ەلباسى نۇرسۇلتان نازارباەۆ بيىلعى جولداۋىندا دا انالارعا ۇلكەن جاۋاپكەرشىلىك جۇكتەپ وتىر. ول كىسىنىڭ «ءماڭگىلىك قازاقستان» جوباسىنىڭ ىرگەتاسىن ءبىزدىڭ بالالارىمىز قالاپ, نەمەرەلەرىمىز يگىلىگىن كورەتىن بولادى. سوندىقتان دا «بۇل ستراتەگيا سىزدەرگە ارنالعان. ونى جۇزەگە اسىراتىن دا, جەمىسىن كورەتىن دە سىزدەر. ءوز جۇمىس ورىندارىڭىزدا وتىرىپ, وسى جۇمىسقا ارقايسىڭىز اتسالىسىڭىزدار. ەلدىڭ بولاشاعىن بارشا حالىقپەن بىرگە جاساڭىزدار!» دەپ وتىر ەلباسى.
وتان وتباسى جاۋاپكەرشىلىگىنە يەك ارتادى
ەلباسى نۇرسۇلتان نازارباەۆ بيىلعى جولداۋىندا دا انالارعا ۇلكەن جاۋاپكەرشىلىك جۇكتەپ وتىر. ول كىسىنىڭ «ءماڭگىلىك قازاقستان» جوباسىنىڭ ىرگەتاسىن ءبىزدىڭ بالالارىمىز قالاپ, نەمەرەلەرىمىز يگىلىگىن كورەتىن بولادى. سوندىقتان دا «بۇل ستراتەگيا سىزدەرگە ارنالعان. ونى جۇزەگە اسىراتىن دا, جەمىسىن كورەتىن دە سىزدەر. ءوز جۇمىس ورىندارىڭىزدا وتىرىپ, وسى جۇمىسقا ارقايسىڭىز اتسالىسىڭىزدار. ەلدىڭ بولاشاعىن بارشا حالىقپەن بىرگە جاساڭىزدار!» دەپ وتىر ەلباسى.
مەن قالا قىزىمىن, اۋىل كەلىنىمىن. سەگىز بالانى ءدۇنيەگە اكەلسەم دە جۇمىستان قالعان ەمەسپىن. ۇيدە دە قاراپ وتىرمايمىز. قۇراق قۇراپ, كيىز باسۋدى, شارۋا ىستەۋدى قايىن ەنەمنەن ۇيرەندىم. بالالارىما دا ۇيرەتۋدەمىن. بۇل – تاربيەنىڭ ءتالىمدى ورنەگى. قازىر ءۇي جانىنان تىگىن تسەحىن اشىپ, ۇلتىمىزدىڭ قولونەرىن دامىتۋ قامىندامىن. جولداۋدا اتاپ كورسەتىلگەنىندەي, بۇل ىسكە وتباسى مۇشەلەرىن كەڭىنەن تارتاتىن بولامىن.
كەلەشەگى كەمەل ەلدىڭ بولاشاعى – تاربيەلى ۇرپاقتا. بۇل ورايدا, بالانى ماتەريالدىق قامتاماسىز ەتۋدەن گورى, ونىڭ تاربيەسىمەن اينالىسۋ قيىنىراق. بالا اۋەلى اتا-اناسىنىڭ ءسوزى زاڭ بولعاندىقتان, اكە-شەشەسىنىڭ جاساعان ءىس-ارەكەتىن وزىنە ۇلگى ەتىپ الادى. يسلامدا «بالا جاراتقان يەمىزدىڭ اتا-اناعا جىبەرگەن اماناتى» دەگەن ءتۇسىنىك بار. وسى جولدا سەنىم بيىگىنەن كورىنىپ, مىندەتىن ادال اتقارعان اتا-انالار قانداي سىي-قۇرمەتكە بولسىن لايىقتى.
وتباسى – وتاننىڭ ءبىر ءبولشەگى دەگەن جاقسى ءسوز بار. ەندەشە, ەرتەڭگى ەرەن ءىستەرىمىز, تەلەگەي تابىستارىمىز, باقىتتى تىرشىلىگىمىز بارشامىزدىڭ قولىمىزدا ەكەندىگىن ۇمىتپايىق دەگىم كەلەدى.
روزا اسىلبەكوۆا,
«التىن القا» يەگەرى.
اقمولا وبلىسى,
تسەلينوگراد اۋدانى.
ءان مەن كۇي الەۋمەت توق بولعاندا عانا كەرەك
ەل ءومىرى تەك مادەنيەتتەن تۇرمايدى. ەڭ الدىمەن, حالىقتىڭ تۇرمىسى جاقسى بولۋى كەرەك ەكەنىن ارقايسىمىز بىلەمىز. نان بولسا ءان دە بولاتىنىن بالا كەزىمىزدەن قۇلاعىمىزعا قۇيىپ وسكەن ۇرپاقپىز. «ورازا, ناماز توقتىقتا» دەگەندەي, ەلباسىنىڭ بيىلعى جولداۋىندا ەڭ ءبىرىنشى الەۋمەتتىك ماسەلەلەردىڭ كوتەرىلگەنى ونەر ادامدارىنىڭ دا كوڭىلىنەن شىعادى دەپ ويلايمىن. ەكونوميكاسى مەن عىلىم-ءبىلىمى دامىعان ەل عانا مادەنيەتكە كوڭىل بولە الاتىنىنا كوزىمىز جەتكەن.
سوندىقتان دا جولداۋدا باسىمدىق بەرىلگەن بارلىق سالالاردىڭ دامۋى ءتۇپتىڭ-تۇبىندە ۇلتتىق ونەرگە دە جاعداي جاساۋعا جول باستاپ بەرەدى دەپ ەسەپتەيمىن. تىنىشتىعى, تاتۋلىعى, دامۋى جوق ەلدەردىڭ مادەنيەت تۇگىلى, باس قايعىسىمەن, ءبىر كۇنكورىس قامى ءۇشىن وزگە ەلدەردەن جۇمىس ىزدەپ, سەندەلىپ ءجۇر. سوندىقتان دا پرەزيدەنتىمىزدىڭ بۇگىنگى تابىسىمىزعا توقمەيىلسىمەي, ەرتەڭگى بولاشاعىمىزعا كوپ ءمان بەرىپ, جاستارىمىز باسەكەگە قابىلەتتى ەلدەرمەن تەرەزەسى تەڭ دارەجەدە ءبىلىم الۋىنا ىقپال جاساپ وتىرعانىنا ءبىز دە قۋانامىز.
ءوز اتا-انام ەڭبەكپەن كوركەيگەن قاراپايىم ادامدار بولعاندىقتان, الدىمەن ءارتۇرلى سالالاردا جۇمىس ىستەپ جاتقان جانداردىڭ جالاقىسى كوتەرىلىپ, جاعداي جاسالىپ جاتقانى بارشامىز ءۇشىن ماڭىزدى. ءارقايسىمىزدىڭ اكە-شەشەمىز مۇعالىم, ەندى بىرەۋلەرىمىزدىڭ اتا-انامىز مالشى, دارىگەر, باۋىرلارىمىز ستۋدەنت بولعاندىقتان, ەلباسى جولداۋىندا ايتىلعان, جەكە-جەكە توقتالعان ماسەلەلەردىڭ ءبارى اينالىپ كەلگەندە بارشامىزعا قاتىستى بولىپ شىعادى.
ەلباسىمىز باسقاسىن بىلاي قويعاندا, ايران-ءسۇتتى الىستان تاسىماي, ءوزىمىز ءوندىرىپ, قايتا شەت مەملەكەتتەرگە ەكسپورتتاۋدى دا ايتىپ وتىر. مىسالى, العاشقى مەديتسينالىق-سانيتارلىق كومەكتى دامىتۋ, سپورتپەن شۇعىلدانۋ, دۇرىس تاماقتانا ءبىلۋ, جۇيەلى پروفيلاكتيكالىق تەكسەرىلۋ دەگەندەردىڭ بارلىعى ءبىزدىڭ حالقىمىز ءۇشىن اۋاداي قاجەت. سونان سوڭ ماعان مۇمكىندىگى شەكتەۋلى, مۇگەدەك جانداردى دا جۇمىسپەن قامتىپ, ولاردىڭ قوعامدىق كولىكتەردە قوزعالۋىنا, باراتىن جەرلەرىنە بارىپ-كەلۋىنە جاعداي تۋعىزۋ كەرەك دەگەن جولدار وتە ۇنادى. شەتەلدەردە گاسترولدىك ساپارلاردا بولعاندا, ول ەلدەردە مۇگەدەك جاندارعا جاسالعان جاعدايلاردى كورىپ, بىزدە دە وسىنداي بولسا ەكەن دەپ ويلايتىنمىن. بۇل – ءوز حالقىن سىيلاعان, سۇيگەن ەلباسىمىزدىڭ ۇلكەن ءىسى. قوعامداعى ءاربىر ادامنىڭ جاعدايىن ويلاساق, ەرتەڭ وسىنىڭ ءبارى الدىمىزدان شىعادى.
ەلباسى, وتە كۇردەلى, جان-جاقتى تاپسىرمالار بەرە وتىرىپ, مادەنيەت سالاسىنان ءبارىبىر اتتاپ وتكەن جوق. نۇرسۇلتان ءابىش ۇلى: «جالپىقازاقستاندىق مادەنيەتتى دامىتۋعا جاڭاشا سەرپىن بەرگەن ءجون. مادەني ساياساتتىڭ ۇزاقمەرزىمدى تۇجىرىمداماسىن ازىرلەۋ قاجەت. وندا قازاقستاندىقتاردىڭ باسەكەگە قابىلەتتى مادەني مەنتالدىگىن قالىپتاستىرۋعا, زاماناۋي مادەنيەت كلاستەرلەرىن دامىتۋعا باعىتتالعان شارالار بەلگىلەۋ كەرەك», دەدى.
كەزىندە ونەر سالاسى دا تالاي قيىندىقتار مەن قارجى تاپشىلىعىن باستان وتكەردى. ەندى جاڭا زامانعا اياق باستىق. الداعى ۋاقىتتا ونەر سالاسىن ساپالاندىرۋ ءىسى جۇرەتىنىنە سەنەمىن.
ءمادينا سادۋاقاسوۆا,
قازاقستاننىڭ ەڭبەك
سىڭىرگەن قايراتكەرى, ءانشى.
الماتى.
