سۋرەت: adebiportal.kz
كەشە استانا جۇرتشىلىعىنىڭ, ەل وڭىرلەرى وكىلدەرىنىڭ اياۋلى اقىنمەن قوشتاسۋ ءراسىمىن قازاقستان رەسپۋبليكاسىنىڭ مادەنيەت جانە اقپارات ءمينيسترى مۇحتار قۇل-مۇحاممەد ەلباسىنىڭ كوڭىل ايتۋ جەدەلحاتىن وقۋدان باستادى.
استانا قالاسىنىڭ اكىمى يمانعالي تاسماعامبەتوۆ, قازاقستاننىڭ ەڭبەك ەرى, حالىق جازۋشىسى ءابىش كەكىلباەۆ, اكادەميك كەنجەعالي ساعاديەۆ, ءماجىلىس دەپۋتاتى قۋانىش سۇلتانوۆ, اقىن شىعارمالارىنىڭ اۋدارماشىسى تاتيانا فرولوۆسكايا, اتىراۋ وبلىسىنىڭ اكىمى باقتىقوجا ىزمۇحامبەتوۆ, سەنات دەپۋتاتى, قازاقستان جازۋشىلار وداعى باسقارماسىنىڭ توراعاسى نۇرلان ورازالين, اقىن سەرىك تۇرعىنبەك ۇلى جينالعان جۇرتشىلىقتىڭ ەت جۇرەگىن ەلجىرەتكەن قوشتاسۋ سوزدەرىندە تاماشا تالانت يەسىنىڭ سان قىرىن جان-جاقتى اشا الدى. ولاردىڭ ءبارىن قايتا بايان ەتىپ جاتۋ قيىن.
تەك ءبىر ءسوزدى – قايراتكەر قالامگەر قۋانىش سۇلتانوۆتىڭ ازالى لەبىزىن كەلتىرەر بولساق, ول بىلاي ورىلەدى: «اقىن فاريزا وڭعارسىنقىزى ۇلت ساناسىنا, رۋحانيات قازىناسىنا وراسان ەڭبەك ءسىڭىردى. ول ونەر الەمى مەن قوعام ساناسىنا ءوزىنىڭ تەڭدەسى جوق نازىك ليريكاسىمەن, سەمسەردەي شىمىر الەۋمەتتىك سوزىمەن ءومىردىڭ شىندىعىن, قوعامنىڭ قايشىلىقتارىن جالتاقسىز ايتۋىمەن ىقپال ەتىپ, ەشكىمگە ۇقسامايتىن, ەشكىمدى قايتالامايتىن وزىندىك جولىن سالىپ, دۇنيەتانىمىن قالىپتاستىرىپ كەتتى. ۇلت ساناسىنا ساپا قوستى.
فاريزا وڭعارسىنقىزى ءوزىنىڭ جاستىق شاعىنان جاس ۇرپاق تاربيەسىنە ەرەكشە دەن قويىپ, اق جۇرەگىمەن ءدال وسى الەۋمەتتىك توپتىڭ بولاشاعىنا ۇزدىكسىز ەڭبەك ەتكەن مەيىرىمدى انا, باۋىرمال جان, بىلگىر قايراتكەر. ۇزاق جىلدار جاس ۇرپاق تاربيەسىنە ارنالعان گازەت, جۋرنالدارعا باسشىلىق ەتتى. اقىندىعىمەن شەكتەلىپ قالماي, سابيلەر, بالالار, جاسوسپىرىمدەر ومىرىنە بايلانىستى كەلەلى ماسەلەلەر كوتەرىپ, القالى, مارتەبەلى جيىنداردا ءسوز سويلەپ, پۋبليتسيستيكالىق ماقالالار جازدى.
جاس تالانتتارعا, جاس اقىندارعا, ونەرپازدارعا قامقورلىق جاساۋدان ءومىرىنىڭ سوڭىنا دەيىن جالىققان جوق. ەلىمىزدىڭ تۇكپىر-تۇكپىرىندە فاريزاعا ۇقساعىسى كەلگەن جۇزدەگەن جاس ورەن ءوستى. كوپتەگەن اتا-انالار جاڭا تۋعان نارەستەلەرىنە فاريزا ەسىمىن بەرۋدى جاقسى ىرىمعا جورىدى». ءيا, سولاي. اقىن رۋحى حالىق جۇرەگىندە جاڭعىرا بەرەدى. فاريزا ەسىمى ۇمىتىلمايدى. «ەگەمەن قازاقستاننىڭ» بەتىندە نەسىپبەك ايت ۇلى جىرلاعانداي, «قازاقتىڭ اياۋلىسى, پەريزاتى, وشپەيدى ەشقاشان دا فاريزا اتى!».
سۇلەيمەن مامەت,
«ەگەمەن قازاقستان».
