار مەن بەلگىلى جۋرناليستەر بار. مۇنىڭ سىرتىندا, ولاردىڭ قاتارىنا وڭىرلەردەن 200-دەن استام ادام قوسىلىپ وتىر.
«قوعامدىق كەلىسىم» مەكەمەسىندە وتكەن جيىندا ءسوز العان راحىم وشاقباەۆ ەلدە ءجۇرىپ جاتقان ۆاكتسينالاۋ بارىسىنىڭ سوڭعى ناتيجەلەرى تۋرالى ايتتى.
– 6-تامىزدا قازاقستان كوروناۆيرۋستان قايتىس بولعاندار سانى بويىنشا الەمدە ەكىنشى ورىنعا شىعىپ كەتتى. وندىقتىڭ ىشىنەن جيىرما كۇن بويى تۇسكەن جوق. مۇنىمەن نە ايتقىمىز كەلەدى؟ ءبىز بۇرىنعى, قالىپتى ومىرگە ورالۋدى قالايمىز. ەگەر شىن قالاساق, ۆاكتسينا سالدىرۋىمىز كەرەك. ەكپە العان ادام ىندەت جۇقتىرسا دا قاتتى اۋىرمايدى, ونى الەمدىك زەرتتەۋلەر كورسەتىپ وتىر, – دەدى ازاماتتىق شتاب وكىلى.
ر.وشاقباەۆتىڭ ايتۋىنشا, بۇگىندە جاپپاي ۆاكتسينا قابىلداۋدان دانيا مەملەكەتى الدا كەلەدى. بۇل ەلدە حالىقتىڭ 74%-ى ۆاكتسينا قابىلداعان. ءبىزدىڭ ەلدە دە ۇجىمدىق يممۋنيتەت قالىپتاستىرۋ ءۇشىن كەم دەگەندە حالىقتىڭ وسىنشا كولەمى ەگىلۋى كەرەك. ۆاكتسينالاۋدى دۇرىس جۇرگىزۋ ناتيجەسىندە دانيالىقتار 10-قىركۇيەك كۇنى كوروناۆيرۋستى اسا قاۋىپتى اۋرۋلار تىزىمىنەن الىپ تاستاعانىن جاريالاپتى. بۇل ساناتتا يزرايل دە بار.
– بۇل مەملەكەتتەردە ىندەتتىڭ ءتورتىنشى تولقىنى باستالعاندىقتان, ۆاكتسينالاۋ قايتا جۇرگىزىلمەك. بىراق وندا ءولىم-ءجىتىم وتە از, ويتكەنى ەكپە العاندار كوپ, – دەدى ر.وشاقباەۆ.
قازاقستاندا ىندەتتىڭ تارالۋى باسەڭدەپ كەلەدى. الايدا جۇرتتىڭ ۆاكتسينا قابىلداۋى دا كەشەۋىلدەپ قالعان. ازاماتتىق بىرلەستىك وكىلدەرىنىڭ ايتۋىنشا, ويتكەنى دۇرىس اقپارات كوپشىلىككە جەتپەي, ورتا جولدا بۇرمالانىپ كەتىپ جاتىر, مۇنىڭ سىرتىندا ەلدىڭ ۇرەيىن تۋدىراتىن جالعان اقپارات تاراتۋشىلار كوپ.
– كورىپ وتىرمىز, جۇرتشىلىق اراسىندا, الەۋمەتتىك جەلىدە ۆاكتسيناعا كۇمان تۋدىراتىندار ءالى دە كەزدەسەدى. وتىرىكتىڭ شەگى جوق, نەشە ءتۇرلىنى ويلاپ شىعارا بەرەدى. بىراق ءبىز كوزىمىز اشىق ادامبىز عوي, سونىڭ ءبارىن سارالاي ءبىلۋىمىز كەرەك. حالىققا دۇرىس مالىمەت بەرىلۋى ءتيىس. وسى ماقساتتى ۇستانىپ, وڭىرلەردى ارالاپ, ءتۇسىندىرىپ جۇرگەن جايىمىز بار, – دەدى شتاب مۇشەسى, استانالىق زاڭگەر سەرىك بەركامالوۆ.
