اقتاۋدا «جامال-اي» اتتى كاسىپورىن بار. ءوزىن-ءوزى جارنامالاپ, داڭقى جەر جارىپ جاتاتىندار ساناتىنان ەمەس, توماعا-تۇيىق. وسىنىسىنا قاراپ, كىشىگىرىم مەكەمەلەردىڭ ءبىرى بولار دەپ ويلايتىنبىز, سويتسەك, وزىندىك بەدەر-بەينەسى بار, شارۋاسىن دوڭگەلەنتىپ وتىرعان بىلدەي اكتسيونەرلىك قوعام ەكەن.
«شاعىن جانە ورتا بيزنەستى دامىتۋ – XXI عاسىرداعى قازاقستاندى يندۋستريالىق جانە الەۋمەتتىك جاڭعىرتۋدىڭ باستى قۇرالى. ەكونوميكامىزدا شاعىن جانە ورتا بيزنەستىڭ ۇلەسى ارتقان سايىن قازاقستاننىڭ دامۋى دا ورنىقتى بولا تۇسەدى».
ن.نازارباەۆ.
(قازاقستان حالقىنا جولداۋىنان).
اقتاۋدا «جامال-اي» اتتى كاسىپورىن بار. ءوزىن-ءوزى جارنامالاپ, داڭقى جەر جارىپ جاتاتىندار ساناتىنان ەمەس, توماعا-تۇيىق. وسىنىسىنا قاراپ, كىشىگىرىم مەكەمەلەردىڭ ءبىرى بولار دەپ ويلايتىنبىز, سويتسەك, وزىندىك بەدەر-بەينەسى بار, شارۋاسىن دوڭگەلەنتىپ وتىرعان بىلدەي اكتسيونەرلىك قوعام ەكەن.
بۇدان جيىرما ءبىر جىل بۇرىنعى جاعداي كوپشىلىكتىڭ ەسىندە بولار. نارىقتىق ەكونوميكاعا ءوتىپ, قىمباتشىلىق پەن تاۋار جەتىسپەۋشىلىگى وكپەدەن قوسارلانا سىققان كەز. ساپاسىز كيىمدەردى تاسىعان ساۋداگەرلەر ەلدى قامتىپ تۇردى. توقتى-تورىمنىڭ قۇنى بولماي, شاعىن قاپتاعى ماكارون ءونىمى ورنىنا ەكى-ۇشەۋى قوساقتالىپ تيەلە بەرەتىن. «جامال-اي» ءوز ىرگەتاسىن وسى جىلدارى قۇرىپتى. وڭاي بولماعانى بەلگىلى, بىراق ەلدى قاجەتتى كيىم-كەشەك, اياق كيىممەن قامتاماسىز ەتەمىن دەگەن قارلىعاش-نيەت. اراداعى جيىرما ءبىر جىل «جامال-ايدىڭ» قالىپتاسۋى مەن دامۋىنا, ءونىم ءوندىرۋ الەۋەتىن دە, تەحنولوگياسىن دا جەتىلدىرۋگە ارنالىپتى.
ءونىمدى ەڭبەككە قول جەتكىزۋ ءۇشىن الدىمەن, تەحنيكالىق شەبەرلىكتى جەتىلدىرۋ قاجەت ەكەندىگىن بىلگەن ولار, 1994 جىلى يتاليالىق ماماندارمەن بىرلەسىپ, اسكەري قىزمەتكەرلەرگە ارنالعان قىسقا جانە بيىك قونىشتى باتەڭكەلەردى جاساۋ تەحنولوگياسىن ەنگىزدى. سودان بەرى ەلىمىزدىڭ قارۋلى كۇشتەرى قۇرىلىمىن ساپالى اسكەري ونىمدەرمەن, ياعني تابانى قۇيۋ ادىسىمەن بەكىتىلگەن بيىك قونىشتى باتەڭكەلەرمەن قامتاماسىز ەتىپ كەلەدى. ال ارنايى قورعانىس قاسيەتى بار اياق كيىمدەرى ەلىمىزدىڭ تۇكپىر-تۇكپىرىندەگى قۇرىلىس جانە مۇناي سالالارى قىزمەتكەرلەرىنىڭ قالاپ الار دۇنيەسى. الەۋمەتتىك سالا قىزمەتكەرلەرى دە وزدەرىنە قاجەتتى ارنايى جۇمىس كيىمدەرىن وسى كاسىپورىننان تابادى.
