پرەزيدەنت • 15 قىركۇيەك، 2021

ماڭىزدى مىندەتتەر جۇكتەلدى

26 رەت كورسەتىلدى

مەملەكەت باسشىسى قاسىم-جومارت كەمەل ۇلى توقاەۆ قازاقستان حالقىنا ارناعان ءوزىنىڭ ءداستۇرلى جولداۋلارىندا دەنساۋلىق ساقتاۋ جۇيەسىن نازاردان تىس قالدىرعان ەمەس. پرەزيدەنت قاسىم-جومارت توقاەۆ بۇل جولى دا سالانى سەرپىلتۋگە باعىتتالعان قاداۋ-قاداۋ مىندەتتەرگە توقتالدى. وعان نەگىز دە جوق ەمەس. ويتكەنى الەم ەلدەرىن ابىگەرگە سالعان پاندەميا جاڭا شەشىمدەر قابىلداۋدى تالاپ ەتۋدە.

Egemen Qazaqstan

بۇل تۇرعىدا مەملەكەت باسشىسى قازىنادان قوماقتى قارجى قارالاتىنىن اتاپ كورسەتتى. «مەديتسينا سالاسىنا قوماقتى قارجى قۇيۋ كەرەك. بۇل قاراجات ينفراقۇرىلىمعا، مامان دايارلاۋعا جانە حالىقتى ءدارى-دارمەكپەن قامتاماسىز ەتۋگە جۇمسالۋعا ءتيىس. فارماتسەۆتيكا ونەركاسىبىنە ەرەكشە كوڭىل ءبولۋ قاجەت. ۆيرۋسپەن كۇرەس كەزىندە ءدال وسى سالا ەلىمىزدىڭ باسەكەگە قابىلەتى مەن قاۋىپسىزدىگى ءۇشىن ماڭىزدى ەكەنىنە كوزىمىز جەتتى. سوندىقتان مەديتسينا ونىمدەرىن زەرتحانالىق جانە تەحنيكالىق سىناقتان وتكىزەتىن ورتالىق قۇرۋىمىز كەرەك. جاھاندىق فارماتسەۆتيكالىق كورپوراتسيالارمەن ىنتىماقتاستىقتى جانداندىرعان ءجون. ينۆەستورلاردى تارتىپ، وزىق تەحنولوگيانى جانە وسى سالاداعى جاڭا زەرتتەۋ جۇمىستارىن يگەرۋدى قولعا الۋ كەرەك. وتاندىق تاۋار وندىرۋشىلەرمەن جاسالاتىن وففتەيك كەلىسىم شارتتارىنىڭ كولەمىن ارتتىرىپ، ءونىم ءتۇرىن كوبەيتۋ قاجەت.

بىزدەگى ءدارى-دارمەك پەن مەديتسينالىق قۇرال-جابدىقتىڭ 17 پايىزى عانا – وتاندىق ءونىم. 2025 جىلى ونى 50 پايىزعا جەتكىزۋ قاجەت.

دەنساۋلىق كەپىلى – دەنە شىنىقتىرۋ. جۇرتتىڭ جانە بالالاردىڭ سپورتپەن شۇعىلدانۋىنا جاعداي جاسالۋى قاجەت ەكەنىن تاعى دا قايتالاپ ايتامىن. وبلىس اكىمدەرى سپورت ينفراقۇرىلىمىن بىرتىندەپ سالۋدى قامتاماسىز ەتۋگە ءتيىس»، دەدى پرەزيدەنت.

كوروناۆيرۋس ينفەكتسياسىنىڭ الدىن الۋدىڭ باستى جولى ەكپە سالدىرۋ ەكەنىن مەملەكەت باسشىسى بۇعان دەيىن دە ايتقان بولاتىن. جىلدىڭ باستى قۇجاتىندا دا وسى ماسەلەگە ايرىقشا توقتالدى. «بىزدە ۆاكتسينا قورى جەتكىلىكتى، ازاماتتاردىڭ تاڭداۋ قۇقىعى بار. ەلىمىزدە جاپپاي ەكپە ەگۋ ناۋقانى ءجۇرىپ جاتقانىمەن، قوعامدا ۆاكتسيناعا قارسى ازاماتتار ءالى دە كوپ. ولار وزدەرى باس تارتىپ قانا قويماي، وزگە ازاماتتاردى اداستىرادى. جاپپاي ۆاكتسينالاۋ قارقىندى جۇرگەندە عانا، ءبىز قاۋىپتى ىندەتكە توسقاۋىل قويا الامىز»، دەدى پرەزيدەنت.

پرەزيدەنت ءسوزىنىڭ جانى بار. ويتكەنى الەۋمەتتىك جەلى ارقىلى جالعان اقپارات تاراتاتىندار از ەمەس. ولار ءوزىن عانا ەمەس، وزگەنى دە اداستىراتىندىعى ءسوزسىز. سونىمەن قاتار وتاندىق QazVac ۆاكتسيناسىنىڭ قاۋىپسىز ەكەندىگىنە كۇمان بولماۋى ءتيىس. ءتىپتى، وزگە مەملەكەتتەر تاراپىنان دا سۇرانىس ءتۇسىپ جاتقانىن قاپەردەن شىعارماۋىمىز كەرەك. وسى ورايدا قاسىم-جومارت كەمەل ۇلى: «كوروناۆيرۋس دەنساۋلىق ساقتاۋ سالاسى ءۇشىن ۇلكەن سىناق بولدى. الەمدى جايلاعان ىندەتتىڭ بەتى ءالى قايتار ەمەس. كۇن سايىن مىڭداعان ازاماتىمىز دەرتكە شالدىعىپ، تالاي ادام ومىردەن وتۋدە. ءبىز ۋاقىتتى ۇتتىرماي ىندەتپەن كۇرەسۋ ءىس-شارالارىن دەرەۋ قولعا الدىق. قازاقستان – كوروناۆيرۋسقا قارسى ۆاكتسينا جاساپ شىعارعان الەمدەگى ساناۋلى مەملەكەتتىڭ ءبىرى. ءبىزدىڭ ۆاكتسينامىزدىڭ ءتيىمدى ءارى قاۋىپسىز ەكەندىگىنە ەش كۇمان جوق. قازىر QazVac ۆاكتسيناسىنا وزگە مەملەكەتتەر دە سۇرانىس بىلدىرۋدە»، دەپ اتاپ ءوتتى.

جولداۋ جۇكتەگەن مىندەتتەر جۇيەلى جۇزەگە اسۋى ءتيىس. بۇل باعىتتا دەنساۋلىق ساقتاۋ سالاسىنىڭ قىزمەتكەرلەرى دە ايانىپ قالمايدى.

گۋلام ۋماروۆ،

جامبىل وبلىستىق قان ورتالىعىنىڭ ديرەكتورى، وبلىستىق ءماسليحاتتىڭ دەپۋتاتى، وبلىستىق وزبەك ەتنومادەني بىرلەستىگىنىڭ وكىلى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز