جەرلەستەرىمىزگە ءوز توبىنان ىركىلمەي شىعۋ ايتارلىقتاي قيىندىق تۋعىزبايدى دەگەن ويدامىز. ويتكەنى قازاقستان قۇراماسىنىڭ وزگە كوماندالارعا قاراعاندا حالىقارالىق ارەنادا قول جەتكىزگەن تابىسى الدەقايدا قوماقتى. بالكىم, ليتۆا مەن كوستا-ريكا ءبىراز تىرەسۋى مۇمكىن. بالتىق جاعالاۋى وكىلدەرى بۇعان دەيىن پالەندەي بەلەستەردى باعىندىرماعانىمەن, جارىس قوجايىندارى رەتىندە ءوز كورەرمەندەرىنىڭ كوز الدىندا جاندارىن سالىپ ايقاساتىنى انىق. كوستا-ريكا – ءوز قۇرلىعىنداعى بەدەلى بار كوماندالاردىڭ ءبىرى. ولار 2000 جىلى كونكاكاف بىرىنشىلىگىنىڭ جەڭىمپازى اتانسا, 2004 جىلى قولا مەدالدى يەلەندى. الەم چەمپيوناتىندا ءتورت رەت ونەر كورسەتىپ, 2016 جىلى 1/8 فينالعا دەيىن جەتتى. ال ۆەنەسۋەلا قۇراماسىندا ونداي تابىستىڭ بىردە-ءبىرى جوق.
قازاقستان ءۇشىن بۇل – ءۇشىنشى الەم چەمپيوناتى. العاشىندا ءبىز ازيا قۇرلىعىنداعى ىرىكتەۋ سىنىنان سۇرىنبەي ءوتىپ, 2000 جىلى گۆاتەمالادا وتكەن الەمدىك دوداعا قاتىستىق. بۇل ساپار بىزدەر ءۇشىن ءساتسىز اياقتالدى. تۇساۋكەسەر كەزدەسۋدە برازيليا تاس-تالقانىمىزدى شىعاردى – 1:12. ودان كەيىن الاڭ يەلەرىنە ەسە جىبەردىك – 5:6. سوڭعى ويىندا پورتۋگاليادان ويسىراي ۇتىلدىق – 2:6. دەسەك تە بۇل ناتيجەگە بولا قازاقستاندىق جانكۇيەرلەر قاتتى كۇيىنە قويعان جوق. سەبەبى ول كەزدەرى ەلىمىزدە فۋتزال ەندى-ەندى عانا ەڭسە تىكتەپ كەلە جاتقان. عاسىرلار توعىسىندا جاساقتالعان كوماندا ساپىندا كىلەڭ ءوز ورەندەرىمىز وينادى. سوندىقتان دا اسا ماڭىزدى جارىسقا جولداما الۋدىڭ ءوزى ۇلكەن جەتىستىك سانالدى.
قازاقستان قۇراماسى ەكىنشى رەت 2016 جىلى كولۋمبيادا شىمىلدىعى تۇرىلگەن جارىسقا قاتىستى. ول كەزدە ۋەفا-عا وتكەنبىز. العاشقى اينالىمدا ارگەنتيناعا تاپ كەلدىك. امەريكا كۋبوگىندا 10 رەت (2 التىن+5 كۇمىس+3 قولا) جەڭىس تۇعىرىنا كوتەرىلگەن كوماندامەن تەڭ دارەجەدە وينادىق. الايدا 20-مينۋتتا الاميرو ۆاپوراكي سوققان جالعىز گول باسەكە تاعدىرىن شەشتى – 0:1. ءبىر ايتا كەتەرلىگى, سول جىلى ارگەنتينالىقتار الەم چەمپيونى اتاندى. كەلەسى اينالىمدا كوستا-ريكامەن كۇش سىناستىق. بۇل جولى ايتۋلى جارىس تاريحىنداعى العاشقى جەڭىسىمىزگە قول جەتكىزدىك. دۋگلاس, تاكو جانە لەو سوققان ءۇش دوپقا قارسىلاستار كومانداسى ءبىر عانا گولمەن جاۋاپ بەرە الدى – 3:1. ودان كەيىن سولومون ارالدارىن سان سوقتىردىق. بۇل باسەكە 10:0 ەسەبىمەن اياقتالدى.
جەرلەستەرىمىزگە پلەي-وفف كەزەڭىنىڭ العاشقى اينالىمىندا يسپانيا قۇراماسىمەن كۇش سىناسۋعا تۋرا كەلدى. ەكى دۇركىن الەم چەمپيونى, ءۇش دۇركىن ۆيتسە-چەمپيون جانە ءبىر مارتە قولا جۇلدەگەر دەگەن دارداي اتاعى بار ازۋلى قارسىلاسقا ءبىزدىڭ جىگىتتەردىڭ ءالى جەتپەدى. كورەرمەندەر كوڭىلىنەن شىققان تارتىستى ويىن 5:2 ەسەبىمەن يسپانيالىقتاردىڭ پايداسىنا شەشىلدى. جەرلەستەرىمىزدىڭ اراسىنان شىڭعىس ەسەنامانوۆ پەن داۋرەن نۇرعوجين نىسانانى ءدال كوزدەدى.
مىنە, ەندى الەمدىك دوپ دوداسىنا قازاقستاننىڭ فۋتزالشىلارى ءۇشىنشى مارتە قاتىسقالى وتىر. ۇلتتىق كوماندامىزدىڭ باس باپكەرى ريكاردو كاكا بالتىق جاعالاۋىنداعى جارىستا مىنا شاكىرتتەرىنە سەنىم ارتىپ وتىر: قاقپاشىلار – يگيتا («قايرات») مەن راۋان اتانتاەۆ («اتىراۋ»). قاپتالداعى ويىنشىلار – تاينان («ەل-پوسو», يسپانيا), دۋگلاس, داۋرەن نۇرعوجين, شىڭعىس ەسەنامانوۆ, البەرت اكباليكوۆ, ءبىرجان ورازوۆ, داۋرەن تۇرساعۇلوۆ («قايرات»), ازات ۆاليۋللين («ۋحتا», رەسەي), ارنولد كناۋب, نۇربەك قاراعۇلوۆ («اقتوبە»), بولات سارباسوۆ, جومارت توقاەۆ («اتىراۋ»), تورەحان دوسوۆ («بايتەرەك») جانە اقەدىل مادياروۆ («ليپەتسك», رەسەي).
سونداي-اق توپتىق تۋرنيرلەردە مىنا كوماندالار ءوزارا كۇش سىناسادى: ۆ توبى – وزبەكستان, گۆاتەمالا, رەسەي جانە مىسىر. س توبى – تايلاند, پورتۋگاليا, ماروككو جانە سولومون ارالدارى. D توبى – پاناما, چەحيا, ۆەتنام جانە برازيليا. ە توبى – انگولا, جاپونيا, پاراگۆاي جانە يسپانيا. F توبى – ارگەنتينا, اقش, سەربيا جانە يران. ليتۆاداعى دوپ دوداسى ۆيلنيۋستەگى «سيمەنس ارەنا» (10 مىڭ كورەرمەنگە ەسەپتەلگەن) مەن كاۋناستاعى «جالگيريس ارەنادا» (13 807) جانە كلايپەداداعى «شۆيتۋرە ارەنادا»
(6 200) وتەدى.
جارىستىڭ باستى فاۆوريتتەرى رەتىندە برازيليا, يسپانيا جانە ارگەنتينا قۇرامالارى سانالادى. بۇل بولجام نەگىزسىز ەمەس. ەگەر وتكەنگە زەر سالساق, فۋتزالدان الەم چەمپيوناتى نەبارى سەگىز مارتە عانا ۇيىمداستىرىلعانىن بايقايمىز. وسى جارىستاردا برازيليالىقتار بەس رەت (1989, 1992, 1996, 2008, 2012 جىلدارى) باس جۇلدەنى ولجالاسا, يسپانيالىقتار ەكى رەت (2000, 2004 جىلدارى) دارا شىقتى. تاعى ءبىر التىن مەدال (2016 جىلى) ارگەنتينالىقتارعا بۇيىردى. ولاردىڭ باستى قارسىلاستارى رەتىندە يتاليا مەن رەسەي اتالۋدا. ءوز تاريحىندا اپەننين تۇبەگىنىڭ تۇلەكتەرى ءۇش رەت (2004 جىلى – كۇمىس, 2008 جانە 2012 جىلدارى – قولا) جۇلدەگەرلەر قاتارىنان كورىنسە, كورشىلەرىمىز ايتۋلى دودادا ەكى مارتە (1996 جىلى – قولا, 2006 جىلى قولا) ءۇشىنشى ورىننان كورىندى. سونداي-اق سوڭعى باسەكەدە قولا مەدالدى قورجىنعا سالعان يسپانيا فۋتزالشىلارىنىڭ دا الەۋەتى جوعارى باعالانۋدا. ال ءبىز, ارينە, قازاقستان قۇراماسىنا ۇلكەن ۇمىتپەن قارايمىز.