شىعارىلىپ وتىرعان ونىمدەردىڭ ساپاسىن انىقتاۋ ماقساتىندا قازاقستان رەسپۋبليكاسىنىڭ سىناق زەرتحانالارىندا سىناقتار وتكىزىلەدى, بىزدە كەز كەلگەن ءونىمنىڭ سايكەستىك سەرتيفيكاتتارى بار. جوعارى ساپالى اياق كيىمدەرمەن قامتاماسىز ەتۋ ءۇشىن, تەحنيكالىق باقىلاۋ ءبولىمى مەن باس تەحنولوگ قويماعا كەلىپ تۇسكەن شيكىزاتتىڭ مەملەكەتتىك ستاندارتتارعا, تەحنيكالىق شارتتارعا سايكەستىگىن باقىلايدى. كاسىپورىندى شيكىزاتپەن جابدىقتاۋ ءبولىمى تابيعي تەرى جانە ءجۇن, تۇتىنۋشىلاردىڭ سۇرانىسى بويىنشا ءارتۇرلى قورعانىس قاسيەتى بار توزىمدىلىگى جوعارى ماتالار, باسقا دا قاجەتتى شيكىزاتتى ساتىپ الادى. ساپا مەنەدجمەنت جۇيەسى يسو 9001, OHSAS 18001 ينتەگرالدى جۇيەلەرىمەن سەرتيفيكاتتالعان جانە بارلىق تالاپتارىنا ساي كەلەدى, دەيدى بىزبەن اڭگىمەلەسكەن كاسىپورىننىڭ كوممەرتسيا ءبولىمىنىڭ باسشىسى ف.تۇراشەۆا مەن ينجەنەر ساپا جانە ستاندارتتاۋ جونىندەگى ينجەنەر ج.ءىزباساروۆا.
وندىرىستە وتە جوعارى بىلىكتى, كوپ جىلدىق جۇمىس تاجىريبەسى بار ماماندار قىزمەت اتقارادى. اسىرەسە, اياق كيىم وندىرىسىندەگى تەحنولوگيا, جوبالاۋ جانە جاساپ شىعارۋ كەزىندەگى جوعارى ساپالى ءونىم الۋدا ينجەنەرلىك قۇرامنىڭ ەڭبەگى ەرەن.
كاسىپورىن يتاليانىڭ, گەرمانيانىڭ جوعارى تەحنولوگيالىق جابدىقتارىن پايدالانادى. اياق كيىم ءوندىرىسى سالاسى كولدەنەڭ تۇيىقتالعان كونۆەيەرلەرمەن قامتاماسىز ەتىلگەن. وسى سالادا وندىرىستىك قۋاتتىلىق جىلىنا 100 مىڭ جۇپ اياق كيىم وندىرەتىن بولسا, وتكەن جىلى 60 مىڭ جۇپ اياق كيىمدى ساتىلىمعا شىعارعان. جىلىنا 20 مىڭ دانا وندىرىستىك قۋاتتىلىقتى مەجەلەگەن تىگىن ءوندىرىسى دە بىلتىر ءدال وسىنداي ساتىلىمعا قول جەتكىزگەن. ز.حاسانوۆا باسشىلىق ەتەتىن 160 ادامدى قىزمەتپەن قامتىپ وتىرعان كاسىپورىندا جاستاردىڭ ۇلەسى 45 پايىزدى قۇرايدى.
ەلىمىزدىڭ دامۋىنا ءوز ۇلەستەرىن قوسىپ, تىپ-تىنىش جۇمىسىن جۇرگىزىپ وتىرعان «جامال-ايدىڭ» ارقالاعان جۇگى دە, العان العىسى دا الىپ ەكەن. قارلىعاشتىڭ قاۋىرسىن قاناتى قاتايا تۇسكەن. كاسىپورىننىڭ ىشكى الەمىنە از-ماز ۇڭىلگەندە وسىنى بىلدىك.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
