«ەگەمەن قازاقستان» گازەتىنىڭ №283 (27.12.2013 ج.) نومىرىندە «جانايقاي» ايدارىمەن «ارالاس مەكتەپكە اينالدىرۋ اعاتتىق» دەگەن ماقالا جاريالانعان ەدى. وندا ريددەر قالاسىنداعى مەملەكەتتىك تىلدەگى مەكتەپتى ارالاس ءبىلىم ۇياسىنا اينالدىرۋ ماسەلەسى ءسوز بولعان ەدى. سوعان وراي, ءبىر توپ گازەت وقىرماندارىنان كەلگەن حاتتى نازارلارىڭىزعا ۇسىنىپ وتىرمىز.
«ەگەمەن قازاقستان» گازەتىنىڭ №283 (27.12.2013 ج.) نومىرىندە «جانايقاي» ايدارىمەن «ارالاس مەكتەپكە اينالدىرۋ اعاتتىق» دەگەن ماقالا جاريالانعان ەدى. وندا ريددەر قالاسىنداعى مەملەكەتتىك تىلدەگى مەكتەپتى ارالاس ءبىلىم ۇياسىنا اينالدىرۋ ماسەلەسى ءسوز بولعان ەدى. سوعان وراي, ءبىر توپ گازەت وقىرماندارىنان كەلگەن حاتتى نازارلارىڭىزعا ۇسىنىپ وتىرمىز.
دەربەس ەل بولعانىمىزعا جيىرما جىلدان ارتىق ۋاقىت وتسە دە, قۇلدىق پسيحولوگيادان, باسقا ۇلتتارعا جالتاقتاۋدان, جالپاقتاۋدان, مازاق بولۋدان, ءوز ۇلتىمىزدىڭ تاعدىرىنا نەمكەتتىلىكتەن ءالى ارىلا الماي كەلە جاتقانىمىزعا زىعىردانىمىز قاينايدى.
باسقا ۇلتتارعا جاعىمپازدانۋ ەسەبىنەن ساياسي ۇپاي جيناۋ, مانساپقورلىق, جالعان ينتەرناتسيوناليستىك اكىمقارالاردىڭ اراسىندا قاشان تىيىلار ەكەن؟
ءبىز ريددەر اكىمىنىڭ ارالاس مەكتەپ اشۋعا قۇمارلىعىن وسىلاي باعالايمىز. بۇل نامىسسىزدىق پا قالاي؟ ريددەردە باسقا پروبلەما ءبىتىپ, ارالاس مەكتەپ اشۋ عانا قالدى ما؟
اكىم مىرزا, ءسىزدى وبلىس اكىمى بەردىبەك ساپارباەۆ ريددەرگە ارالاس مەكتەپ اشۋعا جىبەرمەگەن شىعار. قالادا باسقا ماسەلە دە جەتىپ-ارتىلادى عوي. ءسىزدىڭ مىنا ءسوزىڭىزدى قالاي تۇسىنۋگە بولادى: «يا ۆووبششە زا سمەشاننۋيۋ شكولۋ, چتوبى پوددەرجات درۋجەسكيە وتنوشەنيا مەجدۋ ناتسيامي».
ەلباسىمىز مەملەكەتتىك ءتىلدى دامىتۋدى بيىلعى جولداۋىندا دا باسىم باعىتتاردىڭ ءبىرى رەتىندە اتادى. كەيدە مەملەكەت باسشىسىنىڭ وسىنداي جاناشىرلىق قادامىن اكىمقارالار تۇسىنبەي, وزدەرىنشە ءىس ىستەيتىنى جانىمىزعا باتادى. جالپى, ولاردىڭ مىندەتى, ارالاس مەكتەپ اشۋ ەمەس, مەملەكەت باسشىسىنىڭ ءتىلدى دامىتۋ جونىندەگى تاپسىرماسىنا ساي, تازا قازاق مەكتەبىن كوبەيتۋ, جاستارعا قازاقي تاربيە بەرۋ, بويلارىنا ۇلتتىق ءپاتريوتيزمدى ءسىڭىرۋ, ەلىن سۇيۋگە, ۇلتىن قادىرلەۋگە باۋلۋ دەپ بىلەمىز.
ءبىز ەلدەگى تىنىشتىقتى, حالىق اراسىنداعى تاتۋلىقتى, اۋىزبىرشىلىكتى, دوستىقتى تىلەيمىز, جاقتايمىز, ەش قارسىلىعىمىز جوق. تەك مەملەكەتتىك مارتەبەگە يە قازاق ءتىلىنىڭ اياسىن تارىلتپاسا ەكەن. ءبىزدىڭ ءبىر كۇدىگىمىز بار, جوعارىدا ايتقان, «ەگەمەن قازاقستاندا» جاريالانعان ماقالانى اكىم مىرزا وقىماعان سەكىلدى. ەگەر تانىسسا, وسى ۋاقىتقا دەيىن ءبىر جاۋاپ بەرەر ەدى. ءبىز باس باسىلىمعا الدىمىز 50 جىلدان ارتىق, كەمى 20 جىل شاماسىندا تۇراقتى جازىلىپ كەلە جاتقان وقىرماندارمىز. گازەتتە شىققان ءاربىر ماقالانى وقىپ وتىرامىز. مىنا «جانايقايمەن» دە تانىستىق. وندا كوتەرىلگەن ماسەلە ورىندى. قازاق مەكتەبىن ارالاسقا اينالدىرۋعا قارسى ەكەنىمىزدى بىلدىرەمىز.
ءا.ساعي, م.توقتاۋوۆ, و.وتەۋوۆ, ا.تەكتىعۇل, ق.زەرباەۆ,
ن.سيسەنباەۆ, ن.ەسىموۆ, ع.احمەتوۆ, ق.قازىقباەۆ,
ا.مۇقانوۆ, س.ايداپكەل, ت.ب.
بارلىعى – 31 ادام.
