تورەشى بەلگى بەرگەن بەتتە الاڭ يەلەرى ويىن تىزگىنىن قولعا الىپ, تولاسسىز شابۋىلدار ۇيىمداستىردى. اسىرەسە, بوسنيا مەن گەرتسەگوۆينا قۇراماسىنىڭ باستى جۇلدىزى جانە كاپيتانى ەدين دجەكو ءبىزدىڭ قورعانىس شەبىمىزدى ءجيى مازالادى. ول بىرنەشە مارتە جاقسى سوققىلار جاساپ, ادەمى پاستار بەردى. فينتتەرى قانداي كەرەمەت دەسەڭىزشى... ودان بولەك, ميرالەم پيانيچ, ساەد كولاشيناتس, ادي ناليچ جانە ەرمەدين دەميروۆيچتىڭ دە تەگەۋرىنىنە توتەپ بەرۋ وڭايعا سوقپادى. شىنى كەرەك, ءبىرىنشى تايم بارىسىندا قازاقستاندىق فۋتبولشىلارعا ساتتىلىك جولداس بولدى. ولاي دەۋگە نەگىز, ءوز قاقپامىزدىڭ ماڭىندا ويىنشىلارىمىز ءجيى قاتەلەستى. ال ول مۇمكىندىكتى بوسنيالىقتار ۇتىمدى پايدالانا المادى. ولاردىڭ تەپكەن دوپتارىنىڭ كوبى قاقپادان قيىس كەتىپ جاتتى. كەيبىر تۇستا قورعاۋشىلاردىڭ اياعىنا ءتيىپ, كەرى قايتتى. ايتەۋىر, ابىروي بولعاندا بۇل قاۋىپتىڭ بارىنەن قۇتىلدىق.
ءبىرىنشى كەزەڭدە تىم ەپسىزدەۋ كورىنگەن ءبىزدىڭ كوماندا ۇزىلىستەن كەيىن باتىل قيمىلداي باستادى. ناتيجەسى وڭ بولدى. 52-مينۋتتا اسحات تاعىبەرگەننىڭ بۇرىشتامادان بەرگەن دوبىن يسلامبەك قۋات قاقپاعا ءدال ءتۇسىردى – 0:1.
قازاقستان العا شىققانىمەن, قورعانىستا جاتىپ العان جوق. ءبىراز ۋاقىت بويى بار كۇش-دارمەنىمەن العا ۇمتىلعان بوسنيالىقتاردىڭ شابۋىلدارىنا تويتارىس بەردى. وزدەرى دە بىرنەشە رەت قورعانىس شەبىن بۇزىپ وتۋگە تالپىنىس جاسادى. بۇرىشتاما دوبىن دا بىرىنەن كەيىن ءبىرىن بەرگەن ساتتە بالقان تاۋى بوكتەرى ساپارىنان ولجالى ورالساق دەگەن ءۇمىتىمىز ودان سايىن ۇلعايا ءتۇستى. بىراق ءبىر مەزەتتە ءبارى وزگەرگەندەي بولدى. 75-مينۋتتا تورەشى ءبىزدىڭ قاقپاعا كۇماندىلەۋ 11 مەترلىك ايىپ دوبىن بەلگىلەدى. ميرالەم ءپيانيچتىڭ سوققىسىن يگور شاتسكي كەرى قايتارا المادى – 1:1. ودان كەيىن دە الاڭ يەلەرى قارقىنىن باسەڭدەتپەدى. 86-مينۋتتا قازاقستاندىق قورعاۋشىلار قاتەلەستى – بۇرىشتامادان بەرىلگەن دوپتى لۋكا مەنالو توردا تۋلاتتى. ەسەپ – 2:1.
دەسەك تە, جوعارىداعى جاعداي ءبىزدىڭ جىگىتتەردىڭ جىگەرىن جاسىتا العان جوق. نەگىزگى ۋاقىتقا تورەشى تاعى التى مينۋت قوستى. سول ۋاقىت ەسەپتى تەڭەستىرۋ ءۇشىن جەتكىلىكتى بولدى. ايىپ دوبىن ءمىنسىز ورىنداعان باقتيەر زاينۋتدينوۆ بارشا قازاقستاندىق جانكۇيەردى قۋانىش پەن شاتتىققا بولەدى – 2:2. وسىلايشا, كەشە تۇندە تالعات بايسۋفينوۆ جاتتىقتىراتىن قازاقستاننىڭ ۇلتتىق قۇراماسى الەمدىك دوپ دوداسىنىڭ ىرىكتەۋ تۋرنيرىندەگى ءوزىنىڭ ءۇشىنشى ۇپايىنا قول جەتكىزدى.
