مەملەكەت باسشىسى ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنا ءۇن قوسۋ, وندا ايتىلعان مىندەتتەر مەن باعىتتاردى زەردەلەۋ, سوعان وراي وڭىرلەردە جاسالاتىن جۇمىستاردى باعامداپ, پىسىقتاپ الۋ ءۇشىن ءتۇرلى جيىندار وتۋدە. ماڭعىستاۋ وبلىسى اكىمدىگىندە وتكەن اكتيۆ جينالىسىنىڭ وزەگى مەن وربىتەرى دە جولداۋ بولدى.
مەملەكەت باسشىسى ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنا ءۇن قوسۋ, وندا ايتىلعان مىندەتتەر مەن باعىتتاردى زەردەلەۋ, سوعان وراي وڭىرلەردە جاسالاتىن جۇمىستاردى باعامداپ, پىسىقتاپ الۋ ءۇشىن ءتۇرلى جيىندار وتۋدە. ماڭعىستاۋ وبلىسى اكىمدىگىندە وتكەن اكتيۆ جينالىسىنىڭ وزەگى مەن وربىتەرى دە جولداۋ بولدى.
– جولداۋدىڭ باسىمدىقتارى ەلباسىنىڭ تۇراقتى دامۋشى مەملەكەت قۇرۋعا دەگەن ساياسي باعىتىنىڭ بىرىزدىلىگىن كورسەتتى. جولداۋ – جوسپارلاۋ ساياساتى, ۇزاقمەرزىمدى دامۋ مەن ەكونوميكالىق ءوسۋدى ماقسات ەتكەن «ماڭگىلىك ەلىمىزدىڭ» تاعى ءبىر ستراتەگيالىق جوسپارى. وندا ۇزاقمەرزىمدى باعىت-باعدارلار, ەل دامۋىنىڭ الداعى قىسقا مەرزىمدى كەزەڭگە ارنالعان باسىم باعىتتارى ايقىندالعان. بۇل جوسپار ءبىزدىڭ دامىعان 30 ەلدىڭ قاتارىنا كىرۋ جولىنداعى ىستەرىمىزگە جاڭا سەرپىن بەرەرى ءسوزسىز, – دەدى وبلىس اكىمى ا.ايدارباەۆ.
جولداۋدا ناقتى مىندەتتەر قويىلدى. مىندەتتەردى ورىنداۋعا جانە جۇزەگە اسىرۋعا بولادى. ول ءۇشىن بارلىق العىشارتتار بار. سول سەبەپتى, ونى مۇلتىكسىز, ساپالى جانە تولىق ىسكە اسىرۋ ماقساتىندا دەپۋتاتتىق كورپۋسپەن, بارلىق دەڭگەيدەگى اكىمدەرمەن, ۇكىمەتتىك ەمەس سەكتورمەن, قوعامدىق ۇيىمدارمەن بىرگە ايقىن ءىس-قيمىل جوسپارىن جاساپ شىعارۋ, باسىمدىقتاردى انىقتاۋ, جولداۋدىڭ ءار تارماعى بويىنشا ناقتى ينديكاتورلار بەلگىلەۋ قاجەت. وسىلاي دەپ ويىن ساباقتاعان وبلىس باسشىسى اۋدان, قالا اكىمدەرى, سالالىق باسقارمالار باسشىلارى, دەپۋتاتتار, ۇكىمەتتىك ەمەس ۇيىمدار مۇشەلەرى, ەتنومادەني بىرلەستىكتەر وكىلدەرى, جاستار جانە باق وكىلدەرى قاتىسقان اۋقىمدى جيىننىڭ باعىت-باعدارىن ايقىنداپ بەردى. ودان ءارى جولداۋدا كورسەتىلگەن باسىم جانە باستى باعىتتارعا جەكە توقتالىپ, ولاردىڭ ماڭعىستاۋ وڭىرىندە جۇزەگە اسۋ مۇمكىندىكتەرىن تارقاتا سويلەگەن ا.ايدارباەۆ ەلباسى تاپسىرمالارىن ورىنداۋدىڭ ايماقتاعى ناقتى تەتىكتەرىن ورتاعا سالدى.
