بۇگىن ەمحاناعا تىركەلۋ باستالدى

2021 جىلدىڭ 1 قىركۇيەگىنە دەيىنگى ۋاقىتتا مساك ۇيىمدارىنا 19،4 ملن ادام عانا تىركەلگەن. ونىڭ ىشىندە قالا حالقىنىڭ سانى 11،6 ملن ادام بولسا، اۋىلدىق جەرلەردە – 7،9 ملن ادام تىركەلگەن. 2020 جىلعى تىركەۋ ناۋقانىنىڭ قورىتىندىسىن قارايتىن بولساق، مساك ۇيىمىن ەركىن تاڭداۋ قىزمەتىن 134،4 مىڭ ادام پايدالانعان.

ونىڭ ىشىندە شەتەلدىك ازاماتتار – 1037 ادام، ونىڭ 1010-ى – باسقا ەلدەردىڭ ازاماتتارى، قانداستارىمىز – 27. قازىرگى ۋاقىتتا قىزمەت الىپ جاتقان مەديتسينالىق ۇيىم جۇمىسى قاناعاتتاندىرماعان جاعدايدا، ەمحانانى ەركىن تاڭداۋ ارقىلى تىركەلۋى ءۇشىن اتالمىش اكتسيا تۇرعىندار ءۇشىن جىل سايىن وتكىزىلەدى، ال نارىق قاتىسۋشىلارى، ونىڭ ىشىندە جاڭادان قوسىلعان ۇيىمدار كەلەسى جىلى حالىققا قىزمەت كورسەتۋ ماقساتىندا تاپسىرىس الادى.

بيىل قور 615 ءونىم بەرۋشىمەن شارت جاساستى: ونىڭ ىشىندە 357-ءسى - مەملەكەتتىك جانە 258-ءى - جەكەمەنشىك ۇيىمدار. اتالعان ۇيىمداردىڭ ءبارى دەنساۋلىق ساقتاۋ سۋبەكتىلەرىنىڭ دەرەكتەر بازاسىندا تىركەلگەن.

تىركەۋ ناۋقانى جانە ەمحانانى ەركىن تاڭداۋ مۇمكىندىگى قازاقستاندىقتار ءۇشىن كونسۋلتاتسيالىق-دياگنوستيكالىق قىزمەتتەرگە، اۋرۋحاناعا جاتىپ ەمدەلۋگە، كەز كەلگەن جوسپارلى مەديتسينالىق قىزمەتتەردىڭ كورسەتىلۋىنە جانە كوپتەگەن باسقا دا مەديتسينالىق جولدامالاردى قوسا العاندا دەنساۋلىق ساقتاۋ جۇيەسىندە مەديتسينالىق كومەك الۋعا قۇقىق بەرەدى.

ەگەر ازاماتتار ەمحانانى ەركىن تاڭداۋ قۇقىعىن پايدالانباعان بولسا، ولار وزدەرىنە بۇرىن قىزمەت كورسەتىلگەن مساك ۇيىمىنا بەكىتىلگەن بولىپ قالادى. مساك ۇيىمىنا ءۇش ءتاسىل ارقىلى تىركەلۋگە بولادى: تىكەلەي تاڭدالعان مەديتسينالىق ۇيىمعا جۇگىنۋ ارقىلى، ەلەكتروندىق ۇكىمەت پورتالى ارقىلى ونلاين تۇردە نەمەسە حالىققا قىزمەت كورسەتۋ ورتالىقتارىندا ءوتىنىش بەرۋ ارقىلى.

قازاقستان حالقىنا تمككك شەڭبەرىندە مەديتسينالىق كومەك كورسەتۋ ءۇشىن تۇراقتى نەمەسە ۋاقىتشا تۇراتىن جەرى بويىنشا مساك ۇيىمىنا بەكىتۋ ءۇشىن كورسەتىلەتىن «مەديتسينالىق-سانيتاريالىق العاشقى كومەك كورسەتەتىن مەديتسينالىق ۇيىمعا بەكىتۋ» مەملەكەتتىك قىزمەتى ىسكە قوسىلدى. مساك ۇيىمى جەكە تۇلعالارعا ءوز بەتىنشە نەمەسە «ەلەكتروندىق ۇكىمەت» ۆەب-پورتالى ارقىلى جۇگىنگەن كەزدە مەملەكەتتىك قىزمەتتى ۇسىنادى.

مساك ۇيىمىنا جۇگىنگەن ۋاقىتتا ازاماتتىڭ وزىمەن بىرگە جەكە باسىن كۋالاندىراتىن قۇجاتى بولۋى قاجەت جانە سول جەردە باس دارىگەردىڭ اتىنا ءوتىنىش جازۋى ءتيىس. بەكىتىلۋشى ەgov.kz. پورتالى ارقىلى تىركەلگەن كەزدە اۆتوريزاتسيادان ءوتىپ، ەلەكتروندىق ءوتىنىمدى تولتىرۋ قاجەت. قىزمەت كورسەتۋدىڭ ناتيجەسى ءوتىنىش بەرۋشىنىڭ جەكە كابينەتىنە جىبەرىلەدى.

حالىققا قىزمەت كورسەتۋ ورتالىقتارىنا توقتالاتىن بولساق، وندا تىركەۋ ءراسىمىن وزىنە-ءوزى قىزمەت كورسەتۋ پۋنكتىندە «Connection Points» ارقىلى ەلەكتروندىق فورماتتا جۇزەگە اسىرۋعا بولادى. ازاماتتاردىڭ كەيبىر جەكەلەگەن ساناتتارى تىكەلەي ەمحاناعا بەكىتىلە الادى. ول ءۇشىن ەركىن نىسانداعى ءوتىنىش پەن جەكە باستى كۋالاندىراتىن قۇجاتتى قوسا بەرۋ قاجەت.

اتالمىش ساناتتارعا زەينەتكەرلەر، مۇگەدەكتەر، بالا كەزىنەن مۇگەدەك جاندارعا زاڭ بويىنشا تاعايىندالعان قورعانشىلار نەمەسە قامقورشىلار، سونداي-اق پاترونات تاربيەشىلەر; جازاسىن كولونيالاردا (وتەۋ ورنى بويىنشا) وتەپ جۇرگەن سوتتالعاندار، ستۋدەنتتەر، مەرزىمدى قىزمەتتەگى اسكەري قىزمەتشىلەر، شەت مەملەكەتتەردە تۋعان بالالار، بەكىتۋدى سەنىمحات بويىنشا رەسىمدەيتىن ادامدار جاتادى.

تىركەۋ ناۋقانى - ەمحانانى اۋىستىرۋدىڭ جالعىز مۇمكىندىگى ەمەس. بۇل ءراسىمدى جىلىنا ءبىر رەت ەركىن تاڭداۋ قۇقىعىمەن جاساۋعا بولادى، سونداي-اق ەگەر ادام تۇراقتى نەمەسە ۋاقىتشا تۇراتىن جەرىن، جۇمىس نەمەسە وقۋ ورنىن اۋىستىرعان جاعدايدا، باسقا ەلدى مەكەنگە كوشكەن بولسا نەمەسە ول تۇرعان ەمحانا قايتا ۇيىمداستىرىلسا، جويىلسا جانە باسقا دا جاعدايلاردا ەمحەنانى اۋىستىرۋعا قۇقىلى.

جىل سايىنعى بەكىتۋ ناۋقانىن وتكىزۋگە باقىلاۋ مەن جاۋاپكەرشىلىك اۋماقتىق دەنساۋلىق ساقتاۋ باسقارمالارىنا جۇكتەلگەندىگىن اتاپ وتكەن ءجون، ەگەر مەديتسينالىق ۇيىمنىڭ ءوزى ازاماتتاردىڭ كوڭىلدەرىنەن شىعاتىنداي ەتىپ جاۋاپ بەرە الماعان جانە شەشىم شىعارا الماعان جاعدايدا، تىركەلۋشىلەر كوكەيلەرىندەگى سۇراقتارىن، شاعىمدارى مەن ۇسىنىستارىن اۋماقتىق دەنساۋلىق ساقتاۋ باسقارمالارىنا جولداۋعا بولادى.

مالىمەت ءۇشىن ايتا كەتەتىن بولساق، تىركەلۋگە بولاتىن بارلىق ەمحانالاردىڭ ءتىزىمىن الەۋمەتتىك مەديتسينالىق ساقتاندىرۋ قورىنىڭ www.fms.kz سايتىنان «كلينيكانى تاڭداۋ» بولىمىندە الۋعا بولادى.

ەگەر سىزدە مەديتسينالىق قىزمەتتەردى الۋعا بايلانىستى سۇراقتار تۋىنداعان جاعدايدا، ءوتىنىشتى قوردىڭ رەسمي كەرى بايلانىس ارنالارى - 1406 بايلانىس ورتالىعى، «Qoldau 24/7» ءموبيلدى قوسىمشاسى، قوردىڭ www.fms.kz سايتى، Telegram-داعى Saqtandyry-bot ارقىلى قالدىرۋىڭىزدى سۇرايمىز.