دۇيسەنبى كەشكە باستالعان نوسەردىڭ سالدارىنان وزەندەر تاسىپ, تۋلا قالاسىنداعى اۋرۋحانانىڭ ءبىرىنشى قاباتىن سۋ باسقان. ترانسفورماتور ىستەن شىعىپ, مەكەمە ەلەكترسىز قالدى. كوروناۆيرۋس جۇقتىرعان كەيبىر اۋىر جاعدايداعى ناۋقاستارعا وسى كەزدە وتتەگىمەن تىنىس بەرىلىپ تۇرعان. قۇتقارۋشىلار اۋرۋحانادان 40 ادامدى الىپ شىققان.
مەكسيكا بيلىگى تابيعي اپاتتىڭ سالدارىن جويۋعا اسكەرىن جۇمىلدىردى. سۋ تاسقىنىنان 30 مىڭنان اسا ادام زارداپ شەكتى. سەيسەنبى كۇنى مەكسيكانىڭ گەررەرو شتاتىندا, مەحيكودان 300 شاقىرىم جەردە ورنالاسقان اكاپۋلكو كۋرورتىنا جاقىن جەردە 7,1 بالدىق جەر سىلكىنىسى بولدى.
ۇلتتىق سەيسمولوگيالىق قىزمەتتىڭ حابارلاۋىنشا, ودان كەيىن تاعى 70 جەر ءدۇمپۋى قايتالانعان. مەكسيكا پرەزيدەنتى ءوزىنىڭ قىسقا بەينەحابارلاماسىندا جەر سىلكىنىسىنەن عيماراتتار اسا قاتتى قيراماعانىن, الايدا ءبىر ادامنىڭ قازا تاپقانىن مالىمدەدى. ەلەكتر بەرۋ جونىندەگى فەدەرالدى كوميسسيانىڭ دەرەكتەرىنە ساي, جەر سىلكىنىسى سالدارىنان مەكسيكادا 730 مىڭنان اسا ادام ەلەكتر جارىعىنسىز قالعان, بۇل بارلىق تۇتىنۋشىنىڭ 22%-ى.