جولداۋداعى گەولوگيالىق بارلاۋ جۇرگىزۋ تاپسىرماسى ماڭعىستاۋدىڭ سايىن دالاسىنا سوقپاي كەتپەيدى. گەولوگيالىق بولجام بويىنشا, ەلىمىزدەگى جالپى مۇناي قورىنىڭ 25 پايىزى, ياعني 2,6 ملرد. تونناسى ماڭعىستاۋ جەرىندە. جاڭاوزەن قالاسى ماڭىنداعى قانسۋ جەرىندەگى كوگىلدىر وتىن قورى 20 ملرد. تەكشە مەتر دەپ ەسەپتەلەدى. جولداۋدا ايتىلعان كومىرسۋتەگى شيكىزاتىنا قاتىستى تاپسىرماعا وراي بيىل قانسۋدا گەولوگيالىق بارلاۋ جۇمىستارى باستالماق. سونداي-اق, ەلىمىزدە ءتورتىنشى مۇناي وڭدەۋ زاۋىتىن سالۋ ماسەلەسى دە ماڭىزدى. «اسىرەسە, جاڭا زاۋىتتى مۇناي-گاز سالاسىنا ماماندانعان ماڭعىستاۋدا سالۋدىڭ مۇمكىندىگى مول دەپ ەسەپتەيمىن. سول سەبەپتى, وسى جوباعا قاتىستى جۇمىس توبىن قۇرۋعا تاپسىرما بەردىم. قازىرگى تاڭدا عالىمدار, تاجىريبەلى مۇنايشىلار, ەكونوميستەر مۇراعات قۇجاتتارىن زەردەلەپ, مۇناي وڭدەۋ زاۋىتىن سالۋعا قاتىستى زەرتتەۋلەرمەن اينالىسۋدا», دەدى ا.ايدارباەۆ.
اكتيۆ جينالىسىندا جولداۋداعى لوگيستيكا سالاسى بويىنشا اقتاۋ پورتىنىڭ قۋاتىن ارتتىرۋ تاپسىرماسىنا ساي اتالعان پورتتى سولتۇستىك باعىتقا كەڭەيتۋ جۇمىستارىنىڭ جالعاسا بەرەتىندىگىن بىلدىك. سونىمەن قاتار, «اقتاۋ ارنايى ەكونوميكالىق ايماعىن» جەتىلدىرۋ, كاسىپكەرلىك, الەۋمەتتىك سالالاردى وركەندەتۋ, ينۆەستيتسيا تارتۋ, اگروونەركاسىپ كەشەنىن يننوۆاتسيالىق دامىتۋ باعىتىنداعى اتقارىلار شارۋالار تىزبەكتەلدى. ولاردىڭ ءبىرى – مۇنايلى اۋدانى مەن جاڭاوزەن قالاسىنان ەت وڭدەۋ زاۋىتىن جانە قۇس فەرماسىن سالۋ.
– قازاق ءتىلىنىڭ ءبىزدىڭ وڭىرىمىزدە قولدانۋ اياسى وتە اۋقىمدى. الايدا, مەكەمەلەردە, اسىرەسە, شەتەلدىك كومپانيالاردا مەملەكەتتىك تىلدە ءىس جۇرگىزۋ جۇمىستارىنىڭ ماردىمسىز ەكەنىن بىلەمىن, – دەگەن وبلىس اكىمى بارلىق مەكەمەلەردىڭ, شەتەلدىك كومپانيالاردىڭ باسشىلارىنا ىسقاعازدارىن مەملەكەتتىك تىلگە كوشىرۋدى, ءوز قىزمەتكەرلەرىنە تۇراقتى تۇردە قازاق ءتىلى كۋرستارىن وتكىزۋدى تاپسىردى.
جولداۋدىڭ جۇگى – ەلدىڭ جۇگى, جولى – ەلدىڭ جولى. سوندىقتان, ونى بىرلەسە كوتەرىپ, جۇمىلا ارەكەت ەتۋ شارت. جيىندا ءسوز العان ءار بۋىن, ءار ۇلت وكىلدەرىنىڭ ءسوزى وسىعان سايدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
