وتكەن عاسىردىڭ توقسانىنشى جىلدارىنىڭ سوڭى مەن ەكى مىڭىنشى جىلدارى ساياسي جۇيەنى دامىتۋ قاجەتتىلىگى تۇسىنىكتى بولدى. ويتكەنى ساياسي رەفورمانىڭ قارقىنى ەكونوميكالىق وزگەرىستەردىڭ اۋقىمىنان ءبىرشاما كەيىندەپ قالدى. زاڭدىلىق پەن كونستيتۋتسيالىق ءتارتىپ ساقتالماعان جەردە دەموكراتيانى قۇرۋ مۇمكىن بولمايتىندىقتان جانە ول الەۋمەتتىك-ەكونوميكالىق بەي-بەرەكەتتىككە اكەلەتىندىكتەن ازاماتتىق قوعام ينستيتۋتتارىن قالىپتاستىرۋدىڭ قۇقىقتىق نەگىزدەرىن قالىپتاستىرۋ قاجەتتىگى تۋىندادى. قوردالانىپ قالعان پروبلەمالار تۇبەگەيلى وزگەرىستەردى تالاپ ەتتى. الايدا بۇل كۇردەلى ۇدەرىستەردى بىردەن ەڭسەرۋ مۇمكىن ەمەس ەدى. ونىڭ ۇستىنە ول كەزدە وعان قوعام دا دايىن بولمادى. ەندەشە, وكىنىشكە قاراي, بۇل مىندەتتەردىڭ بارلىعى بىردەي تولىققاندى شەشىلدى دەۋگە كەلمەيدى.
پرەزيدەنت ق.توقاەۆ ادامزاتتىڭ الدىندا تۇرعان جاڭا جانە توسىن تالاپ-مىندەتتەردى ەسكەرە وتىرىپ, قازاقستاننىڭ ستراتەگيالىق باعدارىنىڭ باسىم مىندەتى رەتىندە ساياسي جاڭعىرۋدى ايقىنداپ وتىر. قازىرگى قاۋىپ-قاتەرلەر ەلدىڭ بۇكىل الەۋمەتتىك-ەكونوميكالىق جانە قوعامدىق-ساياسي جۇيەسىن جەدەلدەتىپ مودەرنيزاتسيالاۋ مىندەتىن شەشۋدى قاجەت ەتۋدە. بۇل جۇمىستار ساياسي جۇيەنى تۇراقتىراق ەتۋگە, ونىڭ تەپە-تەڭدىگىن قامتاماسىز ەتىپ, جەتىلدىرۋگە باعىتتالۋدا. ول كۇشتەر تەڭگەرىمى مەن بيلىك تارماقتارىنىڭ جاۋاپكەرشىلىگىن, ازاماتتىق قوعامنىڭ بەلسەندىلىگىن ارتتىرۋدى كوزدەيدى. ەندەشە, دەموكراتيالىق قايتا قۇرۋلاردى جۇرگىزۋ بارىسىندا ىرگەلى قۇندىلىقتار مەن قوعامدىق مامىلەگە كەلۋ ارقىلى ەلدىڭ تۇراقتى دامۋىنا باعىتتالعان شەشۋشى قادامدار جاسالۋى كەرەك.
پرەزيدەنتتىڭ سوڭعى ەكى جىلدا قولعا الىپ, زاڭداستىرىپ, ىسكە اسىرىپ جاتقان ەلەۋلى قوعامدىق-ساياسي وزگەرىستەرىن اۋمالى-توكپەلى جاڭا ءداۋىردىڭ تالاپتارىنا بەرگەن ناقتى جاۋابى دەۋگە بولادى. ولار ەلىمىزدىڭ ساياسي جۇيەسى الەۋەتىنىڭ ساپالىق نەگىزىن كۇشەيتىپ, تۇرعىنداردىڭ مەملەكەت باسقارۋ ىسىنە ارالاسۋىن ىنتالاندىرماق. ال ول قازاقستاندىق قوعامداعى ساياسي ۇدەرىستەردىڭ اشىقتىعىن جانە ونىڭ باسەكەلەستىگىن ارتتىرا تۇسەدى. ناتيجەسىندە, مەملەكەتتىڭ تيىمدىلىگى ارتادى. ەڭ باستىسى, مىقتى, ءادىل ءارى وزىق مەملەكەت قۇرۋعا باعىتتالعان وزگەرىستەر قازاقستاننىڭ وزىنە ءتان ەرەكشەلىكتەرىن ەسكەرە وتىرىپ, ەۆوليۋتسيالىق جولمەن ىسكە اسىرىلماق. سونىمەن بىرگە مەملەكەت باسشىسىنىڭ مەملەكەتتى باسقارۋداعى ساياسي كوزقاراستارى مەن وزىندىك قولتاڭباسىنا كەشەندىلىك, بىرىزدىلىك, جۇيەلىلىك پەن ناقتىلىق ءتان. ونىڭ ايعاعى رەتىندە اۋىل اكىمدەرىنىڭ سايلاۋىنان كەيىن, ياعني 2024 جىلى اۋدان اكىمدەرىنىڭ تىكەلەي سايلاۋىن وتكىزۋ تۋرالى شەشىمدى اتاپ وتكەن ءجون. تۇپتەپ كەلگەندە, بۇل باتىل قادامداردىڭ ازاماتتىق مادەنيەتتى دامىتۋ مەن اۋىل تۇرعىندارىنىڭ الەۋمەتتىك بەلسەندىلىگىن ارتتىرۋعا تىكەلەي ىقپال ەتىپ, جەرگىلىكتى ءوزىن-ءوزى باسقارۋ جۇيەسىن نىعايتارى ءسوزسىز.
پرەزيدەنتتىڭ جولداۋىنداعى اۋىلدىق جەردەگى ازاماتتىق باستامالارعا قولداۋ كورسەتۋ, ونداعى ۇكىمەتتىك ەمەس ۇيىمداردى جەرگىلىكتى بيۋدجەتتەن قارجىلاندىرۋدى ۇلعايتۋ تەتىكتەرىن جاساۋعا باعىتتالعان زاڭ جوباسى قوعامدىق تالقىلاۋدان ءوتتى. وتباسىلىق جانە گەندەرلىك ساياساتتىڭ تۇجىرىمداماسىندا وتباسىنىڭ ءومىر ساپاسىن كوتەرۋ, انا مەن بالانى قورعاۋ ماسەلەلەرى قاراستىرىلماق. ءماجىلىستىڭ قاراۋىنا تۇسكەن زاڭ جوبالارىنىڭ اراسىندا قىلمىستىق كودەكسكە ءولىم جازاسىنا بايلانىستى زاڭنامالىق جاڭالىقتار, قۇقىق قورعاۋ قىزمەتىن وتكەرۋ ءتارتىبىن جەتىلدىرۋگە جانە جەمقورلىققا قارسى كۇرەس ماسەلەلەرىنە قاتىستىلارى دا بار.
سونىمەن از ۋاقىتتىڭ ىشىندە كوپ جۇمىس اتقارىلدى. ەلىمىزدە جۇيەلى وزگەرىستەر مەن رەفورمالار جۇرگىزۋگە قاجەتتى زاڭنامالىق نەگىز جاسالۋدا. ولار حالىقتىڭ مۇددەسى مەن مەملەكەتتىڭ مۇمكىندىكتەرىن زەردەلەۋ نەگىزىندە قابىلداندى. ەل دامۋىنىڭ شەشۋشى كەزەڭىنە قادام باسقان كەزدە جانە دۇنيە جۇزىندەگى احۋالدىڭ قۇبىلمالى ەكەنىن ەسكەرە كەلە, ق.توقاەۆ ۇستاناتىن باعىتىن بەلگىلەپ, ماقساتىن ايقىنداپ, ناقتى جوسپارىن جاساپ, باستاعان ءىسىن سوڭىنا دەيىن جەتكىزۋگە دەگەن ۇلكەن سەنىممەن بەلىن بەكەم بۋدى. ەندىگى جەردە ۋاقىت ۇتتىرماي, الدىمىزدا تۇرعان ماقساتتاردى ناتيجەلى ورىنداۋ ءۇشىن قوعام بولىپ, ءبىرتۇتاس ەل رەتىندە ادال ەڭبەك ەتىپ, رەفورمالاردى جۇرگىزۋگە بەلسەندى اتسالىسۋ قاجەت-اق. وتانىمىزدىڭ, تاۋەلسىزدىكتىڭ بولاشاعىنا دەگەن جاۋاپكەرشىلىكپەن اركىم ازاماتتىق بورىشىن ادال ورىنداپ, زاڭمەن ءومىر ءسۇرىپ, وسكەلەڭ ۇرپاقتى وسىعان باۋلىسا, بارلىعى دۇرىستالادى. «ەندەشە, بىرلىگىمىزدى بەكەمدەپ, ەل ءۇشىن ەڭبەك ەتەيىك!», دەگەن مەملەكەت باسشىسىنىڭ سوزىندە ۇلكەن ءمان-ماعىنا مەن جاۋاپكەرشىلىكتىڭ بارى انىق, اعايىن.