«ەلىم ءۇشىن ەگىلەمىن» رەسپۋبليكالىق ازاماتتىق شتابى وكىلدەرى جۇمىس ساپارىنىڭ ەكىنشى كۇنى وڭىرلىك كوممۋنيكاتسيا ورتالىعىنا بارىپ, باق وكىلدەرىمەن كەزدەستى.
– 19-تامىز كۇنى قازاقستاندا Covid-19 ينفەكتسياسىنان 163 ادام كوز جۇمدى. وسىلايشا ىندەتتەن قايتىس بولعاندار سانى بويىنشا الەمدە ەكىنشى ورىنعا شىعىپ كەتكەن ەدىك. قازىر ناۋقاستار ازايىپ كەلەدى. وعان كوپ ۇلەس قوسقان مەديتسينا ماماندارى ەكەنى داۋسىز. ازاماتتىق قوعام بۇل ۇردىستەن ارقاشان قالماۋى كەرەك. ءبىزدىڭ دە كومەگىمىز ماڭىزدى. ۆاكتسينا – پاندەميانى توقتاتىپ, قالىپتى ومىرگە ورالۋدىڭ بىردەن-ءبىر جولى. ازاماتتىق شتابتىڭ قۇرىلۋ سەبەبى دە وسى – قالىپتى ومىرگە اكەلەتىن ۋاقىتتى قىسقارتۋ, – دەدى سەرىك بەركامالوۆ.
سانيتاريالىق-ەپيدەميالىق باقىلاۋ كوميتەتىنىڭ رەسمي وكىلى ەرجان بايتاناەۆ سوڭعى مالىمەتتەردى كەلتىرە وتىرىپ, ۆاكتسينالاۋدىڭ ماڭىزدى ەكەنىنە تاعى ءبىر توقتالىپ ءوتتى.
– قازىر 76 858 ادام كوروناۆيرۋسقا شالدىعىپ, اۋىرىپ جاتىر. ونىڭ 15 308-ءى ستاتسيوناردا, 61 550 ادام امبۋلاتوريالىق دەڭگەيدە ەم قابىلداۋدا. اتاپ ايتساق, 1 196 ادامنىڭ جاعدايى اۋىر, 345 پاتسيەنتتىڭ احۋالى وتە ناشار جانە 194 ادام وكپەنى جەلدەتۋ اپپاراتىمەن تىنىستاپ جاتىر. سوندىقتان پاندەميادان شىعار جالعىز جول – جاپپاي ۆاكتسينا قابىلاۋ عانا, – دەدى كوميتەتتىڭ رەسمي وكىلى.
ە.بايتاناەۆتىڭ ايتۋىنشا, ەلىمىزدە ەكپە العان 15 مىڭ ادام ۆيرۋس جۇقتىرعان, الايدا ولاردىڭ ءبارى ىندەتتى جەڭىل ەڭسەرگەن. ءباسپاسوز جيىنىندا مونيتورينگتىك توپتاردىڭ جۇمىسى جونىندە دە مالىمەت ايتىلدى. بيىل كارانتين تالاپتارى بۇزىلعانى تۋرالى 25 073 فاكت تىركەلىپ, 105 نىسان جابىلعان. اكىمشىلىك جازاعا 23 مىڭ ازامات تارتىلعان, ولارعا سالىنعان ايىپپۇلدىڭ جالپى سوماسى –1,9 ملرد تەڭگە.
«ەلىم ءۇشىن ەگىلەمىن» ازاماتتىق شتابى قولعا العان ەكپە الۋدىڭ ماڭىزدى ەكەنىن ەل ىشىندە ءتۇسىندىرۋ جۇمىستارى تامىز ايىندا باستالعان. شتاب وكىلدەرى بۇل شارانىڭ قازان ايىنا دەيىن جالعاساتىنىن ايتتى. ولار وسى ۋاقىت ارالىعىندا بارلىق ايماقتى قامتىماق نيەتتە.
