بۇل جولى دا اگرارلىق سالا بويىنشا جونگە سالۋعا ءتيىس تۇيتكىلدى ماسەلەلەردى كورسەتىپ بەردى. اتاپ ايتقاندا: اۋىل شارۋاشىلىعىنداعى جەمشوپ دايىندايتىن جەرلەردى كەڭەيتۋ, اۋىل ماڭىندا مال جاياتىن جايىلىم جەرلەردىڭ جوقتىعى, لاتيفۋنديستەردىڭ يەلىگىندەگى يگەرۋسىز جاتقان جەرلەردى شاعىن فەرمەرلىك قوجالىق يەلەرىنە قايتادان ءادىل جولمەن ءبولىپ بەرۋ, سۋبسيديا ماسەلەسىن جەتىلدىرۋ, ت.ب. ماڭىزدى ماسەلەلەر بويىنشا ۇكىمەتكە ناقتى تاپسىرمالار بەردى.
اۋىلداردا قازىرگى كەزەڭدە ەڭ تاپشى مامانداردىڭ ءبىرى – مال دارىگەرلەرى. بۇل تۇرعىدا دا جولداۋدا ۆەتەريناريا قىزمەتىن قازىرگى زامان تالابىنا ساي جەتىلدىرۋ كەرەكتىگىنە, ۆەتەرينار مامانداردىڭ جالاقىسىن كوبەيتەتىندىگىنە توقتالىپ, وسى سالانى رەفورمالاۋ بويىنشا ناقتى شارالار قابىلداۋدى تاپسىردى. اۋىلدى وركەندەتۋ – ۇلتتىڭ مەرەيىن كوتەرۋ. وتاندىق ساپالى ازىق-ت ۇلىك ونىمدەرىمەن قامتاماسىز ەتۋ – اسا ماڭىزدى ستراتەگيالىق ماسەلە. سوندىقتان دا پرەزيدەنتتىڭ اۋىل شارۋاشىلىعىنىڭ دامۋىنا باسا نازار اۋدارعانى ورىندى دەپ ەسەپتەيمىن.
ءوزىم ونەر ادامى بولعاندىقتان دا مادەنيەت قىزمەتكەرلەرىنىڭ, اتاپ ايتقاندا, كىتاپحاناشى, مۋزەي قىزمەتكەرى سەكىلدى مامانداردىڭ جالاقىسى 2025 جىلعا دەيىن جىل سايىن 20 پايىزعا كوتەرىلەتىندىگى كوڭىلگە قۋانىش ۇيالاتتى.
عىلىمدى دامىتۋ – ەلدىڭ اسا ماڭىزدى باسىمدىعى ەكەندىگىن قاداپ ايتتى. عالىم رەتىندە عىلىم سالاسىن گرانتتىق قارجىلاندىرۋ مەرزىمىن بەس جىلعا ۇزارتۋ ماسەلەسىن دە قۋانا قۇپتايمىن.
ۇلت بولاشاعى – تاربيەلى, ءبىلىمدى ۇرپاق. سوندىقتان دا پرەزيدەنتتىڭ 2022-2025 جىلدار ارالىعىندا جاڭادان مىڭ مەكتەپ سالۋدى تاپسىرۋىن – ۇرپاق بولاشاعىنا جاسالعان قامقورلىق دەپ تۇسىنەمىن. حالىقارالىق وليمپيادا جۇلدەگەرلەرى بولعان وقۋشىلاردى ماتەريالدىق, رۋحاني ىنتالاندىرۋ, سىياقى تاعايىنداۋ ەلىمىزدىڭ مەرەيىن اسقاقتاتار دارىندى بالالاردىڭ قاتارىن كوبەيتە تۇسەتىنى اقيقات. ول ءۇشىن دە پرەزيدەنتكە راحمەت ايتامىز.
مەملەكەتىمىز قۋاتتى, حالقىمىز ىنتىماقتى, ۇرپاقتارىمىز ءبىلىمدى, بولاشاعىمىز جارقىن بولسىن!
امانجول ءالتاي,
قازاقستاننىڭ ەڭبەك سىڭىرگەن قايراتكەرى
